Контакт

Истражувања

Печатите на ДИК никогаш не биле украдени, зошто Бонева измисли скандал?

Објавено пред

Во октомври лани, Силвана Бонева, членка на Државната изборна комисија (ДИК) од ВМРО ДПМНЕ прва го откри наводниот скандал дека недостасуваат печати во депото на комисијата сместено во касарната Илинден. Тоа се печати на кои е напишан бројот на гласачкото место, а се удираат на гласачките ливчиња. Тоа значи дека колку гласачки места има во одредена општина има толку и печати.

dobivaj vesti na viber

Членовите на власта во Изборната комисија на почетокот тврдеа дека недостасуваат сите 45 печати од гласачките места во Бутел. Потоа дека снемало и печати од Сопиште, Брвеница, Липково и уште неколку општини.

Иако со овој наводен скандал се крена фама во предизборието и се предизвика конфронтација меѓу членовите во ДИК, на релација опозиција- власта, сепак случајот останува незавршен и некомплетно истражен од институциите.

Со оглед дека оваа сторија ќе докаже дека печатите од ДИК воопшто не исчезнале, туку сето тоа било инстант измислица, логично е прашањето кому и зошто му требаше лагата со печатите и каков интерес кријат партиите од власта?

КОМИСИЈАТА ЗА ПОПИС ЈА ВОДЕЛ ВОЗАЧОТ НА СУБХИ ЈАКУПИ
Изборниот материјал, како и печатите на ДИК од сите избирачки места во сите општини се под воена заштита во касарната Илинден, во објектот кај армиските Ренџери. Таму безбедноста е голема- прво легитимираат и проверуваат на главниот влез, а потоа имало уште една контрола пред самиот објект во кој се сместувале материјалите, кутиите за гласање и печатите по завршување на изборите, се до наредните.

Извори од ДИК информираат дека од 2001-та до 2016-та таму неограничен пристап имало едно лице, Љупчо Стружанчев, одговорен за депото, инаку вработен во Собранието на РМ, кој на сите избори бил во помошното тело на ДИК задолжено за безбедноста на изборниот материјал. Тој имал и посебни овластувања и соработка со воената полиција, односно можност кога сака да влезе во магацинот со изборни материјали. Тој практично беше првиот и единствениот што настрада откако членовите на ВМРО ДПМНЕ и на ДУИ во ДИК искреираа лажна афера дека му недостасуваат печати.

По неколку месеци од завршување на изборите Макфакс истражуваше и преку вработени во ДИК ги пронајде извештајот на Комисијата формирана од ДИК која направила попис и наводно констатирала дека недостасуваат печатите, записниците за примопредавање на избирачкиот материјал и писмото кое Стружанчев го има испратено до претседателот на ДИК, Александар Чичаковски.

Целата документација потврдува дека печатите не се украдени и се кај ДИК, но ако е така зошто ДИК, или истражните органи како Јавното обвинителство не покренат постапка за пласирањето на лажната афера и зошто не се утврди кому му беше неопходна промена на одговорната функција во депото, онаа на Струженчев?

Комисијата за попис во депото имала четворица членови, претседател бил Вели Абдија, возач на членот на ДИК, Субхи Јакупи, а други двајца биле вработени во ДИК со договор на дело. Нивниот увид во магацинот е направен без присуство на овластениот Струженчев. Откако избројале се што имале на увид членовите на комисијата за попис во извештајот утврдиле дека недостасуваат печати од неколку општини, некаде по еден до два, некаде сите комплет.

Е сега, како е можно комисијата да утврдила дека недостасуваат печатите, ДИК да расправа за тоа, Стружанчев да биде отстранет, а при тоа фактичката состојба укажува дека сепак печатите се тука? И пострашното- зошто ништо не се презема понатаму, дали против членовите на комисијата или против членовите на ДИК кои имаа став дека печатите се украдени и тоа го пласираа во јавноста?

ПЕЧАТИТЕ СЕ ВО ДИК, А ПОПИСНАТА КОМИСИЈА ГИ БАРАЛА ВО ДЕПОТО
Дали намерно или од незнаење Комисијата за попис самата направила грешки при броењето и при споредување на материјалите, доколку воопшто го правела тоа, а требала да го прави.

Имено, од општина Бутел навистина ги немало сите 45 печати колку што има гласачки места во оваа скопска општина. Тоа и го заклучила комисијата во извештајот. Но, ако сакала, а можела и требала, комисијата да го провери Записникот за примопредавање на избирачкиот материјал потпишан по завршување на претходните избори, оние во 2014-та. Во него се наведува дека општинската изборна комисија од Бутел на одговорното лице од депото на ДИК му доставува 110 гласачки кутии, но дека сите 45 печати се предадени во ДИК заедно со резултатите од гласањето.

На записникот, како потврда дека печатите се предадени во ДИК наместо во депото, се потпишани двајца членови на општинската изборна комисија. Ова значи дека комисијата за попис иницирана од Бонева и Јакупи требала да го има записникот на увид, а може и го имала, за да знае дека не може во извештајот да нотира дека недостасуваат печатите во Бутел, уште повеќе ако се знае дека записникот уште во 2014-та е предаден во ДИК.
Слично е и со печатите од општинската изборна комисија во Пласница.

Комисијата за попис утврдила дека сите девет печати недостасуваат, иако во Записникот за примопредавање јасно е нотирано дека по завршување на изборите во 2014-та изборната комисија во Пласница ги предала печатите во подрачното одделение на ДИК.

