Економија
Сараќини го презентираше Предлог законот за заклучување на стечајните постапки
Министерот за економија Ваљон Сараќини го презентираше предлог на законот за заклучување на стечајните постапки, отворени согласно законот за присилно порамнување, стечај, ликвидација и законот за стечај. Во изработка на Законот, беа вклучени претставници на повеќе институции во државата, домашни и надворешни експерти.
„Според анализата беше утврдено дека во постоечките одредби на Законот за присилно порамнување стечај и ликвидација како и во Законот за стечај не беше можно утврдување на правен статус на бесправните објекти кои преставуваа имот на стечајниот должник. ,заради што се изработи специјален Закон кој што ќе важи за околу 300 стечаи, а со кој очекуваме за нешто помалку од една година, да ги заклучиме односно решиме сите стари стечајни постапки, сите тие стечајни постапки кои траат долго поради неможноста за продажба на имот со неутврден правен статус“, истакна министерот Сараќини.
Постапката за утврдување на правен статус на имотот на должникот во стечајна постапка е многу едноставна, а започнува со поднесување на предлог во вонпарична постапка до вонпаричниот оддел во судот на чие подрачје се спроведува постапката.
Сараќини појасни дека предлогот за утврдување на правен статус на бесправен објект во стечајна постапка содржи, означување на судот, назив и седиште на стечајниот управник, опис на недвижниот имот (за кој се предлага утврдување на правен статус), а кон предлогот се доставува правосилно решение за отварање на стечајна постапка или пак одобрен план за реорганизација, доказ за приклучок на комунална инфраструктура (и тоа со датум пред отворање на стечајна постапка) и геодетски елаборат за утврдување на фактичката состојба на бесправен објект.
Вториот чекор, постапката за впаричување на имотот кој влегува во стечајната маса подразбира продажбата на имотот од стечајната маса се врши попат на електронска продажба (со јавно наддавање), доколку се случи неуспешна прва продажба на имотот од стечајната маса, продажбата се повторува само уште еднаш (со тоа што целата продажба треба да заврши во рок 70 дена) и доколку пак и втората продажба е неуспешна.
„Во законот се предвидени и казнени одредби односно глоба во износ од 10 000-15 000 евра, а ќе му се изрече за прекршок на одговорното лице ако во утврдениот рок не постапи по барањето на стечајниот управник за повлекување на барањето за утврдување на правен статус“, информира Сараќини, додавајќи дека со ова законско решение ќе се решат многу работи, најпрвин ќе имаме брза продажба на имотот на стечајниот должник, ќе се зголеми процентот на намирување на доверителите, ќе се реши правниот статус на бесправните објекти, ќе се довршат објектите кои поради стечај на инвеститорот подолг период се наоѓаат во разни фази на градба, значи останале недоградени, ќе се зголеми бројот на изградени станови кои повеќе години стојат како недовршени, се отвараат можности за нови инвестиции во градежништвото.
Директорот на катастар Трпески истакна дека пред конечната распределба на имотот на стечајниот должник, стечајниот управник, е должен да ги исплати трошоците за изработка на геодетски елаборат на Агенцијата за катастар на недвижности доколку таквиот елаборат не бил поднесен како прилог кон барањето за утврдување на правен статус на бесправен објект./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.