Економија
ММФ предупредува на можност од повеќегодишен слаб раст
Глобалната економија можеби се наоѓа на патот на повеќегодишен период на слаб раст, предупреди челничката на Меѓународниот монетарен фонд (ММФ), Кристин Лагард во говорот од средата навечер во Вашингтон, пред редовното полугодишно заседание на ММФ и Светската банка.
Како што истакна Лагард, доколку не бидат преземени храбри мерки, светот би можел да падне во стапицата на ниските стапки на раст. Светската економија, оваа и следната години, ќе порасната повеќе до 3 отсто, но ризик претставуваат силните осцилации на пазарите и тензиите во врска со Украина, дополни челничката на ММФ: Лагард, исто така, повика и на воведување дополнителни мерки во борбата против ниската инфлација во еврозоната.
Во коментарот од четвртокот на BBC, се наведува дека ниската инфлација во еврозоната го предизвикува зголеменото ниво на резервните капацитети во економијата, коешто оттаму поради слабите инвестиции не се реализира во целост потенцијалот за рас, во споредна со САД и со Велика Британија. Во британската централна банка Bank of England проценуваат дека резервните капацитети на Велика Британија достигнуваат вредност меѓу 1 и 1,5 процент од бруто домашниот производ (БДП).
Јакнењето на еврото во однос на британската фунта и на американскиот долар од 2012 година, ги намалило, пак, трошоците на увозот во еврозоната, притискајќи ги цените на стоките. Оттаму, годишната стапка на инфлацијата во еврозоната во март 2014 година, според процените на европската статистичка агенција Eurostat, изнесувала 0,5 отсто.
Се стравува дека слабата инфлација би можела да им наштети само на назначеното економско заздравување на еврозоната и да ја придуши побарувачката на производи и услуги, бидејќи потрошувачите ќе очекуваат натамошен пад на цените. Ниската инфлација, исто така, значи и дека владите и компаниите потешко ќе ги отплатуваат своите долгови.
Оттаму, челничката на ММФ јa повика Европската централна бaнка (ECB) „дополнително да ја ублажи монетарната политика, вклучително и неконвенционалните мерки”. „Се надзира опасност од незначителна инфлација, особено во еврозоната. Потенцијално продолжениот период на ниска инфлација може да ги притисне побарувачката и производството, како и растот и вработувањето”, истакна Лагард.
Според неа, знаците за глобалната економија општо се позитивни во целина, но „без доволна политичка амбицираност светот би можел да падне во стапицата на нискиот раст во среднорочна перспектива”, предупредува челничката на ММФ./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.