Контакт

Investigative story

(Видео) Патарини: Една пресметка за пратениците, друга за граѓаните

Објавено пред

Алија Камбероски, кој e прв на листата на топ 20 пратеници според потрошените средства за патни трошоци за 2017 година што ја објави „Макфакс“, патува од Лабуништа, Струга, и во еден правец поминува околу 174 км за да стигне до Скопје.

Според пресметките што може да се добијат на порталот viamichelin.com, во просек патот до Скопје од оваа локација еден граѓанин кој патува со свој автомобил, без патарините, би го чинел нешто повеќе од 18 евра или 36 евра во двата правци. Доколку на тоа се додадат и околу 5 евра за патарини во двата правци, трошоците би изнесувале 41 евро за патот до Скопје. Ако  во месец со набиена агенда еден граѓанин реши да патува 20 пати до Скопје и назад од оваа локација, според оваа пресметка, ќе потроши околу 820 евра за патни трошоци. Доколку се примени актуелното правило за враќање на 30% од оваа сума, тогаш граѓанинот би требало да врати 246 евра од патните трошоци.

Но, трошоците за пратениците се пресметуваат според друга методологија бидејќи не им се брои само потрошениот бензин туку и изминатите километри. Тие со сегашната одлука на Собранието имаат право на надоместок за користење автомобил во лична сопственост за службени цели во висина од 30% од продажната цена на еден литар гориво според изминат километар, плус патарините. Па така, во април Камбероски земал околу 2 илјади евра за патни трошоци, во јули 2364 евра, додека во ноември 2427 евра.

Камбероски од март до ноември лани за само девет месеци од Собранието добил 12.847 евра за патни трошоци, што значи дека во просек само за патот до Собранието и назад месечно добивал дополнително по 1.427 евра.

Пратениците и лани зеле по 10-12 илјади евра за патни трошоци

Слично е и кај многу други пратеници кои потекнуваат од други градови и во одредени месеци земале по две и повеќе илјади евра за патни трошоци.

Според Одлуката за висината на надоместокот на пратениците, тие може да го користат ова право и за седници на работните тела, како и за учество во работата на делегации, пратенички групи, семинари, средби. Но, според упатените, во финалната пресметка за враќање на патни трошоци не влегуваат само потрошениот бензин и патарините туку и амортизацијата за возилото и други трошоци.

Според објаснувањата што ги добивме од вработени во собраниската финансиска служба за тоа како се прави пресметката на патни трошоци за рефундирање кај пратениците, пратениците прво приложуваат патна сметка. Тие се потпишуваат во списоци за секоја активност во Собранието и доколку се потпишани, имаат патна сметка и приложуваат патарини закачени за таа патна сметка и потоа се внесуваат во програма што им ги пресметува сумите за патни трошоци.

Според нив, ако хипотетички еден пратеник поминал 100 км и вредноста на горивото е околу 100 евра, тогаш тој добива враќање од 30% од тие 100 евра или 30 евра.

„Макфакс“ од Собранието ги побара, но не ги доби копиите од сите сметки за патарини и бензин што биле поднесени до законодавниот дом за враќање на патни трошоци од 2017 за десетина пратеници кои во изминатиот период се споменуваа како оние што најмногу трошеле за патни трошоци. Од Собранието нè информираа преку телефон дека доставата на ваквите копии не може да ја обезбедат бидејќи тоа ќе значело премногу фотокопирање и време за службите, па затоа не може да добиеме увид во копиите од патарините.

Направивме повторен обид преку генералниот секретар на Собранието, Цветанка Иванова, да добиеме увид во дел од копиите, но таа нè упати да испратиме ново барање за слободен пристап или, пак, да испратиме жалба на делумно одговореното барање.

Дел од пратениците кои се најдоа во ТОП 20, според патните трошоци според нивните анкетни листови кои ги доставиле до Антикорупциска, поседуваат и станови во Скопје. Томислав Тунтев во имотниот лист пријавил дека поседува стан од 39 квадрати во Скопје. Пратеникот Зоран Илиоски од ВМРО-ДПМНЕ исто така пријавил дека има стан во Скопје од 57 квадрати. Неговиот колега од истата партија, Сашо Василевски, пријавил дека неговата сопруга има стан во Скопје од 91 квадрат, а исто така и пратеничката Јагода Шахпаска пријавила стан од 62м2 како имот на сопругот.

