Економија
Сараќини: За девет месеци од 2013 година, собрани околу 600 милиони денари од концесии
Министерот за економија Ваљон Сараќини и Македонската асоцијација на рударството (МАР) одржаа завршна средба за 2013 година, на која се дискутираше за остварените резултати во тековната година на полето на минералните суровини и очекувањата и планирањата за 2014 година во овој значаен индустриски сектор.
На средбата, на која се дискутираше и за Предлог законот за минерални суровини, министерот Сараќини истакна: „Имавме успешна година во секторот за минерални суровини, па во 2013 година се доделени 93 концесии за минерални суровини, што речиси е двојно повеќе од 2011 година, а отворени се 590 работни места, што е повторно безмалку двојно повеќе од минатата година, а само во првите 9 месеци од 2013 година имаме околу 600 милиони приход од концесискиот надомест, од кои општините добија околу 450 милиони, а во касата на државниот буџет се слеаја околу 130 милиони денари, а на 18 месецов определивме 53 нови локации за истражување и експлоатација“.
Споредено со истиот период од минатата година во индустриското производство во секторот Рударство и вадење на камен бележи пораст од 6.7 проценти. Според министерот за економија, овој сектор континуирано има позитивна стапка на раст на производството, што го прави еден од водечките сектори од индустриското производство и со учеството од 1,5 процент во бруто домашниот производ е од големо значење за македонската економија.
„Сакам да потенцирам дека во 2014 година не’ очекуваат многу повеќе заеднички средби за да ги чуеме вашите сугестии и предлози за уште подобро функционирање и поуспешни резултати. Во финални преговори сме и со Државниот архив во Белград, од каде ќе се земе геолошката документација, со што значително ќе се зголеми бројот на потенцијални наоѓалишта“, информираше министерот, додавајќи дека во Законот за минерални суровини ќе се предвиди и реномирани странски геолошки компании да можат да прават проспекциски геолошки истражувања, со што,ќе дојде до зголемување на бројот на рудни наоѓалишта и до темелно истражување на рудното богатство.
Сараќини истакна дека и во 2014 година ќе се продолжи со доделувањето на концесии за детални геолошки истражувања и експлоатација на минерални суровини на транспарентен начин со електронска аукција, а ќе бидат изготвени и подзаконските акти кои произлегуваат од Законот за минерални суровини. Уште една новина ќе биде донесувањето на Стратегијата за геолошки истражувања, одржливо искористување и експлоатација на минералните суровини, а ќе продолжиме со промоцијата на минералните ресурси со цел привлекување на инвестиции во деталните геолошки истражувања и експлоатацијата на минералните суровини.
На средбата министерот Сараќини го резервираше последниот петок во месецот за отворените прашања и предизвици со кои се соочуваат инвеститорите од овој значаен индустриски сектор.
Николајчо Николов, истакна дека на седницата, покрај тоа што ќе се разгледа Законот за минералните суровини, акцент ќе се стави на мерките кои треба да се донесат за да се подобрат условите за работа во секторот рударство, но и на тарифникот за наплата на концесискиот надоместок, со чие евентуално донесување би се зголемила вредноста на надоместокот./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.