Економија
Одложени наплати на царина бараат бизнисмените
Локално царинење, односно царинење во самите фирми, како што има во сите европски земји и наплата по 40 до 60 дена на царините, место сегашното дневно однапред, побара стопанствениците од Битола од Царинската управа.
Царинската управа на Република Македонија, АМЕРИТ, СИЗ Македонија сообраќај и Регионалната комора Битола, организираа работилница на која се дискутираше за олеснувањата во спроведувањето на царинските постапки.
Воедно беа презентирани и активности на АМЕРИТ во насока на олеснување на работењето на транспортните компании како и испраќањето на електронски преддекларации.Присуствуваа претставници од околу 70 компании.
„Ние имаме советодавно тело формирано пред повеќе години каде партиципираат повеќе стопански комори и други асоцијации, но ние сфаќаме дека е потребно и на локално ниво директно на бизнисмените да им ги презентираме кои се новините, кои се можностите, да ги слушнеме нивните критики, пофалби, предлози… Ние презентираме кои се новините и можностите за поедноставување на царинските постапки и нивните трошоци и времето на снабдување што не се доволно искористени, а што им стојат на располагање. Ние тоа мораме да го презентираме и да го обновиме тоа што веќе било презентирано и да ги кажеме новините. Воедно, да слушнеме какви забелешки имаат тие и што се предлагаат. Досега слушнавме некои добри оценки, предлози за подобрување како за намалување на хартијата, намалување на одредени постапки и процедури, кои не се директно поврзани со самото царинење, туку со завршување на други царински постапки“, истакна Ванчо Каргов раководител на Царинската управа.
Целта е да се промовираат системи кои овозможуваат значителни олеснувања, а кои се уште не се користат доволно.
„Ние и понатаму ќе продолжиме да го промовираме царинењето на самите гранични премини каде се намалуваат формалностите за внатрешни терминали, за банкарски гаранции, за дуплирање од секаков вид, за чекање на камионите. Исто така и можноста за поднесување на документи за царински преглед пред стигнување на граничниот премин, а имаме и повеќе електронски системи во функција кои се користат но според нас не доволно, поради што наша задача е да ги промовираме повеќе за да ги направиме потоа и задолжителни да елиминираме хартија и непосредни дискрециски било какви однесувања колку што е можно повеќе“вели Каргов
Од битолската Стопанска комора денеска излегоа со три предлози до Царинската Управа локално царинење и одложена наплата.
„Битола е регија која е доста поврзана со увоз и извоз од цело стопанство и новите царински прописи не се лесни за ги следи една фирма. Секојдневно се менуваат и европската регулатива за царини се менува така што за стопанството е тешко во однос на сите тие промени, сите тие барања и прописи и бараме начин за олеснување каде што стопанството многу полесно и побрзо ќе ги врши тие царински процедури“, рече претседателот на Регионалната стопанска комора, Битола, Мирко Велковски.
Комората, секогаш барала олеснување кон стопанството.
„Прво баравме и добивме царина тркало односно на самите премини да се врши царината што е брзо, и иако има мали проблеми, сепак досега стопанството е задоволно. Второ барање е локалното царинење, односно царинење во самите фирми. Тоа олеснување кое го бараме мислам дека го има во сите европски земји. Трето што ќе бараме е наплата после 40 до 60 дена на царините. Сега се плаќа дневно однапред. Со такви одложени наплати доста би се олеснило за стопанството“, истакна Велковски.
Вакви работилници досега се одржале во Штип, Струмица, Куманово по Битола, кампањата продолжува во Гевгелија , Скопје и Гостивар./крај/тера/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.