Економија
Анѓушев и Николовски: Со европски средства и владина поддршка обезбедуваме развој на преработувачката индустрија
Заменик-претседателот на Владата задолжен за економски прашања, Кочо Анѓушев, заедно со министерот за земјоделство, шумарство и водостопанство, Љупчо Николовски, градоначалничката на општина Тетово, Теута Арифи, и директорот на Агенцијата за финансиска поддршка во земјоделството и руралниот развој, Николче Бабовски, ја посетија компанијата „Сентис АГ“ од тетовско Џепчиште, која претставува пример за користење на средствата од ИПАРД 2-програмата. Оваа компанија во 2018 година склучи договор за искористување средства од мерката „Инвестиции во материјални средства за преработка на земјоделски и рибни производи“, кои ги инвестира во набавка на опрема, односно машина за полнење јогурт и два апарата за испитување на квалитетот на млекото, со вкупна инвестиција од 100 илјади евра. Преку бенефициите што ги нуди ИПАРД-програмата компанијата направи поврат на 50 проценти од вложените 100 илјади евра.
Вицепремиерот Анѓушев по извршениот увид на направената опрема истакна дека ова е успешен модел што треба да се примени и во другите преработувачки субјекти и дека е особено корисен за подобрување на статусот и позицијата, како и за заштита на земјоделците во Република Северна Македонија.
„Ова што го видовме денеска тука, една компактна фабрика што ги задоволува сите стандарди за производство, нè охрабрува за понатаму да креираме програми во Владата, кои се насочени кон индустријата, особено за субјекти во преработувачката индустрија на земјоделските производи, затоа што само на тој начин се прави дополнителна и додадена вредност. Со измените во Законот за финансиската поддршка на инвестициите го прошируваме опфатот на компании во делот на опрема за преработка на земјоделски производи за да можеме да ги заштитиме земјоделците. Со проширување во преработка на земјоделските производи тие своите производи нема да мора да ги продаваат само како свежи, туку и преработени производи, со што се зголемува трајноста, а и додадената вредност. Она што е најважно е дека на тој начин земјоделците нема да бидат условени и уценети своите производи да ги продаваат по најниска цена или воопшто да не го продадат својот род и да претрпат финансиска штета, туку ќе му додадат дополнителна вредност на својот труд. Овие програми се дизајнирани токму за да ги решат овие проблеми“, истакна вицепремиерот Анѓушев.
Министерот за земјоделство, шумарство и водостопанство, Љупчо Николовски, потенцира дека ефикасната искористеност на мерките што ги нуди ИПАРД 2-програмата е важна за развој на преработувачката индустрија што ќе придонесе и за решавање на клучните предизвици во земјоделството во делот на пласманот и вишоците земјоделски производи.
„Особено ме радува што повеќето од овие средства веќе се слеваат или инвестираат во преработувачката индустрија во делот на целокупниот сектор на земјоделството сè со цел решавање на клучните проблеми во целиот сектор, особно решавање на вишокот производство, но и за производство на прозводи со висока додадена вредност, кои се извезуваат на странските пазари. Оваа компанија е пример за инвестиција во која имаме опрема за производство на јогурт, заедно со дополнителна проверка на квалитетот на производите и ова е успешен пример. Ме радува што на првиот повик од ИПАРД 2-програмата се склучени 950 договори, од кои 760 се веќе реализирани, односно тоа се инвестиции во износ од 8,3 милиони евра“, изјави Николовски додавајќи дека претходниот месец завршија два нови јавни повика од ИПАРД 2-програмата, на кои се поднесени приближно 1.200 барања, чиј износ на инвестиции надминува 33 милиони евра.
Градоначалничката на Тетово, Теута Арифи, изјави дека ваквите инвестиции се важни за економскиот развој на Тетово.
„Ова е компанија што со години дава придонес во развојот на Тетово. Оваа компанија се појавува како корисник на ИПАРД 2-програмата и за нас е важно што повеќе компании да ги користат овие средства“, изјави Арифи.
Директорот на Агенцијата за финансиска поддршка на земјоделството и руралниот развој, Николче Бабовски, посочи дека ИПАРД-програмата и компаниите што ја користат оваа подршка од ЕУ покажува дека во една рурална средина може да се направи успешна инвестиција.
„На овој начин покажуваме дека максимално се вложуваме овие средства да бидат навремено целосно и искористени. На последниот повик за мерката 3 имаме рекордни 65 барања во износ од 18 милиони евра. Тоа покажува дека интересот на преработувачите е голем, а и целта на државата е токму со развивање на преработувачката индустрија во руралните средини да се овоможи напредок и соодветни услови за живеење во руралните средини“, изјави Бабовски.
Сопственикот на компанијата „Сентис АГ“, Сервет Ќазими, изјави дека постојано инвестираат во модернизирање на производството и за инвестициите ги користат финансиските средства што ги нудат мерките од ИПАРД 2-програмата. Ќазими аплицирал и на вториот јавен повик за мерката 3, „Инвестиции во материјални средства за преработка на земјоделски и рибни производи“, и ги повика земјоделците да ги користат парите од европските фондови, кои се важни за инвестирање во нови и модернизирање на постојните преработувачки капацитети.
Инаку, во овој период барањата од последните два јавни повика од ИПАРД 2 забрзано се обработуваат во Агенцијата за финансиска поддршка на земјоделството и руралниот развој со цел побргу да се склучат договорите со апликантите. Кон средината на оваа година е планирано да се објави нов повик за мерките од ИПАРД 2-програмата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Трипуновски: Јаболкото во Ресен ќе остане неоткупено поради големиот увоз на странско јаболко во Македонија
Дополнителниот заменик министер за земјоделство, шумарство и водостопанство Цветан Трипуновски денес е во работна посета на Ресен каде што оствари работни средби со овоштарите од овој регион.
