Македонија
Потпишани девет меморандуми на македонско-унгарската Мешовита комисија за економска соработка
Македонија и Унгарија потпишаа вкупно девет меморандуми за дефинирање на нови можности за соработка и заемна поддршка во областа на здравствената индустрија, заштита на потрошувачи и надзор на пазарот, авио навигацијата и друго.
Меморандумите беа потпишани за време на третата седница на Мешовитата македонско-унгарска комисија, во рамки на Договорот за економска соработка меѓу македонската и унгарската Влада, која се одржа во четвртокот во Будимпешта.
Македонската делегација ја предводи Анета Димовска, државен секретар во Министерството за економија, а унгарската делегација беше предводена од државниот секретар за економска дипломатија во Министерството за надворешни работи и трговија, Левенте Маѓар.
На Мешовитата комисија ѝ претходеа состаноци на вкупно седум работни групи, и тоа за енергетика, туризам, развој на мали и средни претпријатија, заштита на потрошувачи, здравство, земјоделство и авио сообраќај, кои се одржаа во текот на претходниот ден.
Со цел продлабочување на економските односи меѓу Република Македонија и Унгарија, паралелно со седницата на Комисијата, се одржа економски форум и Б2Б средби помеѓу македонските и унгарските фирми од различни сектори.
На отворањето на форумот, Димовска ја поздрави политичката поддршка од Унгарија и залагањето за унапредување на економските релации меѓу двете земји. Димовска истакна дека Владата на Република Македонија е цврсто определена за унапредување на условите за водење на бизнис и привлекување на инвестиции и, во таа насока, ги охрабри унгарските компаниите да воспостават што поактивна деловна соработка со македонски фирми. За натамошна поддршка на бизнис секторот, македонските комори на маргините на Мешовитата комисија потпишаа протоколи за соработка со државните и регионални унгарски комори.
Во рамки на Третата седница на комисијата, Димовска и Маѓар изразија задоволство од досегашната соработка и остварените резултати во последните години, истакнувајќи дека проектите за кои се разговараше на состаноците на работните групи се заеднички иницијативи за продлабочување на соработката и ќе овозможат натамошен раст на билатералната економија.
Инаку, трговијата на Македонија со Унгарија за осумте месеци во 2015 година изнесува 57 милиони евра и остварен е раст од 11,4% во однос на истиот период во 2014 година. Вкупната размена во 2014 година е 76,8 милиони евра и остварен е раст од 60,4% во однос на 2013 година./крај/мф/ап/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.