Компании
Електричниот автомобил Volkswagen e-up претставен во Македонија
Електричен автомобил достапен е од средата за прв пат на македонскиот пазар. Станува збор за Volkswagen e-up кој беше промовиран во салонот на „Порше Македонија“, ексклузивен импортер за возилата од најголемиот европски производител.
Се работи за комплетно електричен автомобил кој не троши гориво и не испушта штетни гасови. Со него може да се минат 100 километри за 57 денари, според постоешката цена на електричната енергија во Македонија, поради што е прогласен за светски шампион на полето на ефикасноста.
Предвиденое автомобилот во Македонија да се продава по цена од 26.900 евра, а од „Порше Македонија“ се подготвени да ги направат првите нарачки.
Овој автомобил, кој важи за пријател на животната средина, се движи речиси без никаков звук.
„Порше Македонија пишува ново подглавје во мобилноста на македонскиот автомобилски пазар со нула емисии на штетни гасови. Нашиот долгорочен план го започнуваме со пет целосно електрични возила од Volkswagen и со тоа придонесуваме кон поздрава животна средина и максимално економична мобилност. Сите општествено одговорни институции, компании, здруженија и поединци можат во „Порше Македонија“ да најдат партнер од доверба во создавањето на мобилноста од иднината и поздрава животна средина,“ рече генералниот менаџер на „Порше Македонија“ Златко Муцунски.
Со e-up!, Volkswagen направи пионерски влез во сериско производство на возила со целосно електричен погон, автомобилот има четири седишта и гарантира удобно возење и безбедност. Возило е скроено за гратско возење, но е одличен избор и за подолгите патишта Тоа е автомобил за секојдневна употреба, со импресивно висок вртежен момент од 210 Nm. Volkswagen e-up! е тивок и не губи моќ при менување на брзините. Volkswagen e-up! има електричен мотор кој обезбедува максимална моќност од 60 kW / 82 КС, a тежи само 1.139 килограми. Автомобилот забрзува од 0 до 100 km / h за 12.4 секунди и ја постигнува максималната брзина која изнесува 130 км / ч. Со својата литиум – јонска батерија од 18.7 kWh, која има 8 години гаранција, при оптимални услови автомобилот може да помине приближно 160 километри. Тоа значи дека не го оптоварува семејниот буџет и троши само 57* денари на 100 километри.
„Volkswagen e-up! може да се полни со 2,3 kW приклучок на секој стандарден електричен приклучок со 230V. Приклучокот од 3,6 kW може да се инсталира во секој дом, додека пак за да се употреби приклучок од 40 kW потребна е станица за брзо полнење. Во вториот случај, батеријата се полни до 80% за помалку од 30 минути. Местото за полнење на батеријата е поставено на истото место како и кај стандардните модели, под поклопецот за гориво. Во идеален случај e-up! може да користи електрична енергија од обновливи извори и на тој начин ќе биде 100% CO2 неутрален“, изјави Александар Цветковски продукт менаџер во „Порше Македонија“ .
Од „Порше Македонија“ најавија дека утре во Скопје ќе отворен првиот јавно пункт за полнење на електрични автомобили.
Стилот на e-up! е суптилен и го изразува високиот квалитет. Една карактеристична и важна функција на надворешноста е закривениот изглед на LED дневните светла кои се поставени во предниот браник. Покрај тоа, предниот дел, праговите и подвозјето се аеродинамично оптимизирани. Volkswagen e-up! од надвор изгледа атрактивно со своите машински полирани 15-инчни алуминиумски тркала и со логото Volkswagen e-up! со сина позадина кое е поставено на задниот дел. Во внатрешноста e-up има карактеристични светло сиви прекривки на седиштата со шевови во сина боја. Специјална кожа и хромираните детали целосно се совпаѓаат со концептот на урбан електричен автомобил.
