Економија
Путин во 2013-та заработил многу помалку од претходната година и од повеќето советници и министри
Рускиот претседател Владимир Путин минатата 2013 година заработил многу помалку отколку претходната 2012 година и примал пониски плати од премиерот Дмитриј Медведев, но и од неговите советници и повеќето министри.
Според податоците за платите на руските функционери коишто во петокот попладнето ги објавија Кремљ и владата, претседателот Владимир Путин минатата седмица пријавил приход од 3,7 милиони рубљи, или 74 илјади евра, што е помалку од неговата заработка во 2012 година во износ од околу 5,8 милиони рубљи. Путин притоа е сопственик и на стан од 77 квадратни метри, а користи и стан од 150 квадратни метри, терен од 1.500 квадрати и гаража од 18 м2 и место за паркирање. Поседува и три автомобила, две раритетни „волги”(ГАЗ М21 и ГАЗ М21Р) и „нива”, и автомобилска приколка „скиф”.
Премиерот Дмитриј Медведев минатата година заработил, пак 4,3 милиони рубљи, или 85.800 евра, и исто така неговата плата вкупно била за 1,5 милиони рубљи помала отколку претходната година.
Така Путин во 2013 година примил помали плати од своите советници, вклучително и од портпаролот Дмитриј Песков, кој заработил вкупно 9,2 милиони руби, или 185 илјади евра, како и неговиот претставник во долниот дом од рускиот парламент Гари Минкх, кој заработил дури 50,7 милиони рубљи, или милион евра.
Во владата само тројца министри имаат плати пониски од Путин, и тоа министерот за земјоделство Николај Федоров, кој заработил вкупно 3,6 милиони рубљи или 73 илјади евра, министерот за телекомуникации Миколај Никифоров со годишна плата како и на Никифоров, и министерот за природни ресурси кој пријавил годишен приход од 3,5 милиони рубљи односно 71 илјада евра.
Во владата на Медведев највисоки примања има министерот задолжен за транспарентност на владата, Михаил Абизов, кој севкупно во 2013 година заработил 282 милиони рубљи или 5,7 милиони евра, како што стои во даночните пријави на врвните руски функционери./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.