Алија Камберовски од ПЕИ за „Макфакс“ вели дека трошоците од повеќе од 1400 евра месечно за пат до Собранието воопшто не биле високи.

„Јас патувам секојдневно, пресметајте ако секој ден патувате колку ќе ве чини. Ние сме шофери а не пратеници, дали би можел со илјада евра плата да седам во Скопје, да плаќам стан и да гледам фамилија. Имам деца, жена, тие суми не се високи, немам можност и да сакам да седам во Скопје, не ми дозволуваат фамилијарните обврски“, изјави Камберовски.

Тој додава дека непотребно се кренала фама околу патните трошоци и дека не се говори за милионите евра потрошени на разни други глупости, туку за потребите на пратениците.

„Се крена фама, а ако сакаат слободно нека најдат решение и кој сака нека нè вози, па нека си ги земат тие патни трошоци. Нека ни најдат некој на располагање 24 часа, три дена нема да издржи, секој ден патувам по 400 км, слободно нека проверат. Сè е согласно со Законот за пратеници“, вели Камберовски.

Пратеничката Затуроска рече за „Макфакс“ дека ѝ се познати податоците за потрошените средства. „Немам ништо што да додадам. Сè е видливо и во согласност со законите“, изјави пратеничката која патува од Битола. Таа додаде дека во тек се законските измени што треба да ги преполоват трошоците кои Собранието ги исплаќа за превоз и патарини. Затуроска рече дека ваквите исплати споредени со актуелната економска состојба во државата изгледаат навредливо.

Пратеникот Сурија Рашиди исто така смета дека непотребно се кренала многу фама во јавноста за патните трошоци.

„Мислам дека целта е напад врз дигнитетот на пратениците и авторитетот на Собранието. Од моја страна нема никаква злоупотреба, патувам дневно по 350 км, не сум бил пратеник кога е донесен тој закон, сè е законски. Ако математиките кажат дека навистина се големи, тогаш може да се преземат мерки. Лично мислам дека треба да се размисли за добар закон кој веќе нема да остава впечаток дека ќе има простор за злоупотреби. Да не дојдеме во ситуација да немаме на крај луѓе заинтересирани да се пратеници“, вели Рашиди.

Пратеничката група на СДСМ поднесе иницијатива за намалување на патните трошоци и надоместокот од 30 отсто од цената за изминат литар бензин да се преполови на 15 отсто. Предлозите поминаа како точка на дневен ред на Комисијата за финансирање и буџет, а работата е запрена во Комисијата за политички систем, каде што треба да се формира работна група. Според координаторот на пратеничката група на СДСМ, Томислав Тунтев, се чека да се вратат пратениците на ВМРО-ДПМНЕ за да поминат предлозите.

Кристина Озимец / Васко Маглешов

Investigative story

Антикорупциската комисија се сомнева во злоупотреби со монографии на Филозофскиот факултет

Објавено пред

Од

Антикорупциската комисија има доставено иницијатива за поведување постапка за кривично гонење поранешен декан на Филозофскиот факултет до Јавното обвинителство,поради сомневања дека сторил злоупотреба на службената положба и овластувањето, дознава „Макфакс“.

Информацијата за „Макфакс“ ја потврди и Државната комисија за спречување на корупцијата, од каде што велат дека тие во согласност со Законот за спречување на корупцијата постапиле по предмет оформен по пријава за сомневање за искористување на службената положба и овластувањето и прибавување корист за себе или за друг на штета на средствата на Факултетот по што на седница донеле заклучок до Јавното обвинителство да поднесат иницијатива за поведување постапка за кривично гонење на професорот.

Во иницијативата што ја добивме од антикорупциска комисија се вели дека тие постапиле по анонимна пријава за сомневање за злоупотреба на позицијата кога во 2013 година, спротивно на Правилникот за работа на Факултетот, деканската управа потпишала меморандум за соработка во областа на издавачката дејност помеѓу Министерството за образование и наука, Универзитетот „Св. Кирил и Методиј“ – Скопје и Филозофскиот факултет – Скопје за финансирање 29 монографии за дејци од македонското револуционерно движење.

