Вицепремиерот за економски прашања, Фатмир Битиќи, и министерот за финансии, Фатмир Бесими, присуствуваа на работна средба во Стопанската комора, на која се разговараше за неколку иницијативи од страна на Комората, усогласување на царинскиот тарифник со ЕУ, анализа на парафискалните давачки и прашањето за холдинг.

Вицепремиерот Битиќи истакна Владата има отворен пристап кон соработката со стопанските комори и дека тие се еден од клучните фактори не само како претставник и застапувач на потребите на бизнис-заедницата туку и како иницијатори и партнери во креирањето политики.

Министерот за финансии, Бесими, посочи дека главен предизвик на Владата и на Министерството во ковид-кризата е да се реагира со брзи и интервентни мерки за да им се даде поддршка на компаниите во справување со кризата предизвикана од глобалната пандемија, креирање мерки за ревитализација на економијата, а во исто време и создавање долгорочни системски мерки за поинтензивен и одржлив економски раст.

Од страна на претседателот на Стопанската комора на Македонија, Бранко Азески, беше истакнато дека соработката и комуникацијата со Владата е на многу високо ниво преку одржаниот голем број работни средби, притоа во рамките на платформата за јавно приватен дијалог се отворени многу стратешки теми, кои чекаа да бидат отворени повеќе од една деценија.

Според министерот за транспорт и врски, Благој Бочварски, изградбата на експресниот пат Штип – Кочани, како и експресниот пат од Штип до Радовиш, е пример како треба да се реализираат капиталните инвестиции во државата.

Бочварски, заедно со директорот на ЈП за државни патишта, Ејуп Рустеми, како и градоначалниците на општините Штип, Кочани, Карбинци и Чешиново-Облешево, изврши увид во изградбата на втората фаза од експресниот пат Штип – Кочани, делница Крупиште – Кочани.

„Овој дел од експреснот пат е со должина од 13,7 километри, а инвестицијата е со вредност од 18,2 милиони евра. Или вкупната должина на експресниот пат од Штип до Кочани е 28 километри за што инвестираме 37,3 милиони евра. Задоволни сме од фактот што граѓаните веќе ја возат првата делница од Три Чешми до Крупиште по нов, модерен и безбеден пат“, истакна Бочварски.

Директорот на Државни патишта, Ејуп Рустеми, истакна дека патот се очекува да биде завршен до крајот на оваа година.

„Вкупната ширина на експресниот пат е 11,4 метри, со две сообраќајни ленти од 3,5 метри, две ленти за принудно застанување од 2 метра и две рабни ленти од 0,20 метри, што значи дека овој патен правец ќе има четири ленти, по две коловозни и две ленти за застанување. Овој нов патен правец почнува кај месноста Три Чешми во Штип и се надоврзува на веќе завршениот автопат Миладиновци – Свети Николе – Штип. Идната максимална брзина на движење на експресниот пат меѓу Штип и Кочани ќе биде 110 километри на час“, изјави Рустеми.

Со изградбата на овој експресен пат се создава брза патна врска меѓу источниот и централниот дел на државата. Првата фаза од експресниот пат од Штип до Крупиште е изгардена и веќе пуштена во сообраќај.

Пратеничката на СДСМ, Даниела Маркоска, истакна дека Владата предводена од СДСМ останува посветена на градење развојна економија.

„Во таа насока е и петтиот економски пакет вреден 160 милиони евра, кој има цел спас на работните места, поддршка за домашните компании и подобрување на ликвидноста на стопанството. Продолжуваат грижата и помошта за регистрираните занаетчии и самостојните вршители на дејност за побрзо надминување на последиците од корона-кризата“, информира Маркоска.

Според неа, со мерката од петтиот пакет на регистрираните занаетчии ќе им се овозможи решенијата за аконтативно плаќање на персоналниот данок да им бидат намалени 50 % во 2021 година во споредба со решенијата од 2020 година.

Додаде дека ќе се обезбеди и финансиска поддршка за граѓаните преку продолжување на мерката за одложување плаќање данок на личен доход до 30 јуни 2021 година.

„Вредноста за оваа мерка е 15 милиони денари, а целна група се самостојните вршители на дејност, кои во согласност со Законот за данок на личниот доход беа ослободени од плаќање аконтации до 31 март 2021“, информира Маркоска.

Според неа, Владата ги одмина најтешките мигови и, како што рече, успеа да ја одржи економијата витална и динамична.