Економија
Германија ја замрзна програмата за вработување на млади Европејци
Германија ја замрзна програмата за вработување на млади Европејци поради големиот интерес на млади од државите опустошени со кризата.
Министерството за труд објави дека е претрупано од пријави на заинтересирани, особено од Шпанија и Унгарија, за програмата за субвенционирано оспособување за вработување, како и структурното и професионално усовршување на младите од останатите европски држави во германските сектори во кои недостасува работна сила. „Моментно не можеме да ја задоволиме побарувачката за програмата под назив „Работа на мојот живот““, изјави портпаролката на министерството за труд.Германија, водечката европска економија, се најде на удар на критиките од партнерите од Европската унија поради пристапот кон должничката криза во еврозоната и акцентот на фискалната дисциплина.Берлин одговори со иницијатива за борба против невработеноста меѓу младите за да би можел да и помогне на „изгубената генерација“ во потрага за работа и да го реши недостигот на сопствениот пазар на работна сила во секторите како што се грижа за постари и гастрономија.Програмата е наменета за граѓаните од 18 до 35 години старост и првично би требало да трае до 2016 година, но дополнително беше продолжена до 2018 година.Учесниците на програмата добиваат финансиска помош за следење на курс по германски јазик во матичната држава и помош при разговорите за работа и селидба во Германија.Вкупниот планиран износ за оваа иницијатива од 400 милиони евра веќе потрошен, вклучувајќи и 48 милиони евра за оваа година, по што на интернет страницата на програмата MobiPro-Eu што ја води Сојузната агенција за труд (BAA) објавено е дека обработката на нови барања е прекината. Помеѓу јануари 2013 година и крајот на март 2014 година интересот за учество во програмата искажаа речиси 9.000 млади од цела ЕУ. Повеќето биле од Шпанија, кои испратиле околу 6.500 барања.„Тоа е над очекувањата“, стои на интернет страницата.Иако германската влада обезбеди дополнителни средства, нови кандидати не можат да бидат примени, се наведува на станицата, со напомена дека учесниците на програмата и натаму ќе ги примаат ветените субвенции.Потенцијалните учесници во текот на годината ќе бидат информирани дали постапката за примање на нови барања ќе продолжи, стои во соопштението. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.