Економија
Во Чикаго претставени можностите за инвестирање во Mакедонија
Со поддршка на американската компанија „Денстон“, во среда вечер, во Чикаго, беше организиран бизнис форум, на која македонскaта делегација ги претстави можностите за инвестирање пред триесетина американски фирми од областа на автомобилската индустрија, медицината, енергетиката, инфраструктурата и бизнисот со недвижности.
„Ваквите настани се исклучително потребни за фирми како нашите. Јас сум во бизнисот со еквити фондови, и на овој начин можеме да ги увидиме и разбереме условите во Македонија. Позитивно е што една земја носи министри за да се сретнат со бизнис лидерите во Чикаго и да разговараат и да се соочат со нив. Нема земја во Југоисточна Европа која прави толку многу за да го обезбеди економскиот развој и да покаже транспарентност за да се промовира како место во кое што сака западните компании да инвестираат“, рече бизнисменот од Чикаго Ендру Магличели од компанијата „Марун капитал груп“.
Премиерот Груевски во своето обраќање пред американските бизнисмени се осврна на поволностите за инвестиции кои ги овозможува нашата земја, а кои се огледаат во услужно ориентираната Влада, во пристапот до пазар од повеќе стотици милиони потрошувачи низ Европа за производите на странските компании кои функционираат во Македонија, на ниските трошоци и едуцираната работна сила.
„Од една страна Македонија е земја која нуди најниски трошоци за водење бизнис во Европа. Од друга страна Македонија поседува млади и добро едуцирани луѓе кои се спремни да работат и придонесат за странските компании. Кога велам најниски трошоци за водење бизнис мислам на сите трошоци, а особено на даноците. На пример, персоналниот данок на доход е само 10 проценти, а данокот на добивка е исто така 10 проценти, и тоа само за компаниите кои ќе ја распределат добивката како дивиденда. Оние кои нема да ја распределат не плаќаат данок, неограничен број на години и за неограничени износ“, изјави премиерот Груевски во своето обраќање.
На бизнис форумот се обрати и познатиот американски бизнисмен со македонско потекло Мајк Зафировски кој е еминентен член на американската бизнис заедница и претседател на одборите на директори на повеќе американски компании. Тој ги охрабри бизнис лидерите од Чикаго да ја вметнат Македонија во своите размислувања и анализи за проширување на бизнисите во Европа, давајќи силна гаранција околу условите за водење бизнис во нашата земја.
„Прво прашање кое бизнисмените го поставуваат е каква е политичката стабилност и дали Владата дава поддршка на бизнисот, кои прашања може да ги поставите до Владата, дали може да очекувате соработка, и што може да очекувате од неа? Од мое лично искуство во последните седум, осум години можам да ви кажам дека Владата има многу голема про бизнис ориентација, многу од старите ограничувачки регулативи се отфрлени, има фискална и регулаторна стабилност и сите макроекономски индикатори, како што се инфлацијата и дефицитот се позитивни“, рече Мајк Зафировски пред бизнисмените од Чикаго.
Вицепремиерот Ставрески се осврна на конкретните полиња на интерес во економијата во кои американските бизнисмени можат да инвестираат. Тој го истакна напредокот на Република Македонија и на меѓународните листи кои ја оценуваат бизнис климата во земјите.
Министерот Веле Самак ги истакна позитивните ефекти од можностите за ангажирање на едуцирани работници кои придонесуваат во продуктивноста и профитабилноста на инвеститорите.
Директорот Висар Фида ги акцентираше можностите кои се нудат во технолошко индустриските развојни зони, и услужната ориентираност кон потенцијалните инвеститори на Агенцијата за странски инвестиции и промоција на извозот.
Владината делегација денеска ќе присуствува на бизнис форум во Бостон./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.