„Во периодот од 2014 до 2016 година овозможил исплата на средства, со што се надминати планираните средства за издадените 19 монографии за износ од 3.977.000 денари. Овозможил исплата на средства од Факултетот во износ од 1.142.000 денари спротивно на одредбите од меморандумот за соработка со кој е предвиден и утврден начинот на финансирање, овозможил исплата на средства за авторски хонорари и надоместоци за лектура и техничко уредување во износ од 498.000 денари, без обезбедна соодветна и комплетна документација“, се вели во иницијативата испратена до Обвинителството.

Според антикорупциската, постои и сомневање за овозможување склучување договори за закуп спротивно на објавените услови во огласот за издавање недвижности, како и нефактурирање на надоместоците за комунални услуги и други трошоци на закупците.

„Спротивно на одлуката за плати и надоместоци на плати овозможил исплата на надоместоци на наставниот кадар и администрацијата по основ на дополнителна ангажираност, зголемен обем на работа или учество во комисии во вкупен износ од 4.648.000 денари, како и не презел мерки и активности за враќање на финансиските средства доделени на Студентскиот парламент, а потрошени ненаменски и без соодветна документација“, се вели понатаму во предметот.

За случајот се обративме и кај поранешниот декан за кој се поведува предметот, но тој немаше коментар бидејќи според него сè уште немал никакви информации за поднесениот предлог за поведување постапка за кривично гонење.

Ратко Дуев, сегашниот декан на Филозофскиот факултет, исто така вели дека нема никакви информации за пријавата ниту, пак, дека Факултетот е информиран за неа, па затоа не може да коментира на темата.

Испративме прашања до Обвинителството за тоа до каде е постапката со иницијативата што ја има поднесено за кривично гонење на ексдеканот, а сега професор на Филозофскиот факултет, која е предадена во јануари годинава, како и дали Обвинителството има други постапки со кои се истражува корупција или други злоупотреби на овој факултет, но до објавата на текстот не добивме одговор.

Претходно, во мај 2017 година, и Државниот завод за ревизија во нивната ревизија на финансиските извештаи на Факултетот исто така констатира дел од неправилностите за кои сега антикорупциската го повикува Обвинителството да поведе постапка.

Според ДЗР, во текот на реализацијата на проектот од 2013 до 2016 година со монографиите воопшто не се водела евиденција за потрошените средства на ангажираните лица и за исплатувањето на нивните хонорари. Не бил изготвен ниту писмен извештај за реализација на проектот и само било информирано МОН дека ќе се издадат 19 монографии, 5 се во фаза на печатење, а 5 нема да се издадат од објективни причини.

ДЗР констатира дека финансиските извештаи на Факултетот не ги прикажуваат вистинито и објективно сите материјални аспекти, како и дека некои од активностите и трансакциите во нив не се во согласност со законската регулатива.

Кристина Озимец

Прикажи повеќе...

Investigative story

Ни требаат реклами, ние сме угледот на градот, „Охридски комуналец“ за потрошените 1,7 милион денари на медиуми

Објавено пред

За медиумско внимание во Охрид плаќало и Јавното претпријатие „Охридски комуналец“. Од 2011 година, кога претпријатието почнува самостојно да функционира, до август 2018 година, „Комуналец“ за рекламирање во локалните медиуми потрошило 1.714.149 денари или околу 27,8 илјади евра, дознава „Макфакс“. Исплатите кон медиумите и од ова претпријатие, како и од другите јавни претпријатија во Охрид и од Општина Охрид, ги има и во екот на најголемата борба на Здружението на новинарите на Македонија против јавни пари во медиумите. „Комуналец“ плаќа и им плаќало на медиумите на ист начин како и Општина Охрид – од блокирана сметка поради долгови.

