Македонија
Патувачкиот гуру ја скенира Македонија
Перси вон Липински, поранешен дипломат, наградуван новинар на американската телевизиска мрежа CNN, попознат уште и како „патувачки гуру“ а во последните години дел од холивудското студио Universal како „ловец на атрактивни локации“ деновие престојува во Битола заедно со екипата која наредните денови низ цела Македонија ќе снимаат промотивни филмови за Македонија.
„Досега ова беше прекрасно патување, турата е прекрасна Кристијан (Џамбазовски, директорот на Агенцијата за промоција и поддршка на туризмот), ни помогна околу организацијата. Почнавме во Скопје, тргнавме низ земјата, сега сме во Битола, каде забележавме огромен потенцијал за туризам тука, многу е добро“, вели Перси Липински, новинар и продуцент. Неговата екипа во Битола пристигна во вторникот. „Бевме кај Пеце Цветковски, во вила Дихово, се запознавме со Слоу фуд, сместени сме во прекрасен хотел и знаете што – бевме во казино вчера и изгубивме. Вие победивте, а ние изгубивме, вели Липински.Средата им започна со скенирање на Старата битолска чаршија. „Си купив очила и капа, и мислам дека тоа таму го правеле неколку стотици години, не продавале очила, но нешто друго сигурно. Јадевме многу добра храна, доручек, ручек и вечера, искусивме многу топла гостопримливост. Кога патувате, се разбира дека зградите и архитектурата е она што го гледате, но она што навистина го искусувате се луѓето. Тука има навистина прекрасни луѓе, на секој чекор. Ни помагаат, не знаат кои сме, ние им изгледаме како просечни луѓе, не нé третираат како да сме посебни луѓе, тие нé третираат онака како што се однесуваат со сите, може да се почуствува тоа во околината“, вели Липински.Екипата го посети и музејот во Битола, каде беа примени од раководството и добија подароци, промовирачки материјал за градот под Пелистер. Хо искажаа своето одушевување од големината на музејот и со нетпрпение чекаа да видат што се нуди. Самиот Липински вели дека многу се интересира за историјата и корените на народите и земјите.„Македонија ја нарекувам Швајцарија на Балканот, ги имате сите овие култури, сите доаѓаат од различни страни, тука препознав дел и од моите корени, имам руска и хрватска крв. Еве ова овде е балканска вена“, рече Липински кој е одушевен и од Широк Сокак.Следните дестинации на неговиот тим се Хераклеја и Пелистер. „Јас тука носам две капи, една е мојата капа за туризам која ја носам како промотор на туризмот. Ги знам луѓето од овој бизнис, работев за CNN долги години, бев главен новинар кој патуваше низ земјите и ме викаа патувачки гуру. Сум бил во многу земји, кога ја споредувам Македонија, таа е на високо место. Кога одиме во земјата ги гледате луѓето, храната, културата, историјата, сите тие работи комбинирани во едно место. Вие го имате сето тоа во Македонија. Некогаш велиме, помалото е подобро, не мора да биде колку Русија, со цела почит кон Русија, може да бидете мала земја и да имате многу да понудите, бидејќи од едно до друго местос се стигнува многу брзо, неколку часа до Охрид, до Скопје. Она што мене ми се допаѓа е што имате многу различни култури и јадења, во една релативно мала земја“, заклучи Липински.Агенцијата за промоција и поддршка на туризмот од 24-ти до 10-ти септември организира инфо тура за Липински, репортер, новинар, продуцент, преку која ќе се запознаат со природните и културните убавини на нашата земја. Липински заедно со својот тим на соработници ќе снимаат петнаесет кратки промотивни филмови за Македонија кои ќе се емитуваат на пет странски јазици на YouTube, ќе бидат промовирани на социјалните мрежи ширум светот и на познати светски медиуми, меѓу кои и CNN./крај/мф/мб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.