Економија
Прв преглед на трговската политика на Македонија од членството во СТО
Економската политика на Македонија е во фокусот на вниманието на првиот преглед на трговската политика од членството во Светската трговска организација во април 2003 година.
Основа за овој преглед се извештајот на Секретаријатот на СТО и извештајот од Владата на Република Македонија, а со него се испитува и оценува трговијата и сродните политики на секоја земја-членка во редовни интервали, во зависност од големината на земјата.
Во извештајот на Секретаријатот на СТО се вели дека трговските и инвестиционите политики се насочени кон пристапување на Република Македонија кон ЕУ.
„Земјата оствари напредок во усогласувањето со acquis, во согласност со својот кандидатски статус и иницираше измени во законодавството во неколку домени, меѓу кои регистрација на фирми, царинска политика, јавни набавки, стандарди, политики на конкурентност и интелектуална сопственост. Севкупната трговска регулаторна рамка е значително подобрена во последниве години, а Владата е фокусирана на консолидирање и ефикасно имплементирање на последните усвоени и изменети закони и прописи“, пишува во извештајот.
Македонската делегација, предводена од заменик министерот за економија Христијан Делев, во седиштето на СТО во Женева реферира пред членовите на СТО за актуелните економски состојби и достигнувања во државата, најзначајните спроведени реформи и интеграцијата на националната во регионалната и светската економија. Улогата на главен дискутант за Република Македонија е Амбасадорот на Исланд, Н.Е. М.Еујолофсон, претседавач на Телото за преглед на трговската политика е шведскиот Амбасадор Ј.Рајтер, а во рамки на сесијата земјите членки на СТО упатуваат прашања до македонската делегација во однос на детали од различни домени во креираните политики во државата.
Во своето обраќање пред присутните шефот на делегацијата Делев, презентирајќи ги економските остварувања на Република Македонија, се осврна на политиката за макроекономска стабилност и зајакнување на конкурентноста на економијата, како и континуираните реформи во насока на подобрување на бизнис климата, привлекување на инвестиции и економски раст. Меѓу поважните спроведени реформи беа споменати Регулаторната Гилотина и РИА, Едношалтерскиот и ЕКСИМ системот, електронскиот систем на дозволи и лиценци, активностите на економските промотори, континуираниот дијалог со бизнис заедницата, регистарот на слободни индисутриски објекти.
„Од моментот на пристапувањето кон СТО, Република Македонија континуирано се стреми да биде земја со отворен и транспарентен трговски режим потполно компатибилен со правилата и барањата на СТО. Покрај сите предизвици и економски неизвесности, Македонија во процесот на реструктуирање на економијата ги следеше обврските кон СТО, почитувајќи ја важноста од слободна и фер трговија и интеграција во светската економија“, истакна Делев пред земјите членки на СТО./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.