Економија
ЕБОР помага во обновувањето од поплавите во Босна и Херцеговина, Хрватска и Србија
Европската банка за обнова и развој (ЕБОР) подготвува кредитирање преку банките – партнери во износ од 500 милиони евра, со цел да го поттикне долгорочното кредитирање и приватните кредитори во Западен Балкан и Хрватска.
Средствата се обезбедени од Програмата за финансирање на Западен Балкан и Хрватска IV (WBFF IV), структуирани да ја задоволат потенцијалната побарувачка за дополнително финансирање како резултат за неодамнешните поплави во Босна и Херцеговина, Хрватска и Србија.
Европската унија, Светската Банка и Обединетите нации работат со владите на погодените земји од поплавите, со цел во наредните недели да подготват извештај за проценка на штетата.
WBFF IV ќе обезбеди кредитни линии како и акционерски влог, хибридни инструменти и гаранции на локалните банки и небанкарските финансиски институции во Албанија, Босна и Херцеговина, Хрватска, Македонија, Црна Гора и Србија за натамошно кредитирање на микро, малите и средните претпријатија (ММСП) и приватните позајмувачи.
Поддршката ќе биде наменета за проширување на неослужените или новите сегменти на финансиските сектори, како што се хипотеките, лизингот, факторинг и финансирање на потрошувачите. Се очекува Програмата да го поддржи финансирањето на локалните ММСП, бидејќи тие почнуваат да ги заменуваат и поправаат имотите оштетени од поплавите.
ММСП играат важна улога во регионот на Западен Балкан, но се соочуваат со ограничувања во пристапувањето до долгорочното финансирање. На пример, во Босна само 22 проценти од кредитите во приватниот сектор се достапни до локалните претпријатија. Ова претставува товар за проширување на постоечките операции и развојот на новите пазарни можности, кои ЕБОР плнаира да ги надмине.
„Програмата за финансирање на Западен Балкан е заснована на досегашниот успех на ЕБОР во поддршката на ММСП и зајакнување на финансискиот сектор на Западен Балкан и Хрватска. Програмата е многу ефикасна платформа за поддршка на неопслужените сегменти на пазарот, вклучувајќи ги и хипотекарните кредити и кредитирањето на ММСП. Од големо значење е зајакнувањето на приватните и финансиските сектори во регионот – особено сега, кога земјите како Босна и Херцеговина, Хрватска и Србија закрепнуваат од штетите на неодамнешните поплави“, истакна Хенри Расел, директор на одделот за Финансиски институции при ЕБОР./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.