Економија
MOT: Пандемијата ги зголеми невработеноста и сиромаштијата ширум светот
Кризата на пазарот на трудот предизвикана од глобалната пандемија од Ковид-19 сè уште не е завршена, а растот на вработеноста во светот нема да може да ги надомести претрпените загуби до 2023 година, ова е последната проценка на Меѓународната организација на трудот (МОТ).
Според предвидувањата, загубите на работни места предизвикани од светската криза во тековната година ќе достигнат 75 милиони, додека во 2022 година тие ќе паднат на 23 милиони работни места.
Како последица на тој тренд, стапката на невработеност во светот се очекува да биде 5,7 проценти во 2022 година, или 205 милиони работоспособни луѓе, што е значително повеќе од 187 милиони во предпандемиската 2019 година.
Најголеми загуби на работното време во првата половина на 2021 година претрпеа регионите на Латинска Америка, Европа и Централна Азија. Во тие делови на светот се проценува дека загубите на работно време надминуваат осум проценти во првиот и шест проценти во вториот квартал, во споредба со глобалните загуби на планетите од 4,8 и 4,4 проценти, соодветно, во првиот и вториот квартал.
Се предвидува дека заздравувањето на глобалното вработување ќе се забрза во втората половина на 2021 година, под услов да не се влоши состојбата со пандемијата. Закрепнувањето ќе биде нерамномерно поради нееднаквиот пристап до вакцини и ограничениот економски капацитет на земјите во развој за поддршка на мерките за фискален стимул. Покрај тоа, квалитетот на нови работни места веројатно ќе се влоши во тие земји, се вели во извештајот на МОТ.
Падот на вработеноста и вкупниот обем на работно време предизвикаа нагло опаѓање на приходот од работна сила и зголемување на сиромаштијата. Во споредба со 2019 година, дополнителни 108 милиони работници ширум светот се категоризираат како сиромашни и екстремно сиромашни, што всушност значи дека тие и нивните семејства живеат со дневни примања помали од 3,20 американски долари по лице.
Како што се наведува во извештајот, нема забележан глобален напредок во искоренувањето на сиромаштијата во последните пет години, а тоа ја прави неостварлива целта на Обединетите нации за искоренување на сиромаштијата до 2030 година.
Кризата предизвикана од пандемијата „Ковид-19“ ги погоди ранливите работници, се вели во извештајот на МОТ.
Кризата несразмерно ги погоди жените. Нивното вработување во 2020 година падна за пет проценти во споредба со 3,9 проценти кај мажите.
На глобално ниво, вработеноста кај младите исто така опадна за 8,7 проценти во 2020 година, во споредба со 3,7 проценти кај возрасните, а најизразен пад е забележан во средно развиените земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.