Економија
Се развива соработка со бугарски бизнисмени
Министерот за транспорт и врски, Миле Јанакиески, на денешното Собрание на македонско-бугарската стопанска комора ги повика бугарските бизнисмени да ги зголемат нивните инвестиции во Македонија, заради поволните услови, даночни олеснувања, скратена постапка за издавање на градежни дозволи и електронско издавање на одобренија за градба.
„Владата утврди стратегија за формирање на нови технолошко-индустриски развојни зони, (ТИРЗ) во источниот дел на државата, кои наскоро ќе бидат отворени – ТИРЗ во Берово, Пехчево, Делчево и Струмица”, рече Јанакиески.
Според него, за инвестиции во овие индустриски зони Владата дава многу даночни поволности и има најдобар даночен пакет од земјите во регионот.
Подобрените услови за инвестирање, се препознати и од Светска банка, која во извештајот „Дуинг Бизнис” ја рангира Република Македонија на врвот на светски реформатори. Во 2012 година, Македонија се најде на врвот на оваа листа во делот на одобрување на дозволи за градење.
„Македонија ќе биде прва земја во регионот во која ќе се применува системот на електронско одобрение за градење. Овој систем ќе почне да функционира од први јуни годинава, а софтверот е направен врз основа на системот на Сингапур”, рече Јанакиески.
За подобрување на соработката со Бугарија, ќе придонесе и изградбата на пругата кон Бугарија, а за првата фаза од Куманово до Бељаковце веќе се обезбедени 44 милиони евра, додека изградбата на втората фаза треба да започне за 10 до 15 дена.
„Нашата визија е заедничка иднина во заедничкото европско семејство, што ќе биде придобивка за целиот регион, а ќе значи и сигурност за бизнисите”, рече Јанакиески.
Амбасадорот на Бугарија во Република Македонија, Иван Петков, рече дека трговијата и зголемувањето на заемните инвестиции е приоритет на двете држави, но дека засега размената меѓу двете земји не задоволува поради кризата.
Се заложи во иднина тоа да биде надминато, односно соработката меѓу двете земји да биде зголемена.
„Ние ќе работиме во насока на зголемување на соработката меѓу двете земји и воведување на повеќе производи и услуги во размената. Амбасадата на Република Бугарија ќе продолжи да ги поддржува бугарските инвестиции во Македонија”, додаде Петков.
„Во првите три месеци има зголемен интерес на бугарски бизнисмени за инвестирање во Македонија. Македонија е трета најпосакувана дестинација за бизнис инвестиции од страна на бугарските бизнисмени”, рече Благоја Ханџиски, амбасадор на Македонија во Бугарија./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.