Американскиот министер за енергетика Крис Рајт изјави дека администрацијата на Доналд Трамп разгледува можност за привремено укинување на федералниот данок на гориво со цел да се намалат цените на бензинските пумпи.

Според него, Белата куќа анализира повеќе мерки за стабилизација на пазарот, меѓу кои користење на стратешките резерви на нафта, измени на регулативите за летните мешавини на бензин и барање до рафинериите да го скратат одржувањето за да нема прекини во производството.

Рајт рече дека стабилизацијата на цените ќе зависи и од состојбата во Ормускиот теснец, кој Иран практично го затвори по израелско-американските напади во февруари.

Тој претходно изјави дека цените на горивото во САД веројатно нема да паднат под три долари за галон пред 2027 година, што предизвика реакција од Трамп, кој оцени дека таквата прогноза е погрешна.

Цените на нафтата нагло пораснаа откако се појавија извештаи дека САД се подготвуваат за продолжена блокада на Иран, при што глобалната референтна цена на нафтата Брент надмина 120 долари за барел – највисоко ниво од средината на 2022 година.

Како што пренесува Би-Би-Си, раководители на енергетски компании, меѓу кои и директорот на „Шеврон“, Мајк Вирт, во вторникот се сретнале со американскиот претседател, Доналд Трамп во Белата куќа за да разговараат за ублажување на последиците од конфликтот врз американските потрошувачи.

Трговците со нафта тој состанок го протолкувале како сигнал дека американскиот притисок врз Иран и ограничувањата во Ормутскиот Теснец би можеле да траат подолго.

Според претставник на Белата куќа, на состанокот се разговарало за домашното производство на енергија, состојбите во Венецуела, терминските договори за нафта, природен гас и поморски транспорт.

Овие информации следуваат по извештај на „Волстрит журнал“ дека Трамп им наредил на своите соработници да се подготват за продолжување на актуелната блокада на иранските пристаништа со цел дополнителен притисок врз економијата на земјата.

Цената на нафтата силно осцилира од почетокот на конфликтот, бидејќи пловидбата низ Ормутскиот Теснец е сериозно нарушена и драстично ограничена. Низ овој стратешки морски премин вообичаено се транспортира околу една петтина од светската нафта и течен природен гас.

Иран претходно предупреди дека секој брод што ќе се приближи до теснецот ќе се смета за цел, по што САД соопштија дека нивните сили ќе пресретнуваат или враќаат пловила што патуваат кон ирански пристаништа или од нив.

И покрај осцилациите во изминатите недели, цената на нафтата останува значително повисока отколку пред конфликтот.

Во меѓувреме, иранската економија се соочува со продлабочена криза. Според Статистичкиот центар на Иран, годишната инфлација достигнала 53,7 проценти, додека националната валута – ријалот – паднала на рекордно ниско ниво.

Иранската влада минатата недела соопшти дека околу два милиони Иранци директно или индиректно останале без работа како последица на војната.

Светска банка прогнозира дека цените на енергенсите во 2026 година може да пораснат за 24 проценти, на највисоко ниво од руската инвазија врз Украина во 2022 година, доколку најтешките нарушувања предизвикани од војната во Иран завршат во мај, пренесува Би-Би-Си.

Британската нафтена и гасна компанија BP објави повеќе од двојно поголем профит во првите деловни резултати по избувнувањето на војната со Иран, благодарение на растот на цените на енергенсите на светскиот пазар.

Референтните цени на нафтата нагло пораснаа од почетокот на март, откако нападите доведоа до практично затворање на Ормускиот теснец – клучна поморска рута низ која поминува околу една петтина од светската нафта и течен природен гас.

BP е меѓу најголемите добитници од ваквите движења, заедно со другите нафтени гиганти. Резултатите за првите три месеци од финансиската година покажуваат дека основната добивка достигнала 3,198 милијарди долари (2,366 милијарди фунти).

Тоа е дури и подобро од очекувањата на аналитичарите, кои предвидуваа раст на околу 2,7 милијарди долари (1,99 милијарди фунти). За споредба, во истиот период претходната година добивката изнесувала 1,381 милијарда долари (1,021 милијарда фунти).

Од компанијата јасно истакнаа дека растот на добивката е директно поврзан со повисоките цени на нафтата, наведувајќи дека резултатот „одразува исклучително успешно тргување со нафта“.

И покрај растот на заработката, производителите на фосилни горива и натаму подлежат на посебен данок на вонредна добивка, воведен по руската инвазија врз Украина, кога одредени енергетски компании остварија рекордни профити.