Договорите се потпишувале за гостувања во живо, за емитување соопштенија и огласи од информативен карактер, како и за поставување банери и рекламирање. Најмногу пари „Комуналец“ одвоил за „МХ радио“ – 429.785 денари, на „ЛТ трејд“ за објави на порталот „Охрид 1“ му биле исплатени 254.552 денара, 206.986 денари „Комуналец“ одвоил за услугите од ТВМ, 205.266 денари му исплатиле на Златко Маневски за организирање на веб-страницата на претпријатието, на „Охридњус“ му исплатил 148.290 денари, „Охрид 24“ добил 140.000 денари, „Охридскај“ добил 91.110 денари, на „Мегастар“ повторно за објави на порталот „Охрид 1“ му исплатил уште 90.000 денари, 85.750 денари му се исплатени на „Москито“ за објави во електронскиот весник „Охридлајв“, на „СОС Балкан медија“ за објави на „Охридскај“ му биле исплатени 40.320 денари и најмалку пари „Комуналец“ одвоил за „Вебвил“ со исплатени 22.000 денари.

Од „МХ радио“, кое добиле речиси половина милион денари од „Комуналец“, велат дека соработката со претпријатието не ја загрозувала нивната медиумска независност.

„Парите не се за фаворизирање, туку за објавување огласи и соопштенија. Претпријатијата имаат потреба од вакви објави и не гледам зошто медиумите да бидат тргнати настрана. Таа соработка не можам да кажам дека влијаела врз независноста на медиумот оти се работи за објава на соопштенија, во истата приказна сме сите, и локални и национални медиуми. Далеку сме сите до еден од независност и треба да помине еден долг период за да се направи природна селекција на чисто комерцијални медиуми, под услов да не се појавуваат повеќе медиуми целосно поддржани од Владата или од локалната самоуправа, како што имавме во изминатиот период“, вели Јулијан Здравковиќ од „МХ радио“.

Став дека претпријатието треба да се рекламира и покрај што работи со блокирана сметка има и сегашниот директор на „Охридски комуналец“, Љупчо Грданоски.

„Треба да се презентираат нашите активности, сакаме медиумите да ги покриваат. За тоа сега одвојувам 20-30 илјади денари месечно“, -Љупчо Грданоски, директор на „Охридски комуналец“

„Долгови има, работиме со блокирана сметка. По моето доаѓање, имам направено спогодби за враќање на долговите, за старите наталожени долгови. Почната е постапката, а големи се и каматите, треба време. Имаме потреба да се рекламираме во медиуми, ова е јавна работа. Ние сме угледот на градот, треба да се презентираат нашите активности, сакаме медиумите да ги покриваат. За тоа сега одвојувам 20-30 илјади денари месечно. Овие пари нема да влијаат на долговите затоа што тие се големи, а ова се малку пари“, изјави директорот Грданоски за „Макфакс“ не прецизирајќи колку изнесува долгот на претпријатието и колку време работат со блокирана сметка.

Кај ова претпријатие, според податоците што ни ги испрати сегашниот директор Грданоски, не се поклопува сумата на исплатени пари во медиумите со сумата на која се потпишани договорите за соработка. Исплатени се помалку пари од она што е предвидено во потпишаните договори. Претпријатието потпишало договори со медиумите кои предвидуваат да им бидат исплатени 2.123.695 денари, но реализираните исплати се на сума од 1,7 милион денари.

Прикажи повеќе...

Investigative story

Охридските „Градски гробишта“ се рекламирале за 1,1 милион денари народни пари

Објавено пред

Со народни пари реклами во локалните медиуми си плаќале и директорите на ЈП „Градски гробишта“ – Охрид, дознава „Макфакс“. За рекламни спотови, маркетинг-услуги, објава на соопштенија и огласи и телевизиско емитување од 2011 година, кога е формирано претпријатието, до годинава „Гробишта“ потрошило 1.115.400 денари или малку повеќе од 18 илјади евра. И тоа, по примерот на Општина Охрид, како и другите јавни претпријатија, плаќало за медиумско внимание и во екот на најголемата борба на Здружението на новинарите на Македонија против јавни пари во медиумите.

Локалните медиуми во Охрид истовремено зеле пари и од Општина Охрид и од јавните претпријатија. Најплатен медиум и во случајот на „Градски гробишта“ како и кај повеќето претпријатија и кај Општината е ТВМ. Иако соработувале само една година, 2012, на овој медиум претпријатието му префрлило 185.100 денари за телевизиско емитување, што е најголема одвоена сума за еден медиум. Зад ТВМ на листата следуваат „МХ бокс“ со 144.000 денари, „Охриднет“, кој добил 128.000 денари, „ТВ О2“ за која биле одвоени 120.000 денари, Радио Морис со 108.000 денари, за „МХ радио“ и „Охрид вест“ биле одвоени по 96.000 денари, „Охридскај“ добил 65.400 денари, на „НТВ продукција“ ѝ биле исплатени 64.900 денари, „ЛТ трејд“ за објави на порталот „Охрид 1“ добил 60.000 денари и најмалку пари биле одвоени за „ТВ Морис“, која добила 48.000 денари.

