Економија
Најбрз раст на јапонската економија за две ипол години
Јапонската економија во првиот годинешен квартал пораснала според најбрзата стапка во последните две ипол година, благодарејќи на порастот на личната потрошувачка и вложувањата на претприемачите.
Бруто домашниот производ (БДП) на оваа според обемот трета економија во светот пораснал во првото тромесечја од 2014 година за 5,9 отсто на годишно ниво. Во однос на претходниот квартал, растот на јапонската економија изнесувал 1,5 отсто, што е 1 отсто повеќе отколку што очекуваа аналитичарите.
Забрзувањето на растот на економија најмногу е резултат на јакнењето на личната потрошувачка, којашто сочинува околу 60 отсто од економските активности. Јапонските потрошувачи, имено, ги засилиле купувањата во пресрет на 1-ви април, кога стапката на данокот на додадена вредност (ДДВ) беше зголемена од 5 на 8 отсто. Станува збор за најбрзата стапка на раст на јапонскиот БДП од третиот квартал од 2011 година, кога оваа земја почна да заздравување од мартовскиот катастрофален земјотрес и гигантското цунами.
Во првите три месеца од годинава пораснале и капиталните вложувања, што долг период беше слабата точка на Јапонија, и тоа за 4,9 отсто. Нивниот раст би можел да ги зајакне надежите дека Јапонија оствари доволен залет да го надмине очекуваниот пад на активностите во вториот квартал по зголеменото ДДВ.
„Заработките на компаниите се подобруваат, а некои погони застареа, па дел од јапонските компании сметаат дека повеќе не можат да ги одложуваат капиталните вложувања. Сепак, притоа неиндустриските производители се многу поуверени во здравата состојба на економијата. Капиталните вложувања ќе продолжат да растат, но без инвестиции на индустриските производители нивното темпо на раст ќе биде постапно”, смета во Норио Нијагава, економист во „ Mizuho Securities Research&Consulting”.
Јакнењето на капиталните инвестиции би можела да биде охрабрувачка вест за јапонскиот премиер Шинзо Абе, кој сака јапонските корпорации да започнат да ги трошат своите натрупани резерви пари, кои се проценуваат на повеќе од 2.000 милијарди американски долари, како и да ги зголемат платите на работниците за економското заздравување да биде одржливо.
Меѓутоа, по силниот раст во првиот квартал, аналитичарите истакнуваат дека јапонската економија се соочува со ризиците во следното тримесечје, во прв ред од можноста на намалување на побарувачката на јапонските потрошувачи по зголемувањето на ДДВ-то. Така, проценуваат дека во вториот квартал од годинава јапонскиот БДП би можел да падне поради намалената лична потрошувачка, и тоа за околу 5 отсто на годишно ниво, а прота да се врати на умерените стапки на раст од околу 2 процента./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.