Volkswagen e-up! е прво електрично возило на производителот од Волфсбург, кој ги поставува стандардите во издржливоста на автомобилите, иновативниот дизајн и напредните технологии кои се еден чекор пред своето време. Автомобилот e-up! за првпат беше претставен на саемот во Франкфурт и ги воодушеви посетителите и експертите со својот уникатниот надворешен изглед, внатрешниот комфор, еколошкиот пристап и одличните перформанси. /крај/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
SEAT S.A. постигна историски рекордни финансиски резултати благодарение на двоцифрениот раст и ефикасноста на SEAT и успехот на CUPRA
“Кога станува збор за SEAT, ви ветувам дека најдоброто допрва доаѓа“
SEAT S.A. постигна историски рекордни финансиски резултати, благодарение на двоцифрениот раст и ефикасноста на SEAT и успехот на CUPRA
· Оперативната добивка на SEAT S.A. достигна рекордни 625 милиони евра, повратот од продажба достигна 4,4%, а прометот за минатата година се зголеми на 14,3 милијарди евра
· Нова инвестиција во брендот SEAT се новите освежувања на Ibiza и Arona, како и подобрувањето на Leon и Ateca
· Во 2024 година е планирано лансирањето на CUPRA Tavascan и CUPRA Terramar
SEAT S.A. ги претстави своите резултати за 2023 година заедно со својата стратегија за претстојните години. Минатата година, според Меѓународните сметководствени правила (МСФИ), оперативната добивка достигна рекордни 625 милиони евра, зголемувајќи се за 592 милиони евра (2022: 33 милиони евра). Ова претставува подобрување на повратот на продажбата од 4,1 процентен поен, од 0,3% на позитивни 4,4%. Годишниот промет исто така достигна историски 14,333 милијарди евра, 31,0% повеќе од 2022 година (10,941 милијарди). Овие резултати ја потврдуваат силата на компанијата и успехот на нејзината постојана стратегија за трансформација.
„Зад себе оставаме година во која SEAT S.A. ги објави најдобрите финансиски резултати во својата 73-годишна историја, осигурувајќи се дека нашата компанија продолжува на својот пат кон попрофитабилна иднина“, рече Вејн Грифитс, извршен директор на SEAT и CUPRA. „2023 година беше година на огромни контрасти за автомобилската индустрија, како и за нашата компанија, бидејќи продолживме да се движиме низ морето на несигурност додека ја претрпевме најголемата трансформација во нашата историја“.
„Во 2023 година, SEAT S.A. направи голем чекор на своето патување на трансформација: имавме за цел да направиме значително подобрување и тоа е она што успеавме да го направиме. Постигнавме рекорди на сите времиња во промет, оперативна добивка и оперативен готовински тек. Ова совршено ги одразува позитивните ефекти од растот на обемот на марката CUPRA и обновувањето на обемот на марката SEAT, како и важноста на напредокот што го постигнавме со нашата програма за подобрување на перформансите“, рече Дејвид Пауелс, потпретседател за финансии и ИТ во SEAT. С.А.
ИНВЕСТИЦИИ ВО БРЕНДОТ НА SEAT
Гледајќи во иднината, SEAT S.A. ја има поставено вистинската стратегија за да го одржи профитабилниот раст на компанијата. Брендот SEAT ќе игра клучна улога во ова и компанијата ќе лансира подобрени plug-in хибридни и штедливи автомобили на SEAT.
Arona и Ibiza ќе добијат подобрување во 2025 година, а во следните месеци, марката ќе лансира нова и подобрена верзија на SEAT Leon, со технички и технолошки надградби. Понатаму, Ateca ќе биде подобрен и неговиот животен циклус ќе се продолжи.
„Го враќаме брендот SEAT таму каде што припаѓа, продолжувајќи го двоцифрениот раст од минатата година со нови инвестиции во брендот и неговите модели. Исто така, разгледуваме што можеме да испорачаме во електричниот свет под брендот SEAT. Кога станува збор за SEAT, ви ветувам дека најдоброто допрва доаѓа“, додаде Вејн Грифитс.
(ПР)
Економија
„Зегин онлајн“ е најпопуларна е-продавница за здравје, нега и убавина за 2023 година
Во организација на Асоцијацијата за е-трговија на Македонија вчеравечер се одржа Ecommerce Awards, избор на најдобрите во македонската е-трговија.
Компанијата Зегин со е-продавницата www.zegin.com.mk беше номинирана во неколку категории, а го освои првото место во категоријата „Најпопуларна е-продавница за здравје, нега и убавина“, што претставува уште една потврда дека квалитетот, професионалноста, вложениот труд и љубов секогаш резултираат со успех.
