Контакт

Daily news

Случајот „Пуч“ заглавен  во ќор-сокакот меѓу политиката и правото

Објавено пред

Звонко Костовски од осуден „пучист“ – клучен сведок за „Тврдина“?

Обвинителството за гонење организиран криминал и корупција им понудило предлог-спогодба на двајца од обвинетите за „Пуч“. Но, за разлика од шестообвинетиот Звонко Костовски, кој ја потпишал спогодбата и се согласил за затворската казна од 3  години, второобвинетиот Ѓорѓи Лазарeвски се откажал во последен момент и не се согласил  на понудата од 6,5 години затвор. Извори на Макфакс тврдат дека спогодбата наводно не била изнудена под притисок и оти се случила само еден  ден откако Костовски се видел со сопругата и сестрата, кои го посетиле во притворското одделение. Мастилото од потпишаната спогодба сè уште не беше исушено, а ВМРО-ДПМНЕ на прес-конференција триумфално ја обзнани оваа вест како „крунски доказ“ за аферата „Пуч“. И по повеќе од две години од овој настан, партијата во заминување го користи овој случај  како главен адут во докажувањето на теоријата за наводен заговор на „домашни и странски непријатели“,„жолти комбиња“ и „чадори“.

Адвокатот на Лазаревски, Драган Малиновски, кој  во одбраната  на неговиот  клиент се вклучил малку подоцна и не учествувал во преговарањата околу спогодбата, ниту ја негираше, ниту ја потврди информацијата дека Лазаревски буквално во последен миг се премислил. Но, останува фактот дека двајца од шестемина обвинети за „Пуч“ биле посебно таргетирани од Обвинителството, со кое во тоа време раководеше Јован Илиевски, баџанакот на поранешниот прв разузнувач во државата Сашо Мијалков и актуелен  македонски судија во Европскиот суд за човекови права во Стразбур. А, случајно или не, токму во директното спогодување  со двајцата професионалци од обвинетиот секстет (во кој беа еден бивши директор на УБК и амбасадор, неговата сопруга, општински функционер и лидерот на најголемата опозициска партија) бил вклучен обвинителот Златко Биковски. Првиот заменик на Илиевски, кој  две години подоцна стана негов наследник на челната позиција во Обвинителеството за организиран криминал.

Да  биде апсурдот поголем, во ситуација кога Специјалното јавно обвинителство  предводено од Катица Јанева  на почетокот на годинава се откажа од обвинението од „Пуч“,поради недостиг на докази, Костовски останува единствениот  осуден  на единствена ефективна  затворска казна од три  години за кривичните дела: неовластено прислушување и шпионажа. И тоа само затоа што пред точно две години и три месеци (25 февруари 2015 година) Костовски ја призна вината и потпиша спогодба со Јавното обвинителство за гонење организиран криминал и корупција, која потоа беше  верификувана од судија на претходна постапка во скопскиот кривичен суд. Но, не треба да се заборави и дека Звонко Костовски е единствениот кој излезе од притвор, благодарение на аболицијата  на претседателот на државата, Ѓорѓи Иванов, која им ја додели и на 55 други лица, главно неколкукратно осомничени од страна на СЈО  од редот на владејачката ВМРО-ДПМНЕ за кривични дела произлезени од незаконското прислушување, но и претставници на опозицијата, обвинители, па дури и сведоци, како Коста Крпач, кој трагично го загуби животот во недокрај разјаснати околности. По силната реакција на домашната и меѓународната јавност, претседателот Иванов се откажа од аболицијата и помилувањата. Но, Костовски остана на слобода.

Со оглед на поништената одлука на шефот на државата, која повеќе не произведува правно дејство, Костовски сега е ставен во деликатна состојба бидејќи Судот бара да се  врати на доиздржување на затворската казна. Како што дознавме, упатот е испратен уште пред два месеца, но Костовски не им е достапен на органите на прогонот. И покрај упатеното писмено  барање  до МВР да добиеме официјален одговор кога точно е испратен упатот за доиздржување, повратен одговор не добивме.