Од најплатениот медиум, ТВМ, првин ни рекоа дека немале договор за соработка со „Градски гробишта“ – Охрид спротивно на официјалните податоци што во „Макфакс“ ги испрати претпријатието, од кои се гледа дека за нив се потрошени најмногу пари, а подоцна се јавија да ја повлечат изјавата и рекоа дека од финансискиот оддел им потврдиле дека имале договори во 2012 година.

Најплатен медиум и во случајот на „Градски гробишта“ како и кај повеќето претпријатија и кај Општината е ТВМ

„Не земавме пари од ‘Градски гробишта’, немаме договори и не сме емитувале реклами. Договори имавме со ‘Комуналец’“, кусо изјави управителката на ТВМ, Ирена Арнаудова, за „Макфакс“.

Таа рече дека има неодложни обврски поради кои не може да даде подолго објаснување, но десетина минути подоцна ја смени изјавата и најави дека детаљно ќе ни одговори на сите прашања доколку ѝ ги пратиме по имејл. Арнаудова до објавувањето на текстот не одговори на прашањата.

Некои од останатите сопственици на медиумите кои добивале пари од Општината и од јавните претпријатија веќе се изјаснија дека додека траеле договорите им биле наклонети на оние што плаќале и се раководеле од изреката „кој те плаќа тој те има“.

Договорите за соработката со медиумите во име на „Гробишта“ ги случиле директорите Драган Пандевски, кој бил на функцијата до април 2013 година, и неговиот наследник Зоран Симоновски, кој бил директор до ноември 2017 година. Праксата за купување медиумско внимание во ова претпријатие ја прекинал сегашниот директор Ванчо Костоски.

„Со ниеден медиум немам договор и никој од медиумите не барал досега договор од мене“, вели директорот на „Градски гробишта“, Ванчо Костоски

„Не гледам потреба да се рекламирам и нема што да се рекламира кај нас. Ние имаме потреба од објавување огласи или соопштенија од типот да ги известиме граѓаните дека следува утужување ако не ги намират обврските за гробарина. Откако јас сум директор, не сме користеле огласи и соопштенија, туку праќаме опомени по пошта. Со ниеден медиум немам договор и никој од медиумите не барал досега договор од мене“, вели директорот Костоски за „Макфакс“.

Јавното претпријатие, според директорот Костоски, сè уште е во долгови. Сегашниот долг изнесувал околу 50.000 евра.

Измената на Законот за аудио и аудиовизуелни услуги, која е во постапка, треба да забрани влегување јавни пари во медиумите, со што се очекува поголема медиумска независност.

Прикажи повеќе...

Најново

Регион54 минути

(Видео) Пожар на Пелешец, гори борова шума – жителите ги бранат куќите

Во пожар што избувна кај местото Мокало на хрватскиот остров Пелешец гори густа букова шума. Според последните информации, огнот го...

Македонија2 часа

Се намалуваат трошоците во постапките пред нотарите и извршителите

На предлог на Министерството за правда, Владата ги прифати предлог-законите за изменување и дополнување на Законот за извршување и на...

Македонија3 часа

Заев: Одлучуваат тие што гласаат, тие што не гласаат не се ни бројат

За успешноста одлучуваат тие што гласаат, а тие што не гласаат не се ни бројат, порача премиерот Заев пет дена...

sobranie, 27 april nasilstvo krvav cetvrtok sobranie, 27 april nasilstvo krvav cetvrtok
Крвав четврток4 часа

Чавков наредил да им ја отворам вратата на колегите од УБК, сведочеше собраниска полицајка за oдзмените харддискови

По наредба на директорот на БЈБ, обвинетиот Митко Чавков, било одземањето на дисковите со снимките од безбедносните камери во Собранието, потврди собраниската...