Изборот на најдобрите е-трговци има за цел да ги препознае и награди најдобрите со што ќе придонесе за мотивација и охрабрување за уште подобра работа, да ја крене свеста за потенцијалот и да ја промовира е-трговијата, како и да ја зајакне конкурентноста и да охрабри унапредување на работењето кај постојните и идни е-трговци.
„Оваа награда, трета по ред претстаува уште еден доказ за успешноста на работењето на онлајн продавницата на Зегин- www.zegin.com.mk и е одлична мотивација за уште попосветена работа, поквалитетна понуда, како и позадоволни купувачи во иднина. Ви благодариме за лојалноста и довербата!“, велат од компанијата за наградата.
Манифестација за доделување на македонските Награди за е-трговија за 2023 година – E-commerce Awards, се одржа во присуство на членките на АЕТМ, поддржувачите и партнерите, жири комисијата и наградените е-трговци.
(ПР)
Економија
Тековните предизвици и можности на винските пазари и значењето на географските ознаки за македонското вино – теми во фокусот на регионалната конференција за вино
Како да се искористат актуелните трендови на глобалните вински пазари за подобро позиционирање на македонското вино, како да се зголеми препознатливоста на нашите вина, зошто е исклучително важно воведувањето географски ознаки на виното и какви придобивки ќе донесе овој процес. Ова се само некои од прашањата за кои се имаше дискусија на регионалната конференција за вино, што ја организираа здружението „Вина од Македонија“ и винарската визба „Тиквеш“, во соработка со Германското друштво за меѓународна соработка (GIZ).
„За да се зголемат продуктивноста и додадената вредност на домашната винска индустрија, нејзината конкурентност и вредноста на извозот, како и нејзината отпорност на тековните предизвици, вклучувајќи ги и ризиците од климатските промени, неопходни се големи вложувања во знаење, во нови технологии и дигитализација, во организација, окрупнување на лозјата и создавање ефикасни кооперантски односи, како и во воведување нови правила, стандарди и механизам за државна поддршка и поголема регионална соработка. Сето ова мора да се заснова на научен пристап користејќи ги искуствата на развиените земји, кои поминале низ оваа трансформација и може да ни помогнат да го оствариме она што е нашата главна задача – зголемување на извозот на квалитетно вино, кое ќе биде препознатливо и ценето од потрошувачите во светот“, порача во своето воведно обраќање на конференцијата претседателот на здружението „Вина од Македонија“, Светозар Јаневски.
Во рамките на конференцијата се одржаа три работни сесии на кои реномирани експерти од Универзитетот „Гајзенхајм“ во Германија, професорите Јон Ханф и Силвија Димер говореа за состојбите на глобалниот пазар на вино, за спецификите на посебните пазарни нишки во Европа и за значењето на правните и техничките услови за извоз на вино. Една од поважните пораки што ја потенцираа експертите се однесуваа на важноста на заедничкиот настап на компаниите на пазарот истакнувајќи дека ваквиот пристап може да креира ефективни резултати доколку секоја компанија настапи одговорно и самостојно покрај заедничките активности како кластер.
Поздравувајќи ја организацијата на оваа конференција, регионалниот советник за земјоделство во германската амбасада во Скопје, Франк Мулер, го нагласи значењето на соработката помеѓу здружението „Вина од Македонија“ и ГИЗ акцентирајќи дека за долгорочен одржлив развој на винската индустрија неопходна е соработка и со универзитетите бидејќи научниот пристап во воведувањето и примената на унифицирани стандарди за производство и пласман на висококвалитетно вино од регионот е повеќе од неопходен.
За најновите движења во интрарегионалната трговија со грозје и вино во рамките на Западен Балкан говореше и извршната директорка на здружението „Вина од Македонија“, Елена Младеновска-Јеленковиќ, која ја нагласи неопходноста од воспоставување заеднички вински бренд со загарантирано географски потекло како еден од клучните предуслови за зголемување на препознатливоста на овдешните вина од страна на потрошувачите на пазарите во ЕУ и пошироко.