„Овоштарите од Ресен претрпуваат големи губитоци заради погрешните политики на СДС и големиот увоз на странско јаболко во Република Македонија. Согласно податоците, додека ресенското јаболко стои неоткупено, од 1 септември 2023 година до сега во Македонија се влезени околу 4 милиони килограми јаболко што е главна причина што ресенчани ги преживуваат најцрните денови во историјата на овоштарството во Македонија“, изјави Трипуновски.
Како поголеми проблеми на земјоделците од Ресенскиот регион, Трипуновски ги посочи неисплатените субвенции како и неисплатените штети од природните непогоди од пред некоја година, откупно-дистрибутивниот центар којшто требаше да биде завршен во 2023 година сѐ уште не е ни започнат со градба.
„Цврсто им ветив дека идната Влада предводена од ВМРО-ДПМНЕ има сериозен план и конкретни мерки со кои ќе се стави крај на маките на ресенчани“, заврши Трипуновски.
Економија
Ангеловска-Бежоска на Пролетните средби на ММФ и СБ: Носителите на политики ќе дискутираат за состојбите и перспективите во економијата
Гувернерката на Народната банка, Анита Ангеловска-Бежоска, и заменик-министерот за финансии, Филип Николоски, ја предводат нашата делегација, која учествува на Пролетните средби на групацијата на Светскатa банка (СБ) и Меѓународниот монетарен фонд (ММФ) во Вашингтон, САД. Во делегацијата на Народната банка на овие средби ќе земе учество и вицегувернерот Фадил Бајрами.
Гувернерката Ангеловска-Бежоска и вицегувернерот Бајрами на претстојните Пролетни средби ќе одржат состаноци со заменик-директор на Меѓународниот монетарен фонд, Бо Ли, со директорот на ММФ за Европа, Алфред Камер, како и со извршниот директор на ММФ и алтернативниот извршен директор, Пол Хиберс и Лук Дресе. На состаноците со високите претставници на ММФ ќе стане збор за економските состојби во нашата земја и поставеноста на монетарната политика, којашто придонесе за стабилизирање на инфлацијата. Делегацијата на Народната банка, предводена од гувернерката, ќе оствари средба и со претставниците на одделите за статистика и за монетарни и капитални пазари при Меѓународниот монетарен фонд, на која ќе се споделат досегашните достигнувања и резултати од заемната успешна соработка.
Во рамките на Пролетните средби, Ангеловска-Бежоска ќе одржи состаноци и со високи претставници на Светската банка, заменик-претседателката на СБ, Антонела Басани и со извршниот директор на СБ за Конституенцата во која членува нашава земја, Јуџин Ругенаат. Исто така, делегацијата на Народната банка ќе учествува и на редовниот состанок на земјите членки на Конституенцата.
Одржувањето на Пролетните средби секоја година на едно место ги собира носителите на политиките, односно првите луѓе на централните банки и министрите за финансии од земјите членки, кои ќе разговараат за политиките и финансиските реформи во насока на остварување на целите за одржлив раст (SDG), особено поврзани со климатските промени и родовата еднаквост.
Економија
Трипуновски: Ги потпишав првите 16 договори за закуп на земјоделско земјиште во државна сопственост
Дополнителниот замени министер за земјоделство, шумарство и водостопанство Цветан Трипуновски на својата фејсбук страна објави дека ги потпишал првите 16 договори за закуп на земјоделско земјиште во државна сопственост.
Во својата објава Трипуновски вели: „Почитувани земјоделци, штотуку ги потпишав првите 16 договори за закуп на земјоделско земјиште во државна сопственост, нека е аирлија!“
Трипуновски во неколку наврати ја алармираше јавноста дека во Република Македонија постојат договори за закуп на земјоделско земјиште во државна сопственост кои истекуваат оваа година, но на истите не им е овозможено продолжување и дека Николовски го кочи продолжување со образложение дека се потребни законски измени на законот за земјоделско земјиште.
„Сепак на крајот успеавме да го реализираме нашиот предлог за разрешница на овој проблем по многу побрза и поедноставна постапка, наспроти тврдењата на министерот Николовски кој постојано, од непознати причини, тврдеше дека се потребни измени на законот за земјоделско земјиште и дека со анексирање на договорите не се решава овој проблем. Со ова само се докажа дека Николовски повторно ве лаже како што тоа го прави изминативе 7 години“, дополни Трипуновски.
Позитивно е тоа што овој голем проблем доби решение и засегнатите земјоделци конечно ќе можат да ги продолжат своите договори согласно законските регулативи. Со ова Трипуновски покажа дека ќе биде предводник во промените и решавањето на проблемите во македонското земјоделство.
„ВМРО-ДПМНЕ секогаш било и ќе биде на страната на македонските земјоделци, доколку ние не го изнесовме овој проблем во јавноста, СДС и Николовски никогаш немаше да ги продолжат овие договори на вредните македонски земјоделци или пак тоа ќе го правеа селективно и повторно земјоделското земјиште ќе завршеше кај луѓе што не се земјоделци или истото ќе го трансформираа за плантажи со фотоволтаици. ВМРО-ДПМНЕ секогаш ќе може гордо и со крената глава да биде помеѓу светиниколчани и сите земјоделци во Република Македонија“, заврши Трипуновски во својата објава.