Економија
На Волстрит S&P 500 падна седми ден по ред
На Волстрит во средата индексот S&P 500 падна седми ден по ред поради несигурноста во врска со претседателските избори во САД и можното зголемување на каматните стапки на американската централна банка Federal Reserve (Fed) .
И на европските берзи цените на акциите во средата паднаа. Лондонскиот FTSE индекс ослабе за 1,04 отсто, на 6.845 поени, додека франкфуртскиот индекс DAX се лизна за 1,47 проценти, на 10.370 поени, а парискиот индекс CAC се лизна за 1,24 отсто, на 4.414 индексни поени.
Индексот Dow Jones ослабе за 0,43 отсто, на 17.959 поени, додека S&P 500 индексот се лизна за 0,65 проценти, на 2.097 поени, а индексот Nasdaq падна за 0,93 отсто, на 5.105 индексни поени.
Со тоа S&P 500 индексот се лизна седми ден по ред, првпат по 7-ми јули годинава, и потона под нивото од 2.100 индексни поени.
По дводневната седница, челниците на Fed одлучија во средата да ги остават клучните каматни стапки непроменети, што и беше очекувано и од вложувачите и од аналитичарите. Порачаа, исто така, дека економијата во САД фаќа замаец, како и дека бројот на новите работни места солидно се зголемува и дека се оптимистични по прашањето на растот на инфлацијата кон целените 2 отсто.
Одлуките и пораките на Fed главно се во согласност со очекувањата на вложувачите. Никој не очекуваше дека централната банка на САД ќе ги зголеми каматите уште сега, но сé по извесно е дека тоа ќе го стори во декември.
Челниците на Fed, во суштина, порачаа дека е можно зголемување на каматите во декември, доколку продолжи растот на економијата. „Оттаму, во пораките на Fed навистина нема ништо невообичаено. Пазарот сега е фокусиран на претседателските избори и техничките показатели“, велат од компанијата „Аlan B. Lancz & Associates“.
Вниманието на пазарот е последица од загриженоста на вложувачите во САД на 8-ми ноември. Анкетите покажуваат дека трката меѓу демократската кандидатка Хилари Клинтон и републиканскиот кандидат Доналд Трамп е сé понеизвесна откако FBI повторно ја отвори истрагата за тоа дали Клинтон како државна секретарка ја користела приватната електронска пошта за службена преписка и дали таа пошта содржи доверливи информации. Пазарот ја преферира Клинтон, бидејќи смета оти победата на Трамп ќе предизвика несигурност по прашањата за внатрешната, надворешната и економските политики.
И во средата, како и ден претходно, најмногу паднаа цените на акциите во секторите на недвижнините, телекомуникациите и комуналиите, кои се најчувствителни на движењата на каматите. Остро паднаа, за 1 отсто, и цените на акциите во енергетскиот сектор, што е последица на падот на цените на нафтата./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.