Економија
Брисел даде зелено светло за спас на словенечките банки
Европската комисија во средата ги одобри словенечките мерки за доделување на државна помош на петте водечки банки во државата.
Потврдени се плановите за реструктуирање на Нова Љубљанска банка (НЛБ) и Нова кредитна банка Марибор (НКБМ), а привремено е одобрена помош за Абанка. Станува збор за три банки во мнозинска или претежно мнозинска сопственост на државата. Покрај тоа, одобрени се и мерките кои словенечката влада ги презема при контрола на ликвидацијата на двете приватни банки Фактор банка и Пробанка.„Денешните одлуки ќе ја зајакнат довербата во словенечките банки“, изјави во Брисел еврокомесарот за конкурентност Хоакин Алмуниа.Словенија со тоа доби зелено светло за докапитализација на банките, а во случај на НЛБ, НКБМ, Пробанка и Фактор банка и дозвола за пренос на нивните лоши побарувања на таканаречената лоша банка, додека во случајот со Абанка со пренос на нејзини лоши пласмани ќе мора да почека на конечна одлука на Европската комисија.Откако минатата недела беа објавени резултатите од стрес тестовите во 10 словенечки банки, словенечката централна банка и министерството за финансии објави дека трите најголеми банки, НЛБ, НКБМ и Абанка, ќе можат да пренесат 4,5 милијарди евра од своите лоши побарувања на лошата банка, при што нивната реална трансациска вредност ќе изнесува само 1,676 милијарди евра. Ревизијата на состојбата во банките покажа дека им недостигаат околу 4,8 милијарди евра.НЛБ од државата ќе добие 1,551 милијарди евра, за да се докапитализира, НКБМ 870 милиони, а Абанка 591 милиони евра. Покрај тоа, со 445 милиони евра Словенија ќе ги докапитализира Фактор банка и Пробанка. Станува збор за приватни банки кои пред три месеца беа пратени во постапка за контролирана ликвидација при штос е заштитени улозите на граѓаните.Најголемите државни банки до 2018 година ќе бидат приватизирани, но за возврат Европската комисија одобри давање на државна помош. Се смета дека со овој потег Словенија за сега избегнува ситуација во која би требала да бара меѓународна финансиска помош за своите банки. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.