Економија
Бернанке најави повлекување на Fed од финансиските пазари
Претседателот на американската централна банка Federal Reserve (Fed), Бен Бернанке објави дека американската економија е доволно силна па централната банка може да почне со намалувањето на своите поттикнувачки монетарни програми подоцна годинава.
Потврдата на Бернанке дека Fed е сé поблиску до намалувањето на своите програми за купување на државните и хипотекарните обврзници во вредност од 85 милијарди американски долари месечно ги вознемири инвеститорите, и предизвика остар пад на цените на акциите и обврзниците, при што приносите на државните обврзници го достигнаа највисокото ниво во последните 15 месеци.
Умерениот раст би требало да доведе до натамошни подобрувања на пазарите на трудот бидејќи „челните ветрови“ со коишто е соочена компанијата слабеат, изјави Бернанке на прес-конференцијата во средата, којашто се одржа по дводневата седница на челниците на Fed. Претседателот на американската централна банка, исто така, предочи дека очекува постепен раст на инфлацијата наназад кон долгорочниот цел на банката од 2 отсто.
Подготвеноста на Fed за намалување на износите на програмите за поттикнување покажуваат дека расте довербата на централната банка во одржливоста и силата на заздравувањето на економијата. Откако кон крајот на 2008 година ја намали клучната каматна стапка во близина на нулата, за да ги намали долгорочните камати, го поттикна кредитирањето и растот на економијата, централната банка тројно го зголеми својот биланс на околу 3.300 милијарди американски долари.
„Fed проценува дека подоцна оваа година ќе може да ги намали месечните износи за купување добра, а доколку економските податоци идат во согласност со нашите очекувања, ќе продолжиме постапно да ги намалуваме програмите за купување во првата половина на идната година, а ќе ги укинеме кон крајот на таа година“, изјави Бернанке.
Додаде дека до тогаш стапката на невработеност би требало да изнесува близу 7 отсто, додека сега изнесува 7,6 проценти. Доколку тие прогнози се покажат премногу оптимистички, Fed би можеа да престане да ги намалува програмите за купување на обврзниците или, дури, повторно да ги зголеми, вели Бернанке.
Инвеститорите на финансиските пазари ги изненади директното наведување на роковите на повлекувањето на Fed од финансиските пазар од страна на Бернанке, бидејќи пред неговата прес-конференција челниците на централната банка, по дводневното заседание, порачаа дека банката ќе продолжи да купува државни обврзници во износ од 45 милијарди долари, како и хипотекарни обврзници во износ од 40 милијарди долари, на месечно ниво ненајавувајќи намалување на тие програми.
По изјавите на Бернанке, на Волстрит индексот S&P 500 падна за околу 1,4 отсто, додека приносите од десетгодишните американски државни обврзници достигнаа 2,36 отсто, што претставува највисокото ниво од март 2012 година. Оддалечувањето на Fed од извонредно лабавата монетарна политика поттикна, исто така, и раст на курсот на американскиот долар во однос на најважните светски валути.
Во анкетата на Reuters, од 17 аналитичари дури 16 очекуваат намалување на програмите на американската централна банка за купување на обврзниците до крајот на 2013 година,а повеќето сметаат дека Fed со тој процес ќе започне на седницата на нејзините челници којашто ќе се одржи во септември./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.