Економија
Секој осми човек на светот е гладен
Секој осми човек на планетата е хронично неисхранет, објавија во вторникот агенциите за храна при Обединетите нации, предупредувајќи ги светските челници дека некои региони во светот нема да успеат да го преполоват бројот на гладните до половината на 2015 година.
Во новиот извештајот за прехранбената несигурност, агенциите на ОН проценуваат дека од 2011 до 2013 година 842 милиони луѓе биле хронично гладни, што е 12 отсто од светската популација и 17 отсто помалку отколку во периодот од 1990 до 1992 година. Оваа нова бројка, исто така, е пониска од минатата процена дека 868 милиони луѓе во периодот 2010 до 2012 година, како и од 1,02 милијарди луѓе во 2009 година, меѓутоа не е воедначен напредок во исполнувањето на милениумската развојна цел, според којашто до 2015 година би требало да биде преполовена гладта во светот.
Многу држави веројатно нема да ги исполнат целите кои ги усвоија светските лидери во Обединетите нации во 2000 година, објавија од Организацијата за храна и земјоделство (FAO), Светската програма за храна (WFP) и Меѓународниот фонд за земјоделски развој (IFAD).
„Државите коишто во последните две децении доживеаја судири веројатно ќе имаат позначителни проблеми во намалувањето на гладта. Земјите без излез на море се соочени со постојаните предизвици во пристапот до светските пазар на храна, а државите со слаба инфраструктура и институциите и со дополнителни ограничувања“, се вели во извештајот.
Политиките на поттикнување на земјоделската продуктивност и достапноста до храната се клучни за намалување на појавата на глад и таму каде што е раширена сиромаштијата, истакнуваат во извештајот споменатите три агенции на ОН.
„Кога тие (поттикнувањата и субвенциите -з.р.) ќе се комбинираат со социјалната грижа и другите мерки кои ги зголемуваат приходите на сиромашните семејства за да купат храна, тие може да имаат уште попозитивен ефект и да го поттикнат руралниот развој“. Роднините коишто испраќаат парична помош од странство, којашто е трипати поголема од официјалната развојна помош, има значително влијание и овозможува подобра исхрана“, се истакнува уште во извештајот.
Огромно мнозинство од гладните – 827 милиони луѓе, живеат во земјите во развој, каде што раширеноста на неисхранетоста во овој извештај се проценува на 14,3 отсто. Африка и натаму е регионот со највисока стапка на неисхранетост којашто погаѓа повеќе од петтина од населението, а ја следи јужна Азија./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.