Daily news
Земјоделците најавуваат блокади – и натаму ги бараат субвенциите
Банкарските сметки на земјоделците сè уште се празни. И денеска нема ни денар од субвенциите кои треба да им ги исплати државата. Тие за Макфакс најавија дека нема да протестираат. Велат дека ќе им остават време на надлежните да им ги исплатат парите.
Претседателот на Синдикатот на земјоделските производители Ристо Велков за Макфакс изјави дека земјоделците од Струмица, Битола, Кочани и Скопје ja разгледуваат можноста за блокада на патиштата и за поставување механизација пред државните институции и на крстосниците, доколку во догледно време не им бидат исполнети барањата. Велат, ако се толкува последната изјава на министерот за финансии, тие се убедени дека пари за нив во Буџетот нема. Освен тоа, тврдат дека им се вршат притисоци и закани за да не излезат на протести.
Од Министерството за финансии и натаму остануваат без коментар. Упатија на последните изјави на министерот за финансии Кирил Миноски кој рече дека исплатата зависи од ликвидноста на трезорот.
„Трезорот работи согласно на дневната ликвидност во зависност од тоа ќе се изврши планирање на средства и ќе се изврши исплатата“ – изјави првиот човек на финансии, Миноски.
Како причина за доцнењето на исплатата на субвенциите првично се наведуваше политичката криза и толкувањето на изборниот законик, но Министерството за земјоделство пред крајот на март излезе со соопштение во кое пишува дека извесно задоцнување во исплатата за 2015 година се должи на фактот што Министерството воведува дополнителни мерки кои произлегуваат од нарушувања на пазарот на земјоделските производи.
„Субвенциите за 2016 година треба да се исплатат најдоцна до 30 јуни 2017 година. Тука ќе го дадеме примерот за тутунот, чие производство беше лани, а откупот траеше до 15-ти овој месец, по што на тутунарите за реколтата 2016 во наредниот период ќе им бидат исплатени 25 милиони евра од Програмата за 2017 година“, соопшти Министерството за Земјоделство.
Пратеникот од СДСМ Љупчо Николовски од Собранието обвини дека ВМРО-ДПМНЕ со блокирањето на работата на Законодавниот дом ја загрозува егзистенцијата на земјоделците.
„Пратениците на ВМРО-ДПМНЕ и коалицијата немаат апсолутно никакво право, со блокадата на Собранието да ја загрозуваат егзистенцијата на земјоделците кои немаат добиено субвенции за ланската, но и претходните неколку години и тоа само да го сокријат криминалот и нафтениот бизнис на братучетската фамилија“, изјави Љупчо Николовски – пратеник Од СДСМ.
Според последните информации, Платежната агенција минатата недела до Mинистерството за финансии ги пуштила налозите за исплата на околу шест милиони евра за неисплатените субвенции. Според планот за исплата, прво се предвидени средства за субвенциите од 2015 година, а потоа и ланските. крај/мф/вм
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.