Фактот што семејството на Костовски ангажирало нов бранител (Филип Медарски), кој ќе го застапува околу упатувањето на извршување  на затворската казна и околу вонредните правни лекови, остава впечаток на  каење, но и  извесно дистанцирање на осудениот од претходниот бранител, со кој ја истурка целата процедура околу спогодувањето. Според нашите  информации, полномоштвото на  скопскиот адвокат Љупчо Веселиновски официјално не е откажано, но комуникацијата на релација клиент-бранител е  целосно прекината. Дали ова значи дека сметаат дека адвокатот имал влијание  во потпишувањето на спогодбата? На оваа тема не беше расположена да зборува ниту сестрата на осудениот Костовски, Анета, која во штуриот одговор во кусиот  телефонски разговор не сакаше да зборува околу целиот овој случај. Само рече дека „не знае  каде е  нејзиниот брат“.

Специјалното јавно обвинителство некаде кон средината на октомври 2016 поднесе вонреден правен лек – барање за заштита на законитоста до Врховниот суд  за Звонко Костовски. Од највисокиот суд, пак, тврдеа дека БЗЗ-то стасало кај нив на почетокот на ноември. На крајот, излезе дека виновник за тоа што двете институции извесен период биле „изгубени во комуникацијата“ се Македонски пошти. Барањето, сепак, стаса до крајната дестинација во судската зграда на „Крсте Мисирков“ бб, но тука не е крајот. И по повеќе од седум месеци од доставувањето на барањето за заштита на законитоста  од страна на СЈО до Врховниот суд, предметот сè уште тапка во место,a надлежните си ја префрлаат топката од еден на друг.

Најпрво, од  Врховниот суд потврдија дека барањето за заштита на законитоста против пресудата на Основниот суд Скопје 1 од 25 февруари 2015 година против Звонко Костовски е поднесено на 6 ноември 2016 од страна на СЈО. Но, барањето било доставено  без приложување на судскиот предмет од Кривичниот суд. Од тој момент почнуваат преписките. Веднаш по приемот на БЗЗ-то, Врховниот суд со писмо се обраќа до СЈО, со укажување дека е потребно да се достават списите на предметот  за да  може да постапуваат. Тоа е побарано  со ургенција од 16 декември, во која се инсистира СJО да ги прибави списите. Како одговор на оваа ургенција, СЈО на 26 декември го известува Судот  дека Основниот суд  Скопје 1 ги информирал дека  предметот ќе биде доставен до Врховниот суд, но доколку највисокиот суд достави такво барање до Кривичниот суд.

По ова, Врховниот суд  по третпат се обратил со писмо архивирано на 29 декември до СЈО во кое укажал дека според судската пракса, подносителот на  БЗЗ-то е потребно да ги достави списите на предметот во најкраток  можен рок за да може да се  постапува. Од Судот потенцираат дека од СЈО не им е достаена копија од писмото на Основниот суд  Скопје 1, во кое Обвинителеството се повикува дека не се во можност да го обезбедат бараното,  поради одбивањето  на првостепениот суд.

На 3 јануари 2017 година СЈО  доставило нова ургенција  до Кривичниот суд за да ги добијат списите околу склучената пресуда на Костовски, но остануваат повторно без одговор. Наместо одговор, од Кривичниот суд, со кој во тоа време раководи в.д претседателката Татјана Михајлова (набрзо ќе даде оставка откако Врховниот суд нема да ги прифати нејзините промени на годишниот извештај на судии и ќе застане зад судиите кои поднеле приговори), СЈО ќе биде обвинет дека „не ја познава процедурата“ и на слепо поднесува вонредни правни лекови.И тука прекинува комуникацијата меѓу овие две  институции. На новинарските прашања до каде е постапката, од СЈО креваат раменици и велат дека чекаат.

