Економија
United Grоup ја купува бугарската „Нова“
United Group, водечкиот телекомуникациски и медиумски оператор во Југоисточна Европа, денес објави дека постигна договор за преземање на Nova Broadcasting Group, најголемата бугарска мултиплатформска медиумска компанија, од Advance Media Group. Во рамките на United Grоup, водечкиот телекомуникациски и медиумски оператор во Југоисточна Европа, во С. Македонија работи компанијата „Тотал ТВ“.
Трансакцијата се очекува да заврши на почетокот на следната година по вообичаените регулаторни одобрувања. NOVA TV, националната телевизија во Бугарија, 10 телевизиски канали, најголемата онлајн-платформа – Net Info, која секој месец ја гледаат просечно 80 % од населението во земјата и четири радиостаници, се дел од Novа.
Victoriya Boklag, извршната директорка на United Grоup, изјави: „Многу сме задоволни од постигнатиот договор. Купуваме успешна компанија од двајца истакнати претприемачи, со големи изгледи за понатамошен раст во рамките на Групата. Новата аквизиција е во согласност со целокупната деловна стратегија на United Grоup, која поседува телекомуникациски и медиумски компании на пазарите на кои работиме. Новата радиодифузна група го надополнува нашето постојно медиумско портфолио и уверена сум дека ќе најдеме многу синергии, што ќе ни овозможи на кој било пазар понатаму да инвестираме во локална содржина што бргу ќе допре до публиката“.
Георги Домушчиев, извршен директор на Advance Media Group, рече: „Оваа аквизиција е голем успех и голема можност за Novа, нејзините гледачи, слушатели и посетители. Би сакал да им се заблагодарам на сите што ни помогнаа да ја развиваме водечката бугарска комерцијалниа медиумска група. Договорот со United Grоup ќе обезбеди континуиран развој на Novа“.
Инвестицијата претставува четврта голема трансакција откако BC Partners стана мнозински сопственик на United Grоu во март 2019 година.
Работејќи истовремено во телекомуникацискиот и медиумскиот сектор, платформата на United Grоup ги комбинира водечките оператори и најдобрите производители на медиумски содржини во Југоисточна Европа. Компанијата има приближно 10 милиони корисници и 11 илјади вработени.
За United Group:
Со седиште во Амстердам, United Group е водечки телекомуникациски и медиумски оператор во Југоисточна Европа. Преку значителни инвестиции во дигитална инфраструктура, содржини и технологија, таа обезбедува водечки услуги за клиентите во целиот регион. За 20 години од основањето, United Group купи и успешно интегрира повеќе од 100 компании. Секоја година одвојува значителни средства за развој на дигитална инфраструктура, оригинални медиумски содржини и технологија. United Group од март 2019 година е во сопственост на BC Partners, една од најголемите глобални инвестициски компании, и работи во осум земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Вицегувернерката Митреска: Народната банка го поттикнува зеленото кредитирање
„Народната банка ги препозна ризиците од климатските промени на долг рок, зазеде проактивен став и како една од своите стратегиски цели ги постави зголемената свесност за климатските промени и придонесот кон зелената одржлива економија“, посочи вицегувернерката на Народната банка, Ана Митреска, во интервју за „Блумберг Адрија“, при што истакна дека „зелената агенда“ е вградена во Стратегискиот план на Народната банка. Во период од четири години нивото на „зелените кредити“ е зголемено за околу 2,5 пати.
Митреска посочи дека заради поддршка на зелените финансии и за справување со климатските ризици, Народната банка донесе среднорочен план којшто предвидува конкретни акциски планови или активности во повеќе сфери на работењето на Народната банка, како регулативата, супервизијата, финансиската стабилност, истражувањето и меѓународната соработка.
„Неодамна донесовме и конкретни насоки за банките коишто треба да претставуваат еден вид мапа за начинот на кој треба да се однесуваат банките во однос на мерењето, оценувањето и управувањето со ризиците од климатските промени. Уште пред неколку години го променивме концептот на инструментот за задолжителна резерва заради поттикнување на зеленото кредитирање. Во рамките на институцијата работиме и на политиката на одржливост на банката, што значи подобрување на нашиот корпоративен профил во однос на одржливоста како концепт“, посочи Митреска, истакнувајќи дека Народната банка применува систематизиран пристап кога станува збор за зелената економија и справувањето со ризиците од климатски промени.
„Кредитите со зелена компонента се кредити коишто се насочени кон зголемување на енергетската ефикасност, и на корпоративниот сектор, и на населението, вложување, односно инвестиции во проекти коишто се однесуваат на обновливи извори на енергија, проекти коишто подразбираат користење одржливи материјали, одржливи решенија“, објасни Митреска и посочи дека станува збор за кредитирање коешто е насочено кон инвестициите наменети за заштита на животната средина и ублажување на ефектите од климатските промени врз околината.
Економија
Од полноќ нови цени на горивата
Регулаторната комисија за енергетика донесе oдлука со која се врши намалување на малопродажните цени на нафтените деривати во просек за 0,09 % во однос на одлуката од 15.4.2024 година.
Од 23.4.2024 година, од 00.01 часот, максималните цени на нафтените деривати ќе изнесуваат:
Моторен бензин ЕВРОСУПЕР БС-95 – 87,50 (денари/литар)
Моторен бензин ЕВРОСУПЕР БС-98 – 90,00 (денари/литар)
Дизел-гориво ЕВРОДИЗЕЛ БС (Д-Е V) – 76,00 (денари/литар)
Масло за горење екстра-лесно 1 (ЕЛ-1) – 76,00 (денари/литар)
Мазут М-1 НС – 44,554 (денари/килограм)
Малопродажните цени на ЕВРОДИЗЕЛОТ (Д-Е V) и на екстра-лесното масло за домаќинство на (ЕЛ-1) се намалуваат 1,50 денар/л.
Малопродажната цена на бензинот ЕВРОСУПЕР БС-95 се зголемува 1,00 денар/л, а малопродажната цена бензинот ЕВРОСУПЕР БС-98 се зголемува 1,50 денар/л.
Малопродажната цена на мазутот М-1 НС се зголемува 0,252 денари/кг и ќе изнесува 44,554 денари/кг.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините 0,608 %, кај дизелот намалувањето е 5,088 %, кај екстра-лесното масло намалувањето е 4,799 % и кај мазутот намалувањето е 1,138 %.
Курсот на денарот во однос на доларот во изминатиот период по кој беа формирани цените со претходната пресметка е повисок 1,618 %.
Економија
МЗШВ: Кон 4.033 одгледувачи на говеда исплатени 100 милиони денари дополнителни субвенции за обележани говеда
Министерството за земјоделство, шумарство и водостопанство ги информира сточарите, одгледувачи на говеда, дека денеска Агенцијата за финансиска поддршка во земјоделството и руралниот развој ја реализираше исплатата на дополнителните директни плаќања за обележани грла говеда постари од 12 месеци.
Исплатени се 4.033 одгледувачи на говеда, со вкупна вредност на поддршка од 100 милиони денари.
Висината на директните плаќања изнесува 2.600 денари по женско грло, кое на денот на поднесувањето на барањето има наполнето 12 месеци.
Како корисници на оваа подмерка се јавуваат земјоделските стопанства корисници на основните директни плаќања за обележани грла говеда постари од 12 месеци, а кои сопственото производство на млеко го имаат предадено на регистриран откупувач на сурово млеко или продале или заклале говеда во преработувачки капацитети.