Македонија
Презентирани поволностите за инвестирање во Македонија на бизнис форум во Франкфурт
Премиерот Никола Груевски и владина делегација во вторник во Франкфурт, СР Германија, присуствуваа и се обратија на бизнис форум за презентација на поволностите за реализација на странски инвестиции и отворање на нови работни места.
На бизнис форумот присуствуваа претставници на 40 компании од областа на автомобилската индустрија, електрониката, информатичко – комуникациските технологии, и од други производствени и услужни дејности.
Премиерот Груевски во своето обраќање ги образложи владините мерки и политики кои обезбедуваат поддршка на компаниите, раст на нивната дејност со приоритетна цел за поттикнување на вработувањата и намалување на невработеноста. Тој ги образложи и погодностите за реализација на странски инвестиции, кои се огледаат преку нискиот данок на персонален доход и данок на добивка од само 10%, на едуцираната и квалификувана работна сила и на даночните олеснувања кои се обезбедуваат во технолошко – индустриските развојни зони.
„Ние сме Влада која е целосно концентрирана на економијата, на добрата бизнис клима и ги охрабруваме домашните и странските инвеститори да направат чекор во инвестирање и отворање на нови работни места. Нашиот втор најголем предизвик, освен смирување на односите со Грција околу членството во ЕУ и НАТО, ни е невработеноста. Кога стапивме на власт во 2006 година, невработеноста беше екстремно висока и изнесуваше 38%. Се уште е висока, но е намалена за 10%. Поминавме тежок период, глобална криза, Европска должничка криза, па во најголем дел од земјите во ЕУ и општо во Европа, невработеноста растеше. Во овој тежок период, во Македонија успеавме да ја намалиме невработеноста на околу 28%, што е успех во таков тежок период. Најважно е што Македонија е земја со најниски давачки за водење бизнис во Европа. Не само даноците, општо сите трошоци во земјата се најниски во Европа“, истакна премиерот Груевски пред присутните инвеститори.
Вицепремиерот Пешевски истакна дека организирањето на бизнис форум во Франкфурт, кој е еден од главните економски центри на Германија, е од значење за привлекување на нови странски инвеститори во нашата земја, особено доколку се земе предвид дека германските компании се компании кои имаат голем потенцијал за ширење на своето производство, а некои од нив веќе и инвестираат во Република Македонија.
Тој во своето излагање се задржа на претставувањето на концептот на слободни зони за привлекување на инвестиции.
„Ја отворивме можноста не само за инвестиции во делот на производството, каде што Македонија е една од најатрактивните дестинации од аспект на трошоците, туку и во останатите услужни сектори бидејќи ние го продолжуваме развојот на овој концепт на слободни зони и во делот на информатичките технологии и во делот на туризмот и во делот на здравството. Мислам дека интересот беше задоволувачки, имаше доста прашања и за време на презентациите и по презентациите и веруваме дека со неколку од нив ќе оствариме директни посети во Македонија што, се разбира, е основа за поконкретни инвестиции понатаму“, истакна вицепремиерот Пешевски.
Присутните бизнисмени дадоа позитивни оценки за презентираните поволности. Тие истакнуваат дека со условите кои се овозможуваат се зголемуваат можностите компаниите сериозно да сметаат на Република Македонија во делот на правењето на анализи за ширење на капацитетите и за инвестирање.
„Даночните олеснувања и субвенциите кои се даваат за изградба на фабрики на странски инвеститори, се доста атрактивни и многу сме задоволни од бизнис условите кои ги нуди Република Македонија“, изјави Франк Микаелис, менаџер на компанијата „Аконплас“.
Инес Анра, бизнис партнер во компанијата „Аконплас“ истакна дека нејзината компанија сериозно размислува за инвестирање во нашата земја.
„Претставници од нашата компанија веќе беа во посета на Македонија во септември годинава. Веруваме во условите кои ги слушнавме на презентацијата и ги видовме на лице место. Погледнавме неколку фабрики кои се изградени од странски инвеститори. Патот не води кон Македонија и голема е веројатноста дека ќе отвориме своја фабрика, најпрво браунфилд, па потоа и гринфилд. Во јануари идната година планираме повторно да ја посетиме Македонија“, изјави Анра.
Присутните бизнисмени сметаат дека ваквиот начин на презентација во голема мера ги доближува можностите до потенцијалните инвеститори.
„И пред да дојдам, знаев дека Македонија има добра клима за инвестирање. Човек не може да шета по земјите и сам да се распрашува, но ги гледаме извештаите на компаниите кои инвестирале тука, ја гледаме искреноста зад поддршката која ја нуди вашата Влада. Затоа многу ми значи што дојдов тука и што добив информации“, изјави Хасан Кара од Стопанската комора во Франкфурт.
Министерот Самак во своето излагање пред присутните ги претстави компаративните предности за инвестирање во Република Македонија, задржувајќи се на можностите за инвестирање во автомобилската индустрија.
Директорот Мизо истакнувајќи ги поволностите во технолошко – индустриските зони, ја истакна подготвеноста на Дирекцијата за инфраструктурна и логистичка поддршка за реализација на потенцијалните инвеститори. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.