Економија
ЕП изгласа неутралност на мрежата и укинување на роаминг услугите
Интернет провајдерите веќе нема да можат да блокираат или забават одредени услуги поради економски или други причини, стои во најновата одредба на Европскиот парламент (ЕП), содржана во Телекомуникацискиот пакет на ЕУ за 2014 година.
Европратениците гласале и за укинување на трошоците за роаминг услугите од една во друга земја на ЕУ, од 15 декември 2015 година се вели во соопштението на ЕП.
„Денешното гласање е сериозен чекор во насока на зајакнување на единствениот пазар на телекомуникации на ЕУ” , изјавил координаторката за Телекомуникацискиот пакет при ЕП, Пилар Дел Кастиљо, додавајќи дека „Европарламентот сака да ги отстрани роаминг трошоци за телефонски повици, СМС пораки и мобилен интернет до 15 декември 2015 година и сака да го подобри управувањето на спектарот за да се развие 4G и 5G мрежата во цела Европа”.
„Ние постигнавме дополнителни гаранции за зачувување на пристапноста до интернетот, потоа гаранции за можноста на корисниците да користат апликации и услуги по нивен избор, како и засилување на улогата на интернетот како основен двигател на конкурентноста, економскиот раст, вработувањето, социјалниот развој и иновациите” , рекла таа, откако нејзиниот извештај бил одобрен со 534 гласа „за” , 25 гласа „против” и 58 гласа „воздржани”.
Со новите одредби во Телекомуникацискиот пакет, интернет провајдерите ќе продолжат да имаат можност да нудат специјализирани услуги со повисок квалитет, како „video on demand” и исклучително важни за бизнисот „cloud” апликации, доколку тоа не е „штетно по достапноста и квалитетот на услугите за пристап до интернет”, понудени на други фирми или услуги.
Европратениците ја намалиле и листата на Европската комисија за „исклучителни” случаи, во кои провајдерите ќе имаат право да го блокираат или забават пристапот до интернет.
Според членовите на ЕП овие практики треба да бидат дозволени само кога станува збор за исполнување на судски налог, зачувување на безбедноста на мрежата или спречување на привремено оптоварување на мрежата.
Доколку се користат такви „мерки за управување на сообраќајот”, тие треба да бидат „транспарентни, недискриминаторни и пропорционални” и „не треба да се користат подолго отколку што е потребно” , сметаат европратениците.
Членовите на ЕП нагласиле дека пристапот до интернет треба да се обезбедува во согласност со принципот на „неутралноста на мрежата” , што значи дека се што е дел од интернет сообраќајот треба да се третира подеднакво, без дискриминација, ограничувања или надворешно мешање, независно од неговиот испраќач, примач, вид, содржина, уред, услуга или апликација.
Пратениците го прифатија и текстот со кој се наметнува забрана на роаминг трошоците ( дополнителни трошоци за телефонски повици, СМС пораки и мобилен интернет во друга земја членка) во рамките на ЕУ од 15 декември 2015 година, со предупредување дека доколку се констатираат злоупотреби со роаминг услугите, по исклучок ќе можат да бидат наметнати дополнителни трошоци./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.