Македонија
Незири во Дубаи: Македонија е најсигурна земја за странски инвестиции
Министерот за економија Беким Незири на денешната Министерска тркалезна маса на петтиот по ред Годишен инвестициски состанок во Дубаи, ги претстави политиките, мерките и активностите на Македонија во насока на привлекување и зголемување на странските инвестиции, како главна определба за остварување на економски раст.
„Република Македонија е привлечна за странските инвеститори пред сѐ поради добрата геостратешка локација и близината до европскиот пазар и до Турција, најниските даноци во регионот, поволностите во ТИРЗ-овите, ниските производни трошоци, расположливата едуцирана конкурентна работна сила, заштитата на инвестициите, како и поддршка на инвеститорите од страна на Владата на РМ, која е бизнис ориентирана“, рече Незири.
Тој истакнува дека изминатата 2014 година беше најуспешна во тој сегмент, овозможувајќи зголемување на извозот за 54 отсто за само една година во слободните зони, односно пласман на стоки во странство во вредност од 1,7 милијарди евра.
Министерот Незири потсети на меѓународните рангирања како доказ за успешноста на политиките во насока на економски раст, како што е најновиот извештај на „Дуинг бизнис 2015 година“, според кој Македонија е повторно меѓу лидерите во регионот, особено во делот на водење бизнис, додека според Извештајот „Плаќање даноци 2015“ земјата е позиционирана на седмо место од 189 земји, со што останува меѓу земјите со најниски даночни стапки во светот.
На прашањето дали постои простор за билатерални или мултилатерални договори кои нудат заштита на странските инвеститори, министерот Незири објасни дека законската регулатива обезбедува еднаква основа за странските инвеститори со домашните.
„Како членка во МИГА (Мултилатерална агенција за гаранција на инвестиции) од 1994 година, обезбедена е заштита на странските инвестициии од политички ризик и регулирани се постриктни заштитни стандарди за странските инвеститори, а досега Република Македонија има потпишано вкупно 39 билатерални Договори за поттикнување и взаемна заштита на инвестиции со други земји, од кои се ратификувани вкупно 35 договори. Присуството на многу светски познати компании, кои ја избрале токму Македонија за инвестирање е доказ повеќе за обезбедената сигурност на нивните инвестиции, фер третманот и еднаквите права за секој инвеститор, како и одличните услови понудени на странските компании“, потенцираше Незири.
На годинешнава средба на тема „Одржлив развој преку СДИ – Индуциран трансфер на иновации и технологија“, која е под патронат на Н.Е. Шеикот Мохамед Бин Рашид Ал Мактум, заменик претседател на ОАЕ, Премиер и Владетел на Дубаи, земаа учество претставници од 140 земји, кои дискутираа на многу горливи прашања, како што се политиката и потребните регулаторни рамки, балансирање на правата на интелектуална сопственост за ефективно искористување на СДИ, како средство да се постигне трансфер на технологии, трендовите за СДИ, поврзани со истражување и развој, како и привлекување и интегрирање на глобалните мрежи на знаење и нивната улога во поттикнување и привлекување на СДИ.
Министерот за економија на Обединетите Арапски Емирати, инж. Султан бин Саед Ал Мансури, на средбата истакна: „Посебно сме горди како домаќини на овој собир, каде што се присутни и креатори на одлуки, но и инвестициски експерти, при што акцентот го ставаме на жешките инвестициски дестинации во светот. А тоа што мене посебно ме радува на овој 5. петти по ред Годишен инвестициски состанок е враќањето на оптимизмот на глобалната економска сцена, после повеќе од 5 години застрашувачки економски предизвици. Според повеќето аналитичари, предвидувањата се дека глобалниот БДП ќе порасне и до 3,3 отсто во 2015 година, што е знак дека глобалната економија заздравува и дека инвестициите ќе бараат нови атрактивни пазари“.
Во рамки на инвестицискиот состанок, кој ќе заврши на 1 април годинава, се одржува и голем светски саем со повеќе од 500 изложувачи од различни сектори, како од земјоделско- прехрамбената индустрија, преку телекомуникациите, до медицинската технологија. /крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.