Макфакс  деновиве се обрати до новиот в.д. претседател на Основниот суд Скопје 1, Стојанче Рибарев, со прашање зошто Кривичниот суд одбива да ги достави списите до СЈО. Тој нè информираше дека целиот предмет со сите списи е доставен до Советот на јавни обвинители уште на 25 февруари оваа година со дозвола на тогашната в.д претседателка Татјана Михајлова, а по писмено барање потпишано од првиот човек на Советот, Петар Аневски.

Трансферот  на предметот на нова адреса ни го потврди и самиот Аневски, кој вели дека  е точно дека ги побарале  комплетните списи за „Пуч“.

„По откажувањето на специјалната јавна обвинителка Катица Јанева од обвинителниот акт за ‘Пуч’, сметавме дека е потребно да го видиме целиот предме, за да ги видиме околностите кои довеле до таква одлука. Во моментов чекаме сите членови да добијат безбедносни сертификати бидејќи само двајца од нас ги поседуваат“, ни изјави Аневски. Тој вели дека дури тогаш ќе можат да ја стават оваа точка на дневен ред на седница. Специјалната јавна обвинителка Катица Јанева еднаш веќе реферираше  пред членовите  на Советот на јавни обвинители за овој случај, а во  друга пригода, и тим составен од  пет обвинители од СЈО.

СЈО на 18 јануари соопшти дека се откажува од обвинителниот акт за „Пуч“, кој ги товари за нелегално прислушување  и за насилство врз највисоките државни органи: Зоран и Соња Верушевски, Бранко Палифров, Ѓорѓи Лазаревски и Зоран Заев. Како главна причина за ваквиот потег беше  наведено дека  фактичката состојба прикажана во обвинителниот акт е во спротивност со доказите со кои ова Јавно обвинителство располага и со наодите во истражните постапки „Таргет“ и „Тврдина“. СЈО тогаш изјави дека ваквата одлука е со цел да се приберат дополнителни докази што во целост ќе ја разјаснат фактичката состојба и ќе овозможат донесување правилна и законита јавнообвинителска одлука. Одлуката ја поздрави СДСМ,според која, се потврдило дека „странските служби, жолтите комбиња, тактичката опрема, клонираните базни станици“ се „несовесна и безобразна измислица на Никола Груевски“. Во дел од медиумите, пак, кои важат за блиски до владејачката ВМРО-ДПМНЕ се појавија  текстови  дека ваквиот чекор е „втора амнестија на Заев од СЈО“.

Обвинителката Ленче Ристоска во изјава за Макфакс дообјаснува дека од контрадикторните  факти во  случаите „Пуч“ и „Таргет“ произлегува дека Костовски не може да биде единствениот  одговорен  за нелегалното прислушување. Затоа, таа  вели дека е неопходно да се направи ревизија на правосилната пресуда и да се утврди одговорноста на сите чинители, но и на фактичката ситуација, која е сосема поинаква.

„Во пресудата не се приложени доволно докази за кривичните дела, од кои ќе се утврди дека Костовски е виновен. Во однос на кривичното дело шпионажа, кое му се става како товар, недозволиво е да  нема директни извршители, а  да биде осуден помагачот, а притоа и да не се утврди во корист на која земја е направено шпионирањето“, додава Ристеска.

Според неа, важно е  целиот случај да биде конзистентен и да се открие вистината околу тоа кој навистина незаконски прислушувал и со каква цел.

Во пресудата  за „Пуч“, која медиумите ја добија користејќи го правото на слободен пристап до информации, стои дека делата на вработениот во МВР, за кои тој беше осуден,започнале во 2010 година.Преку вториот вработен во МВР тој стапил во контакт со првообвинетиот Зоран Верушевски и по негов налог ги злоупотребил техничките капацитети на службата, внесувајќи телефонски броеви на повеќе политичари и други јавни личности. Во пресудата можат да се видат иницијалите на  дел од прислушуваните, меѓу кои можат да се препознат првите букви од имињата на експремиерот Никола Груевски, неговиот  братучед  и прв разузнувач во државата Сашо Мијалков,поранешните министри Гордана Јанкуловска, Миле Јанакиевски, но и Радмила Шекеринска, Бранко Црвенковски… Потоа, наводно снимените разговори осудениот му ги давал на колегата од МВР, кој, пак, му ги предавал на Верушевски. Крајната дестинација биле странските  тајни служби.

