Македонија
Македонија и Албанија ја забрзуваат соработката во енергетиката
Меморандумот за соработка во енергетскиот сектор меѓу Македонија и Албанија ќе придонесе за побрза реализација на енергетските проекти од заемен интерес, констатираа во понеделникот во Тирана македонскиот министер за економија Беким Незири со албанскиот министер за енергетика и индустрија Дамјан Џикнури.
Меѓу темите за разговор меѓу двајцата министри акцентот беше ставен на проектот – 400 kV интерконективен далекувод Битола – Елбасан, проектот Луково Поле и Меморандумот за соработка во енергетскиот сектор меѓу Министерството за економија на Република Македонија и Министерството за енергетика и индустрија на Република Албанија, кој наскоро треба да биде потпишан од двете страни.
Министерот Незири објасни дека за интерконективниот далекувод меѓу Македонија и Албанија кој се предвидува да ги поврзува Битола и Елбасан се изработени Физибилити студија и Студија за влијанието врз животната средина, а во натамошниот период следува изработка на целокупната техничка документација како и обезбедување на заем за изградба на далекуводот, за што во завршна фаза се преговорите со ЕБОР за обезбедување на заемот. Инаку, вкупната инвестиција се проценува дека изнесува 68.100.000 Евра и тоа 43.500.000 Евра за македонската страна и 24.600.000 евра за албанската страна.
„Ние како држава сме заинтересирани што побрзо да се реализира овој проект, бидејќи со него Република Македонија ќе реализира 85 отсто од плановите за енергетско поврзување со соседните држави“, истакна Незири.
Министерот Џикнури го потврди интересот и од албанска страна за што поскоро приклучување на Албанија кон регионалниот енергетски систем.
„Република Албанија има големи водени ресурси и заедно со Република Македонија можеме да имаме одлична соработка на ова поле. Експерти од двете држави имаат редовни состаноци, а изградбата на овој далекувод овозможува ние, како мали држави, да бидеме активни на енергетскиот пазар, па на оваа тема разговарано е и со норвешките власти за можноста за имплементација на ’скандинавскиот модел’ во Западен Балкан“, рече албанскиот министер Џикнури.
Во делот на гасификацијата, министерот Џикнури потенцираше дека со оглед на фактот што овој процес е во напредна фаза во Република Македонија, Република Албанија е заинтересирани да го имплементира ’македонскиот модел’. „Во заеднички интерес е реализацијата на проектот ТАП, кој набрзо ќе почне со реализација во албанскиот дел, каде постои можност да се отвори крак кон Република Македонија, во што гледам одлична шанса за цел регион“, објасни Џикнури.
Министерот Незири изрази подготвеност од страна на Република Македонија за поврзување кон гасоводите кои нудат таква можност, нагласувајќи: „Енергетските интерконекции, вклучително и интерконекциите во делот на природниот гас меѓу овие две соседни земји, ќе придонесат за сигурноста на снабдувањето на потрошувачите со природен гас“.
Што се однесува до акумулацијата Луково Поле, министерот Џикнури доби уверување од својот македонски колега Незири дека реализацијата на овој проект може да започне дури по целосна поддршка од двете држави. Двајцата министри се договорија сите овие прашања да бидат детално анализирани и во рамки на работната група од двете држави, на заедничка средба кон крајот на овој месец во Скопје, а најавија и скорешно потпишување на Меморандум за соработка во енергетскиот сектор меѓу двете министерство, кој е во финална фаза.
Во текот на попладневните часови министерот Незири ќе оствари средба и со министерот за економски развој и претприемништво Арбен Ахметај, на која ќе се разговара за унапредување на соработката во делот на трговската размена и во сферата на туризмот, како и реактивирање на мешовитиот комитет меѓу двете држави./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.