Свет
Еврозоната првпат дебатираше за сценарио на грчко неплаќање долгови
Претседателите на владите на членките од еврозоната првпат официјално дискутираше за можното сценарио со неплаќањето на долговите од страна на Грција во рамките на подготовките на состанокот на министрите за финансии следната седмица, изјавија во петокот неколку функционери за Reuters.
Во рамките на подготовката за состанокот на министрите за финансии на земјите членки на еврозоната следната седмица, претставниците на владите заклучиле во четвртокот навечер во Братислава дека постојат три сценарија за Грција на крајот од јуни, Според нив, најмалку веројатно е сценариото според коешто Грција и доверителите следната седмица ќе постигнат договор и така ќе го овозможат навременото завршување на правните процедури до крајот на јуни.
Второто сценарио предвидува повторено продолжување на актуелната програма за кредитирање која истекува до крајот на јуни, токму во времето кога Грција мора да врати 1,6 милијарди евра на Меѓународниот монетарен фонд (ММФ).
Третото сценарио предвидува прифаќање на можноста Грција дека можеби нема да може да ги исполни своите обврски, за што во четвртокот вечерта првпат официјално било дискутирано на високо ниво во Европската унија. На состанокот не е усвоен никаков конкретен заклучок, ниту одлука, истакнува Reuters.
Повеќето функционери оцениле дека малку е веројатно оти доверителите навреме ќе постигнат договор за реформите со Атина и дека ќе ѝ бидат исплатени 7,2 милијарди евра, колку што ѝ останаа на располагање на Грција во рамките на актуелната програма од меѓународна финансиска помош во износ од 240 милијарди евра, кој во февруари беше продолжена за четири месеци, а траншата е одложена од ланскиот август.
„Тоа би барало во текот на неколку дена да биде постигнат напредок кој не беше можно да биде постигнат изминатите неколку седмици. Реакцијата на Европската централна банка, Европската комисија, Меѓународниот монетарен фонд и неколку земји членки беа извонредно скептични“, изјавил во петокот неименуван функционер запознаен со текот на разговорите.
Грчкиот претставник на средбата рекол дека Атина ќе стори сé што е потребно за да биде постигнат договорот на време, навеле функционерите. Тоа би значело постигнување договор пред средбата на Еврогрупата (министрите за финансии на земјите членки на еврозоната) на 18-ти јуни во Луксембург, којашто треба да го усвои. Притоа тие предупредуваат дека во тој случај исплатата на кредитите до 30-ти јуни за Атина би било тешко изводливо, бидејќи е потребно време да се довршат сите неопходни законски процедури.
Оттаму го скицирале второто сценарио, според коешто актуелниот пакет помош би бил продолжен за да се задржат 7,2 милијарди евра, односно 10,9 милијарди евра ставени настрана за докапитализација на грчките банки. Атина би добила пристап до овие суми откако ќе биде постигнат договорот за реформите.
Претставниците на некои земји од еврозоната рекле во Братислава дека владите сепак би требало да се подготват за третото сценарио, односно неплаќањето на долговите. „Првпат се расправаше за ‘планот Б’ за Грција“, рекол еден функционер. Уште други двајца потврдиле дека било дискутирано за таа тема.
Досега функционерите од земјите од еврозоната се воздржуваа од расправи за ова сценарио, дури и на состаноците зад затворени врати, како што беше оној од четвртокот навечер, и покрај тоа што одредени земjи, вклучително и Германија, самостојно се подготвуваат за таквото сценарио, истакнува Reuters. Дискусијата во Братислава имала повеќе теоретски карактер, бидејќи сценариото во коешто одредена членка не би ги плаќала своите долгови е без преседан во историјата на европската монетарна унија./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
РЕ-Ново
Жена лажирала дури 17 бремености во текот на 24 години, добила 100.000 евра
Италијанка завршила во затвор бидејќи лажирала дури 17 бремености во текот на 24 години за да добие речиси 100.000 евра породилни надоместоци.
Барбара Џоел (50) излажала дека родила пет деца и направила уште 12 спонтани абортуси, а за да успее измамата, носела перници под кошулата за да изгледа како да има труднички стомак, пренесува „Јутарњи лист“.
Го лажирала и начинот на кој оди за да изгледа како да носи дете, а со тоа акумулирала значителен број слободни денови од работа. Џоел ги отфрли сите обвинувања и продолжува да тврди дека нејзините пет деца навистина постојат и дека сите нејзини бремености, вклучително и спонтани абортуси, биле реални.