Крвав четврток4 часа

Судот им ги одби гаранциите на Крсто Мукоски и Љубен Арнаудов да се бранат од слобода

Обвинетите пратеници Крсто Мукоски и Љубен Арнаудов, како и активистот Богдан Илиевски и обезбедувачот Оливер Радулов, и натаму остануваат во...

Топ5 часа

Градоначалникот на Куманово добивал закани, поднесена кривична пријава против едно лице

Градоначалникот на Куманово до СВР Куманово пријавил дека во два наврата му биле испратени СМС-пораки со заканувачки содржини кон него...

Крвав четврток6 часа

Се надевам дека ќе одговараат нарачателите за 27 април, рече обвинителката Русковска

По првиот дел од судењето во кривичниот суд за настаните од 27 април, обвинителката Вилма Русковска, на новинарско прашање, рече...

Investigative story8 часа

Антикорупциската комисија се сомнева во злоупотреби со монографии на Филозофскиот факултет

Антикорупциската комисија има доставено иницијатива за поведување постапка за кривично гонење поранешен декан на Филозофскиот факултет до Јавното обвинителство,поради сомневања...

Крвав четврток8 часа

„Влатко Ѓорчев ги молеше како Господ да не нè напаѓаат“, се расплака телохранителот на Оливер Спасовски

(Фото: Ацо Ангеловски во средина) „Лево од мене слушнав наредба – убијте ги! Масата одеднаш тргна кон нас. Бидејќи не...

Регион8 часа

Додик: Јавна тајна е дека опозицијата подготвува немири на улиците

Претседателот на Република Српска, Милорад Додик, изјави дека е јавна тајна дека опозицијата во тој српски ентитет има план да...

Виница Виница
Македонија9 часа

Вонредни контроли по масовното труење со храна во Виница

Aгенцијата за храна и ветеринарство во наредните денови во Виница ќе изврши вонредни контроли кај сите оператори што произведуваат, подготвуваат...

Свет9 часа

Кина: САД ни ставаат „нож под грло“, губиме и едни и други

Продолжувањето на кинеско-американските трговски преговори е тешко откако САД на Кина и ставија „нож под грло”, рече заменик-министерот за трговија...

Свет10 часа

САД ја предупреди Русија: С-300 во Сирија ќе биде голема грешка

САД ја предупредија Русија дека распоредувањето на модерниот анти-ракетен систем С-300 во Сирија е голема грешка и дека одлуката треба...

Топ10 часа

Осумнаесетгодишно момче од Скопје загина во сообраќајна несреќа

На улицата „Јадранска магистрала“ во Скопје ноќеска се случила сообраќајна несреќа во која животот го загуби 18-годишниот Д.К. од Скопје....

Свет13 часа

НАСА откри две нови далечни планети

Орбиталниот телескоп на НАСА, кој е во потрага по нови светови надвор од Сончевиот систем, открил две нови далечни планети...

Спорт21 час

Модриќ е „кралот“ на светот

Лука Модриќ очекувано е избран за најдобар фудбалер во изборот на ФИФА, комплетирајќи ја неверојатната година во која со Реал...

Македонија1 ден

„Најди некој со сила од Унијата на жени, некој непознат“, Јанакиески вртел телефони за да бара противкандидат за градоначалник

На продолжението од судењето за предметот на специјалното јавно обвинителство, познат со кодното име „Титаник“, во доказната постапка се репродуцираат...

Македонија1 ден

(Вознемирувачки фотографии) Смртоносни отрови расфрлани во повеќе градови, реагира „Анима мунди“

Исклучително силни смртоносни отрови се расфрлани во повеќе градови и села во целата држава – Валандово, Велес, Охрид, Куманово, Тетово,...

Македонија1 ден

Поднесено обвинение против Васе Доневски за скандалот со „Секјуриком“

Основното јавно обвинителство за гонење организиран криминал и корупција поднесе обвинение против поранешниот директор на Службата за општи и заеднички...

Македонија1 ден

Димитров: Со четири амандмани ќе се менува Уставот, сè уште не се напишани, ниту преговарани

Уставите андамани не се напишани, ниту преговарани, нив ќе ги дефинира Собранието со двотретинско мнозинство, порача министерот за надворешни работи,...

Досие