Свет
Светската банка ги подобри прогнозите за руската економија
Руската економија покажува знаци за подобрување и оваа година би требало да се намали за 2,7 отсто и повторно да забележи раст наредната 2016 година, и тоа за 0,7 отсто, прогнозираат во Светска банка.
Остриот пад на цените на нафтата и западните санкции поради украинската криза, имаат силно изразени ефекти врз руската економија и во Светската банка досега предвидуваа пад на руските економски активности за 2015-та од 3,8 отсто, и за 0,3 отсто во 2016 година, пренесува AFP.
„Прогнозата е променета главно поради прилагодувањето на цените на нафтата во изминатите два месеца кој го поткрепува курсот на рубљата, како и поради нешто побрзото слабеење на инфлацијата. Тоа на централната банка на Русија ќе ѝ овозможи во преостанатиот дел од 2015-та да го интензивира монетарното ублажување, што пак ќе ги намали трошоците за задолжувањето и ќе го поттикне кредитирањето на компаниите и населението“, коментира во соопштението главната економистка на Светската банка за Русија, Бригит Хансл.
Цените на нафатат забележаа остар пад од јуни 2014 година до јануари 2015-та, за во меѓувреме да се опорават околу нивото од 60 долари за барел. Оттаму, вредноста на рубљата минатата година остро падна, но од почетокот на оваа година руската валута јакне, па функционерите заклучија дека најлошиот дел од кризата минал.
Руската централна банка драматично во декември минатата година го подигна каматите, парирајќи му на наглото слабеење на рубљата, но изминатите месеци неколкупати ги намали, паралелно со попуштањето на стравувањето од инфлацијата.
Во меѓувреме и Меѓународниот монетарен фонд (ММФ) ги подобри прогнозите за Русија и сега очекува 3,4-процнетен пад на активностите во оваа и стагнација во 2016 година.
Официјалната статистика, пак,м покажува дека рускиот бруто домашен производ (БДП) во првиот квартал од 2015 година е намален за 1,9 отсто.
Аналитичари сметаат дека има тешкотии кои стојат пред Русија и во следниот период. „Најтешката фаза допрва доаѓа“, изјави за агенцијата Интерфакс поранешниот руски министер за финансии Алексеј Кудрин кој смета дека активностите во вториот квартал ќе паднат посилно отколку во првите три месеца од година. „По тоа состојбата ќе се стабилизира и надолниот тренд ќе заврши“, додаде Кудрин.
Минатата седмица и руското министерство за финансии ги подобри прогнозите за економскиот раст во периодот до 2018 година, кој би требало да се потпира на стабилизирањето на цените на нафтата. Според новите прогнози, активностите во руската економија во 2015 година би требало да се намалат 2,8 отсто, во однос на досега прогнозираниот пад од над 3 процента. Прогнозата се темели на претпоставката за просечната цена на уралската нафта во оваа година од 50 долари за нафта.
Следната 2016 година, според новите процени, руската економија би требало повторно да забележи раст, и тоа од 2,3 отсто, а истата стапка на раст би требало да биде забележана и во 2017-та, и благо за забрза во 2018 година, на 2,4 отсто, со опоравување на цените на нафтата во истиот период до 70 долари за барел.
Инфлацијата на крајот од годинава би требало да изнесува меѓу 11,6 и 11,9 отсто, и да се лизне на 7 проценти во 2016-та, и на 6,3 отсто во 2017-та. Во 2018, година, пак, дополнително би требало да ослаби на 5,2 отсто, според процените на министерството.
Просечниот курс на рубљата во однос на американскиот долар е проценет на 60 рубљи за долар а до 2810-та рубљата би требало да зајакне со процена на курсот до 53,2 рубљи за долар.
Покрај „неутралното“ сценарио, министерството го објави и „оптимистичкото“ коешто претпоставува повисоки цени на уралската нафта, во просек од 60- долари за барел во оваа година, и нивен раст до 90 долари до 2018 година. Во таквите околности, економските активности годинава би се намалиле за 2,5 отсто, по што би следело посилно заздравување, пресметале во руското министерство./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
РЕ-Ново
Жена лажирала дури 17 бремености во текот на 24 години, добила 100.000 евра
Италијанка завршила во затвор бидејќи лажирала дури 17 бремености во текот на 24 години за да добие речиси 100.000 евра породилни надоместоци.
Барбара Џоел (50) излажала дека родила пет деца и направила уште 12 спонтани абортуси, а за да успее измамата, носела перници под кошулата за да изгледа како да има труднички стомак, пренесува „Јутарњи лист“.
Го лажирала и начинот на кој оди за да изгледа како да носи дете, а со тоа акумулирала значителен број слободни денови од работа. Џоел ги отфрли сите обвинувања и продолжува да тврди дека нејзините пет деца навистина постојат и дека сите нејзини бремености, вклучително и спонтани абортуси, биле реални.