Џоел тврдеше дека го родила своето последно дете во декември, но полицајците рекоа дека ја набљудувале претходните девет месеци и дека целата бременост била лажна. Таа е обвинета и за кражба на изводи од матичната книга на родените и други документи од клиника во Рим, пренесува италијанскиот весник „Ил Матино“.
Со ваков вид измама се занимава од 2000 година и на тој начин обезбедила бенефиции од над 94.000 евра. Дејвид Пичинато, 55-годишниот партнер на Џоел, наводно ѝ кажал на полицијата сè, а за време на испрашувањето рекол дека „добро знаел“ дека таа никогаш не била бремена.
Се верува дека сведочел против Барбара за да добие помала казна, иако и самиот бил обвинет за помагање во нејзината измама.
„Направила лажни сертификати и ги донела“, наводно им рекол Пичинато на истражителите. „Тоа го знам од 2012 година, односно од почетокот на нашата врска. Џоел беше осудена на една година и шест месеци затвор, но не се појави на изрекувањето на пресудата. Нејзиниот адвокат наводно покажал две потврди, кои потврдуваат дека е болна.
Економија
Еврото го слави својот 25-ти роденден: Треба да се воведе во дигиталната ера
Неопходно е еврото да се внесе во дигиталната ера и да се изгради унија на пазарот на капитал и посилна банкарска унија, најавија европските лидери во пресрет на 25-годишнината на европската валута.
Еврото стапи на сила пред 25 години, на 1 јануари 1999 година, а денес е валута на дваесет земји со 350 милиони жители, од кои Хрватска стана последна членка на почетокот на оваа година.
Претседателот на Еврогрупата Пашал Донохое, претседателката на Европската централна банка (ЕЦБ) Кристин Лагард, претседателката на Европскиот парламент Роберта Мецола, претседателот на Европскиот совет Шарл Мишел и претседателката на Европската комисија Урсула фон дер Лајен ја одбележаа таа годишнина со заедничка напис објавен на веб-страницата на ЕЦБ.
„Заедничката валута го олесни животот“
Во написот објавен вчера, тие пишуваат дека заедничката валута ѝ даде на Европската унија „едноставност, стабилност и суверенитет“ и го олесни животот на европските граѓани кои сега можат лесно да ги споредуваат цените, трговијата и патувањето.
Со текот на годините, еврото се соочуваше со големи предизвици, вклучително и прашања за неговото опстанок, пишуваат европските лидери, нагласувајќи дека „секогаш ќе се најдат вистинските одговори“, како што е усогласениот систем на супервизија на банките по големата криза во 2008 година.
„Денес поддршката за заедничката валута меѓу граѓаните на еврозоната се приближува до рекордни нивоа“, посочија тие, предупредувајќи дека работата „не е завршена“ бидејќи Европа се соочува со нови предизвици со кои поединечни држави не можат да се справат сами.
Унијата се соочува со растечки геополитички тензии, првенствено руската „илегална војна“ против Украина, забрзана климатска криза и невидени предизвици за европската конкурентност од другите делови на светот.
Затоа, прашањата како одбраната, зелената и дигиталната транзиција ќе бидат клучни во иднина. Само за декарбонизација на економиите ќе бидат потребни 620 милијарди евра годишно до 2030 година, предупредија тие.
ЕУ мора да изгради вистинска унија на пазарите на капитал за да ги „мобилизира приватните финансии“, да ја зајакне банкарската унија и да ги реформира фискалните правила. Еврото треба да влезе во „дигиталната ера“ и мора да се подготват темелите за потенцијално „дигитално евро“ кое ќе биде комплементарно на готовината.
Лидерите предупредуваат дека „со неколку земји кои моментално се во процес на пристапување во ЕУ“, алијансата мора да го задржи капацитетот да „дејствува решително“.
„Проширувањето и продлабочувањето меѓусебно не се исклучуваат. Но, проширувањето може да бара промени во организацијата на ЕУ“, се заклучува во написот.
Свет
Убиени 41 член од исто семејство во Газа
Министерството за здравство во Појасот Газа соопшти дека 41 член на исто семејство загинале во израелското бомбардирање на нивната куќа во централниот дел на градот Газа.
Министерството објави список со имињата на 41 член на семејството Малка, од кои сите загинаа во нападот што се случи во зори во населбата Зајтун во Појасот Газа, пренесува AFP.
На ова следуваа реакциите на корисниците на социјалните мрежи на веста за смртта на толку голем број членови на исто семејство, кои споделија список со имињата на загинатите, како што наведоа.
Тие ги осудија злосторствата на окупацијата со која беа истребени цели семејства и избришани од матичната евиденција, наведуваат некои од нив во своите објави.