Економија
По 35 години нови возови во Македонија
По 35 години во вторникот беше објавен повик за набавка на гарнитури за превоз на патници во железничкиот сообраќај, при што ќе бидат набавени четири дизел патнички гарнитури и шест патнички гарнитури на електричен погон во вкупна вредност од 25 милиони евра, со кои ќе може да се превезуваат вкупно 1.200 патници.
Министерот за транспорт и врски, Миле Јанакиески, истакна дека новите патнички гарнитури ќе бидат употребени на најфреквентните линии и според анализата направена во „Македонски железници“ со нив ќе бидат покриени 60 отсто од линиите во железничкиот сообраќај, со што на патниците ќе им биде овозможен поудобен и поквалитетен превоз.
„Патничките гарнитури ќе бидат по највисоки европски стандарди. Истите ќе бидат целосно климатизирани, со вакуум тоалети, ќе бидат енергетски ефикасни, а ќе можат да ги користат и лица со ограничена мобилност“, рече Јанакиески. Прецизираше дека ќе треба да ги исполнуваат највисоките европски стандарди за превоз на патници, како во поглед на техничките карактеристики, така и во поглед на задоволување на стандардите за квалитетен превоз на патниците, односно ќе бидат направени согласно техничките стандарди за интероперабилност на Европската унија.
По набавката на патничките гарнитури, Јанакиески очекува да се зголеми бројот на патници кои ќе го користат железничкиот сообраќај.
Обновата, како што додаде Јанакиески, нема да значи автоматско зголемување на цените на билетите, а возовите ќе се движат со зголемена брзина од 100 до 120 километри на час.
Министерот очекува договорот со избраната компанија да биде потпишан во декември годинава, а најдоцна во почетокот на идната година, по што во рок од 12 месеци ќе пристигнат првите гарнитури кои сите наеднаш ќе бидат пуштени во сообраќај.
Повикот е за набавка на нови дизел-моторни и електро-моторни гарнитури за превоз на патници во железницата е објавен на интернет-страницата на Европската банка за обнова и развој.
Како што нагласи Јанакиески, станува збор за „уште еден чекор од реализирањето на стратегијата на Владата на Република Македонија за подобрување на состојбите во железниците, односно конкретно имплементирање на проектот за обнова на возниот парк во железничкиот превоз“.
Со оглед на тоа дека се работи за двостепена процедура за набавка, понудувачите своите првични понуди треба да ги достават до 8-ми октомври кога ќе започне нивна евалуација, по што квалификуваните компании од првиот степен своите финални понуди треба да ги поднесат на почетокот на декември оваа година. Се очекува во рок од 12 месеци од потпишувањето на договорот да пристигнат и првите гарнитури во Република Македонија, што значи дека може да се очекуваат и во текот на 2014 година.
Јанакиески потсети дека покрај овој проект за набавка на нови возни средства, изминатиот период целосно беа репарирани десет класични патнички вагони и две дизел моторни гарнитури. Со овој потег, како што посочи министерот за транспорт и врски, веќе е значително намалена потрошувачката на нафта, односно заштедата изнесува околу 20 отсто, што доведува до енергетски поефикасно одвивање на патничкиот превоз. Спореди дека во однос на 2011 година, минатата година е направена заштеда од 1.000 тони нафта. Со новите возни средства, освен драстично подобрување на квалитетот и удобноста на превозот за патниците, се очекува уште поголема заштеда на средства кои сега се одвојуваат за одржување и експлоатација на старите возни средства./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.