Економија
Erste Card Club го презема работењето на Diners Club во Србија, Македонија и во Црна Гора
Договорот за купопродажба на сопственичкиот удел помеѓу компанијата SKB Capital S.A. од Луксембург и Erste Card Club d.o.o. (ECC), со седиште во Загреб, потпишан е во Белград.
Со тоа ECC се стекнува со 100 отсто сопственост над компаниите на Diners Club International Belgrade d.o.o. од Белград (DCI Belgrade) и Diners Club International Mak d.o.o.e.l. од Скопје (DCI Mak), а посредно и над компаниите Diners Club International Montenegro d.o.o. од Подгорица и DC Travel од Белград. Diners Club International, како давател на франшизата, ја поддржува трансакцијата и го одобрува преносот на лиценцата ECC, како и иден развој на брендот на Diners Club и деловното работење на овие пазари. Досегашното работење на трите наведени пазари опфаќа нешто повеќе од 40.000 издадени картички Diners Club, со вкупен промет од 90 милиони евра.
Согласно со договорот, ECC го презема ексклузивното право за издавање и прифаќање на Diners Club картичката, односно одговорноста за понатамошен развој на брендот Diners Club и идниот развој на подрачјето на Србија, Македонија и Црна Гора. Се очекува најдоцна до првиот квартал од 2017 година да се завршат трансакциите и да се изврши финално пренесување на деловните удели, откако ќе бидат исполнети формално-правните услови од самиот договор, како и издавање одобренија од сите регулаторни тела.
„Како најголем издавач во регионот, ECC на територијата на Србија, Црна Гора и Македонија ќе донесе нови платежни решенија од палетата на производи на Diners Club и со тоа ќе ја збогати понудата на пазарите на овие три земји. Предностите од спојувањето на франшизата на регионално ниво, како и големиот потенцијал за проширување на деловните можности и успеси, ќе ги почувствуваат сите учесници во бизнис-франшизата, како и нашите партнери. Беспрекорниот сервис и услуга на кој се навикнати клиентите во Србија, Црна Гора и во Македонија повеќе од една деценија од работењето на Diners Club во овие земји, ќе остане приоритет и во иднина, а на клиентите ќе им биде достапен поголем избор кога станува збор за производи, услуги и бенефиции за плаќање со картичките Diners Club“, истакна Обрад Сикимиќ по повод потпишувањето на Договорот за купопродажба, кој следните пет години ќе ја врши должноста претседател на Надзорниот одбор во DCI Белград. На чело на Diners клубовите на територијата на Србија, Црна Гора и на Македонија, Обрад Сикимиќ е повеќе од 25 години, кој во тоа време активно работеше на позиционирањето на брендот Diners Club во овие земји, односно на развојот на понудата на платежните услуги.
„Овој чекор е логично продолжение на нашата деловна стратегија, која има за цел да го зајакне регионалното присуство на подрачјето на Југоисточна Европа. Земајќи ги предвид резултатите од досегашното франшизно работење на овие пазари, веруваме дека со развиениот бизнис-модел ќе можеме да обезбедиме врвен квалитет на услуги на клиентите и долгорочно да остваруваме успешни деловни резултати“, додаде Марија Радониќ, заменик-претседател на раководството на ECC, која е задолжена за регионалното работење.
Erste Card Club d.o.o. е картична компанија со повеќе од 550.000 издадени кредитни картички во Хрватска, Босна и Херцеговина и во Словенија. Таа е дел од една од најголемите банкарски групации во Средна и во Источна Европа, Ерсте Групацијата, и нејзиниот партнер во овој регион, Steiermärkische Sparkasse од Грац. Покрај франшизата за Diners Club во Хрватска, која е една од 10-те најголеми и најуспешни во светот, ECC е сопственик и на Diners Club франшизата во Босна и Херцеговина и во Словенија, а присутна е и на пазарите во Унгарија, Бугарија и во Романија во сегментот на прифаќање на картичката./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.