Економија
Вашингтон Пост: Заборавете на Кипар, на ред е Словенија
Според сите индикации кризата во Кипар е готова приказна, а новата земја која почнува да загрижува е Словенија, пишува во текст во Вашингтон пост.
„Словенија имала прилично лоша недела со обврзниците, а се чини дека ќе треба и спасување. Тоа не е криза голема колку кипарската, но секако спаѓа во ‘опасната зона'”, нагласува Вашингтон Пост, кој се прашува како и зошто Словенија се најде во таква ситуација.
Весникот потсетува дека Словенија во 2004 година влегла во Европската унија(ЕУ) и за многу кратко време го заменила толарот со еврото.
Станува збор за мала економија која се потпира врз извозот, а на почетокот на 21 век имала раст поголем од еврозоната, но со растечки долг. ЗА разлика од другите земји кои имале проблем со кредитите на недвижнини, Словенија имала проблеми со корпорациите кои финансирале некои операции преку долг, а не преку капитал. Така во 2007 година се откри дека долгот на приватниот сектор пораснал за 23,5 отсто, додека нефинансискиот приватен сектор го зголемил долгот за 40 отсто. Многу од тие кредити се покажаа лоши, пишува весникот.
Вашингтон пост потсетува и на извештајот на ММФ од минатата недела, според кој трите најголеми словенечки банки, инаку во сопственост на државата, нема да преживеат без нови докапитализации. Станува збор за најмалку милијарда евра, додека во банкарскиот сектор зјае „дупка” наводно од најмалку седум милијарди евра лоши кредити. ММФ исто така нагласи дека соодносот на лоши кредити со 15,6 отсто во 2011 година порасна на 20,5 отсто во 2012 година.
Понатаму се нагласува дека се случила и смена на власта, а новата премиерка нагласила дека повеќе време сака да посвети на економијата, отколку на намалувањето на јавниот долг, што би можело да се одрази на кредитните рејтинзи.
ММФ смета дека на Словенија и се потребни 3,8 милијарди долари преку обврзници, од кои дури третина би требало да оди на банките. Ако останат ваквите бројки за постигање на оптималната цена за обврзница, ќе биде многу тешко. Тоа во крајна линија ќе значи дека земјата ќе мора да побара помош од ММФ, Европската централна банка или Европската комисија, со други зборови, на Словенија ќе и треба спасување.
Марко Крањец, кој е член на словенечката и Европската централна банка, смета дека спасувањето на Словенија на крајот нема да биде потребно и дека ситуацијата во Словенија е помалку сложена од онаа на Кипар. /крај/вп/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.