Џоел тврдеше дека го родила своето последно дете во декември, но полицајците рекоа дека ја набљудувале претходните девет месеци и дека целата бременост била лажна. Таа е обвинета и за кражба на изводи од матичната книга на родените и други документи од клиника во Рим, пренесува италијанскиот весник „Ил Матино“.
Со ваков вид измама се занимава од 2000 година и на тој начин обезбедила бенефиции од над 94.000 евра. Дејвид Пичинато, 55-годишниот партнер на Џоел, наводно ѝ кажал на полицијата сè, а за време на испрашувањето рекол дека „добро знаел“ дека таа никогаш не била бремена.
Се верува дека сведочел против Барбара за да добие помала казна, иако и самиот бил обвинет за помагање во нејзината измама.
„Направила лажни сертификати и ги донела“, наводно им рекол Пичинато на истражителите. „Тоа го знам од 2012 година, односно од почетокот на нашата врска. Џоел беше осудена на една година и шест месеци затвор, но не се појави на изрекувањето на пресудата. Нејзиниот адвокат наводно покажал две потврди, кои потврдуваат дека е болна.
Економија
Еврото го слави својот 25-ти роденден: Треба да се воведе во дигиталната ера
Неопходно е еврото да се внесе во дигиталната ера и да се изгради унија на пазарот на капитал и посилна банкарска унија, најавија европските лидери во пресрет на 25-годишнината на европската валута.
Еврото стапи на сила пред 25 години, на 1 јануари 1999 година, а денес е валута на дваесет земји со 350 милиони жители, од кои Хрватска стана последна членка на почетокот на оваа година.
Претседателот на Еврогрупата Пашал Донохое, претседателката на Европската централна банка (ЕЦБ) Кристин Лагард, претседателката на Европскиот парламент Роберта Мецола, претседателот на Европскиот совет Шарл Мишел и претседателката на Европската комисија Урсула фон дер Лајен ја одбележаа таа годишнина со заедничка напис објавен на веб-страницата на ЕЦБ.
„Заедничката валута го олесни животот“
Во написот објавен вчера, тие пишуваат дека заедничката валута ѝ даде на Европската унија „едноставност, стабилност и суверенитет“ и го олесни животот на европските граѓани кои сега можат лесно да ги споредуваат цените, трговијата и патувањето.
Со текот на годините, еврото се соочуваше со големи предизвици, вклучително и прашања за неговото опстанок, пишуваат европските лидери, нагласувајќи дека „секогаш ќе се најдат вистинските одговори“, како што е усогласениот систем на супервизија на банките по големата криза во 2008 година.
„Денес поддршката за заедничката валута меѓу граѓаните на еврозоната се приближува до рекордни нивоа“, посочија тие, предупредувајќи дека работата „не е завршена“ бидејќи Европа се соочува со нови предизвици со кои поединечни држави не можат да се справат сами.
Унијата се соочува со растечки геополитички тензии, првенствено руската „илегална војна“ против Украина, забрзана климатска криза и невидени предизвици за европската конкурентност од другите делови на светот.
Затоа, прашањата како одбраната, зелената и дигиталната транзиција ќе бидат клучни во иднина. Само за декарбонизација на економиите ќе бидат потребни 620 милијарди евра годишно до 2030 година, предупредија тие.
ЕУ мора да изгради вистинска унија на пазарите на капитал за да ги „мобилизира приватните финансии“, да ја зајакне банкарската унија и да ги реформира фискалните правила. Еврото треба да влезе во „дигиталната ера“ и мора да се подготват темелите за потенцијално „дигитално евро“ кое ќе биде комплементарно на готовината.
Лидерите предупредуваат дека „со неколку земји кои моментално се во процес на пристапување во ЕУ“, алијансата мора да го задржи капацитетот да „дејствува решително“.
„Проширувањето и продлабочувањето меѓусебно не се исклучуваат. Но, проширувањето може да бара промени во организацијата на ЕУ“, се заклучува во написот.
Свет
Убиени 41 член од исто семејство во Газа
Министерството за здравство во Појасот Газа соопшти дека 41 член на исто семејство загинале во израелското бомбардирање на нивната куќа во централниот дел на градот Газа.
Министерството објави список со имињата на 41 член на семејството Малка, од кои сите загинаа во нападот што се случи во зори во населбата Зајтун во Појасот Газа, пренесува AFP.
На ова следуваа реакциите на корисниците на социјалните мрежи на веста за смртта на толку голем број членови на исто семејство, кои споделија список со имињата на загинатите, како што наведоа.
Тие ги осудија злосторствата на окупацијата со која беа истребени цели семејства и избришани од матичната евиденција, наведуваат некои од нив во своите објави.