Сè дотука е историја. Она што следеше натаму им даде сосема друг тек на работите. По објавувањето на „бомбите“ на опозицијата, Договорот во Пржино, формирањето на Специјалното јавно обвинителство, но и излегувањето на виделина на првите истражни постапки, во кои СЈО излезе со  податоци за уништување на двата прислушни системи во МВР, како и за  масовно незаконско прислушување без судски налог, полека почуваат да се составуваат камчињата  од  политичкиот мозаик од децениското  владеење на ВМРО-ДПМНЕ.

Уште повеќе што специјалната јавна обвинителка Катица Јанева на една од последните прес-конференции обелодени и дека во однос на предметот „Пуч“ (некомплетен), кој е доставен  до СЈО од Основното јавно обвинителство како доказ  им е доставен и хард дискот, за кој е утврдено дека потекнува од канцеларијата  во УБК на веќе осудениот Звонко Костовски, но тој доказ, како што велат од СЈО, не е приложен во листата на докази. Според анализата на овој доказ, тимот на СЈО констатирал дека таргет на прислушување е лидерот на СДСМ, Зоран Заев, и дека тие комуникации се следени без издадени судски наредби, односно незаконски.

Со ваквата најнова разврска во случајот „Пуч“ останува да „виси“ пресудата изречена за шестообвинетиот Звонко Костовски. Дали фактот што Костовски може да се јави во улога на  главен сведок во „Тврдина“, кој треба да ја открие вистината кој и за каква цел прислушувал, создава  институционална спрега, чија крајна цел е сопирање на работата на СЈО? Уште повеќе поради тоа што тимот на Јанева го троши   последниот од 18-те предвидени месеци за поднесување обвиненија. Од СЈО не сакаат да прејудицираат такво нешто, но велат, никогаш не се знае.

Гордана Дувњак

 



©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news

Прва правна конференција Tres Partes

Објавено пред

На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.

Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.

Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.

Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.

Предвиден е и интерактивен дел со публиката преку поставување прашања и коментари од учесниците.

 

Прикажи повеќе...

Daily news

Груевски оди во затвор – Апелација му ја потврди казната

Објавено пред

Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.

Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.

За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.

Прикажи повеќе...

Daily news

Бизнисменот Минчо Јорданов треба да сведочи дали бил уценет со пари во шпионската афера

Објавено пред

Spion

Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.

Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.

„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.

Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.

Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.

Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.

Прикажи повеќе...

Најново

Регион45 минути

Најмалку седум деца мигранти речиси измрзнале на планинскиот премин меѓу Хрватска и БиХ

Најмалку седум деца мигранти, кои со родителите вчера тргнале пешки од Босна и Херцеговина преку планината Пљешевица, се сериозно повредени,...

Македонија51 минута

Путин: Постои надворешен притисок околу зачленувањето на Македонија во НАТО

Кога станува збор за ситуацијата на Балканот, тогаш може да се каже дека тука сериозен дестабилизирачки фактор тука преставува политиката...

Регион1 час

Романија ја претстави програмата за претседавање со ЕУ

Романската премиерка, Виорика Данчила, вчера пред Европскиот парламент ги презентира приоритетите на романското претседателство со Европската Унија. „Првата фаза ќе...

Вести1 час

Грчкиот парламент ќе гласа недоверба на владата на Алексис Ципрас

Денеска во грчкиот парламент продолжува седницата на чиј дневен ред е една точка – недоверба на владата на Алексис Ципрас....

