Ормускиот теснец повторно е отворен по договорот меѓу Иран и САД, но аналитичарите предупредуваат дека светот веќе се соочува со сериозен недостиг на нафта поради четиримесечниот прекин на испораките од Блискиот Исток.

Според компанијата Kpler, во тој период глобалниот пазар изгубил околу 1,15 милијарди барели нафта, додека стратешките резерви ширум светот паднале на најниски нивоа во последните децении.

Иако цените на нафтата значително се намалија по најавата за договорот со Иран, дел од аналитичарите сметаат дека падот е прерано голем. Причината е што ќе бидат потребни месеци за целосно обновување на транспортот и производството на нафта низ Ормускиот теснец.

Експертите предупредуваат дека резервите и понатаму ќе се трошат додека пазарот не се стабилизира, што може повторно да ги зголеми цените во наредните недели и месеци.

Од друга страна, некои аналитичари веруваат дека дополнителното производство од земјите на ОПЕК и постојните залихи ќе помогнат да се избегне поголем ценовен шок и постепено да се нормализира пазарот.

Цените на нафтата денеска значително паднаа на меѓународните пазари и се спуштија под 80 долари за барел, откако САД и Иран постигнаа договор за рамката на преговорите за завршување на војната и најавија отворање на Ормутскиот Теснец.

Американскиот претседател Доналд Трамп соопшти дека е финализиран меморандум за разбирање кој треба да биде потпишан во петок, по што би следувало отворање на Ормутскиот Теснец и укинување на американската поморска блокада на иранските пристаништа.

Договорот го потврди и иранскиот Врховен совет за национална безбедност, кој соопшти дека по потпишувањето на документот ќе почне процесот на отворање на теснецот.

Според иранската агенција Тасним, во меморандумот е вклучен 60-дневен мораториум за наплата на надоместоци за пловилата што минуваат низ Ормутскиот Теснец. По истекот на рокот, Иран планира да наплатува поморски услуги, додека САД очекуваат теснецот да остане отворен без дополнителни давачки.

Американскиот потпретседател Џеј Ди Венс изјави дека овие прашања ќе бидат разгледувани во претстојните технички преговори.

Германската економија веќе денес очајнички бара квалификуван кадар, но поради забрзаното стареење на населението овој проблем во наредните години би можел да прерасне во сериозен економски предизвик.

Според најновата студија на Институтот за германска економија (IW), недостигот на работна сила ќе биде значително поголем отколку што се предвидуваше досега.

Новите прогнози покажуваат дека Германија се соочува со историски дефицит на работници, што би можело сериозно да влијае врз стабилноста на најголемата европска економија.

Студијата издвојува три клучни показатели:

• До 2036 година на германскиот пазар на труд ќе недостигаат околу 4,3 милиони работници, што е значително повеќе од прогнозата од пред две години, кога се споменуваа три милиони.
• Демографските проекции покажуваат дека до 2045 година во Германија ќе живеат околу 81,1 милион жители, што е за 2,9 проценти помалку од денес.
• Вкупниот потенцијал на работната сила ќе се намали за 6,9 проценти до 2036 година – од 55 милиони лица во 2025 година на 51,2 милиони.
  Странците губат интерес за Германија

Како главна причина за ваквите прогнози, експертите од IW ги наведуваат значително пониските стапки на доселување во споредба со претходните економски модели.

Германија, која со децении важеше за ветена земја за работници од целиот свет, сè побрзо ја губи својата привлечност на глобалниот пазар на труд, пренесува „Феникс магазин“.

Клучна причина за намалениот интерес е долготрајната слабост на германската економија, како и сè поголемите структурни проблеми на пазарот на труд. Многу странски стручњаци денес избираат други дестинации, што дополнително го отежнува пополнувањето на работните места.

Споредбата со прогнозите од пред само неколку години покажува колку брзо се влошиле трендовите. Проекцијата од 2024 година, која предвидуваше умерен економски и демографски раст до 2040 година, повеќе не се смета за реална.

Во извештајот се наведува дека до 2036 година работоспособна возраст ќе достигнат само 9,8 милиони жители, што нема да биде доволно за да го надомести големиот бран пензионирања.

На подолг рок, до 2045 година потенцијалот на работоспособното население ќе се намали за 8,3 проценти и ќе изнесува околу 50,4 милиони луѓе.

Доколку овие прогнози се остварат, германските компании би можеле да бидат принудени на сериозни промени во работењето, затворање на дел од производствените капацитети или преселување на производството во други земји, пренесе „Б92“.