Македонија1 час

Владата една и пол година ги слави празниците на Груевски, Законот за празниците нечепнат

Владата една и пол година ја разгледува можноста за укинување дел од неработните денови и измена на Законот за празниците,...

Свет2 часа

Британскиот парламент ќе гласа за недоверба на владата на Меј

Британската премиерка Тереза Меј денеска треба да се соочи со гласање за недоверба, еден ден откако парламентот го отфрли нејзиниот...

Свет2 часа

Помпео: Иранските ракети за сателити се закана за Европа и Блискиот Исток  

Неуспешниот обид на Иран да ландира сателит во орбитата со трифазна ракета покажува дека намерата на Исламиската Република е да...

Свет3 часа

Американскиот  Стејт департмент: Американските граѓани во странство се цел на терористите од ИД и Ал Каеда

Американскиот Стејт департмент во својата најнова серија совет и препораки за своите граѓани низ светот предупреди дека американските граѓани се...

Свет4 часа

Отава побара од Пекинг помилување за канадскиот државјанин осуден на смрт

Канадскиот министер за надворешни работи, Кристија Фриленд, во вторникот информираше дека Отава официјално побарала од Пекинг да го поштеди животот...

Свет14 часа

Тереза Меј доживеа голем пораз, парламентот го одби нејзиниот предлог за брегзит

Британските пратеници вечерва гласаа против предлогот на премиерката Тереза Меј за договор за излез на Велика Британија од Европската Унија,...

Регион15 часа

Девојче од БиХ почина од сепса предизвикана од сипаници

Деветгодишно девојче од Читлук во Босна и Херцеговина починала во неделата во болница во Задар, откако настанале компликации за време...

Регион15 часа

Приштина попушти и ги повлече даноците на дел од производите од Србија и БиХ

Привремените приштински институции одлучија да ослободат од стопроцентно зголемените даноци на дел од производите од Србија и БиХ, пренесуваат српските...

Свет16 часа

(Видео) Најмалку петмина убиени во нападот на хотелски комплекс во Најроби

Најмалку пет луѓе се убиени, а четворица се повредени во напад на луксузен хотелски комплекс во Најроби, кој полицијата го...

Македонија18 часа

(Видео) Филипче бара максимална казна за „Македонијалек“ за техничката грешка со декларацијата на МРП-вакцините

Министерот за здравство, Венко Филипче, денеска изјави дека е завршен увидот на инспекторите од МАЛМЕД во сите места каде што...

Истражувања19 часа

(ВИДЕО) Градоначалничката на Арачиново со службени пари купувала суџук, мирисливи свеќи, пилешки гради и дрвени лажици

Цигари, влажни марамчиња, мирисливи свеќи, калап за печење мафини, решо, дрвени лажици, чајник, се дел од работите што Општина Арачиново...

Култура20 часа

Министерството за култура унапредува по етничка основа, а брка реномирани советници

На почетокот на годината Министерството за култура унапреди 20 службеници во разни сектори, а се поздрави со советникот и креатор...

Македонија21 час

(Видео) Претседателските избори ќе се одржат на 21 април, а ќе има и локални во 3 општини

Поради Велигден, за една недела ќе се помести првичната идеја за одржување на претседателските избори на 14 април. Според процените...

Македонија21 час

(Видео) Џафери: Не чувствувам одговорност, постапив во согласност со надлежностите

Вчера, во својство на претседател на Собранието, во согласност со моите надлежности, потпишав два указа и ги испратив во „Службен...

Вести22 часа

Каменос: Ќе сторам сè актуелната влада да не добие поддршка

Ќе ги искористам сите расположливи механизми што ми се на располагање сегашната влада да не добие поддршка за договорот од...

Македонија22 часа

Иванов: Објавувањето на Законот за јазиците во „Службен весник“ е противуставно и незаконски

Објавувањето на Законот за јазиците во „Службен весник“ е противуставен чекор, велат од кабинетот на претседателот Ѓорге Иванов. Оттаму велат...

Досие