Ако и за ова ДИК била известена и знаела дека печатите се во кичевската комисија, а не во депото како и зошто дозволила Комисијата за попис товарот да го стави врз Стружанчев и тој да биде повлечен од одговорната функција во депото?

Понатаму, што се однесува до печатите од општина Липково, Комисијата за попис во извештајот запишала дека пронашла 30 и дека недостасуваат шест печати. Но, како е утврдена бројката од 30 не сака да зборува никој. Фактите покажуваат друго.

Имено, освен што печатите се бројат еден по еден, со секој печат се удира отисок на таканаречен контролен лист. Тоа го правела и комисијата. Во случајот со Липково на тој контролен лист удрени се сите 36 печати од самата Комисија за попис и сите 36 се од различно гласачко место. Тогаш зошто членовите на комисијата во извештајот запишале дека има 30, кога удриле печат со сите 36? Дополнително, од записникот за примопредавање на избирачките материјали јасно се гледа дека општинската изборна комисија за Липково предала во депото 88 гласачки кутии и 36 печати.

Комисијата во обид да докаже дека недостасуваат печати во депото запишала во извештајот дека еден печат недостасува во општина Сопиште. Но, и тука погрешиле или намерно измислиле за да се креира скандалот? Комисијата можела само да погледне во записникот за примопредавање на избирачките материјали за оваа општина и лесно да заклучи дека уште во 2014-тата, по завршување на изборите, е нотирано дека општинската изборна комисија во Сопиште предала 13 печати и дека 14-тиот, за гласачко место 2420, недостасува. Тој записник е доставен уште пред две години во ДИК што значи главната комисија знаеле дека е пријавен печатот што недостасува уште две години пред пописот и Комисијата за попис не смеела да евидентира дека е украден.

Недоследност во броењето или во штимањето на вкупниот број печати е направено и со печатите во Крива Паланка и во Гостивар. Имено, општинската комисија за Крива Паланка има 47 печати, но Комисијата за попис запишала дека еден недостасува и дека има 46, додека кај Гостивар иако има 121 избирачко место, пописната комисија навела во извештајот дека има 122 печати, еден повеќе. Проверката на документите покажува дека едниот помалку од Крива Паланка е удрен на контролниот лист за Гостивар, од избирачко место 0944 и така настанал пропустот. Но комсијата за попис не може да подготви извештај ако прави вакви технички грешки.

Според извештајот на пописната комисија вишок на печати се појавиле и во Ѓорче Петров па завеле дека се избројани 58, иако таа општина има 53 избирачки места. Ова останува целосно нејасно како е можно?

ВОЗАЧОТ СТАНА ЧУВАР НА ИЗБИРАЧКИОТ МАТЕРИЈАЛ
И така, намерните или ненамерните грешки на пописната комисија, членовите на власта во ДИК го искористија да пласираат лажна кражба на печатите во ДИК, особено упорна беше Бонева. Дали нејзината цел била само од таму да се отстрани долгогодишниот „чувар“ на изборниот материјал Љупчо Стружанчев, иако знаеле дека нема ниту кражба, ниту дека недостасуваат печати? Како и да е, на неговото место, после 15 години и промена на неколку претседатели на ДИК, за одоворен во депото беше поставен токму возачот на Јакупи, или претседателот на пописната комисија, Вели Абдија.

Освен одговорниот, во моментов Абдија, во тоа истурено тело на ДИК, задолжено за чување и складирање на избирачкиот материјал, како и негова дистрибуција до гласачките места, се ангажираат 30-тина лица, поголем дел од Собрание. Обично тие имаат ангажман месец до месец и половина, околу изборите. Ако власта знаела дека печатите се тука, дека аферата е намерно креирана, тогаш дали само смената на Стружанчев и поставувањето на Абдија била целта на скандалот? Оти друго не произлегува од овој случај како заклучок. Ако таму е поставен партиски човек од доверба тогаш мора да се провери, преку официјална истрага, кој е нивниот интерес, дали е финансиски или е битка за влијание?

Во обид да дознаеме повеќе зборувавме со Стружанчев кој очекува конечно надлжените органи како Јавното обвинителство, Специјалното јавно обвинителство и воената полиција да се активираат и да откријат кому и за што му послужи лажната афера.

„Јас сум категоричен и ќе повторам дека сите печати се тука. Никој ниту упаднал во депото, ниту пак недостасува печат. За тие кои ги нема, ДИК знае уште многу одамна. Постои цела документација за избирачкиот материјал и јас се надевам дека нема да останам единствениот „виновник“ во случајот, туку дека ќе се открие зошто беше ова направено и по чиј налог.

Како капак на сè, или како потврда дека комисијата за попис ја утнала работата и измислила скандал е фактот дека ДИК не го прифаќа извештајот на Комисијата за попис, па дури се споменува дека треба да се спроведе нов. Членот на ДИК, Јакупи изјави дека не може да се сети дали извештајот на комисијата за попис е прифатен или не, но знае дека таа точка била тргната од јавна седница на ДИК и ставена да се расправа во работна група.

„Јас лично не сум вмешан во овој скандал. Знам дека Бонева беше упорна во пласирањето на информациите и дека таа се конфронтираше со членот Виолета Дума. Смената на Стружанчев е направена затоа што тој доаѓа од Собранието, а Абдија, новиот, е вработен во ДИК, па сметавме дека така е подобро и за нас како комисија, но и лично за Стружанчев за да ја нема на грб таквата одговорност. Ни на крај памет не ми било да го оцрнам него затоа што одамна имаме коректна соработка. Но ете, испадна дека тој е сменет, а целиот случај остана неразјаснет“ – коментира Јакупи.

Дали извештајот е прифатен и дали писмото на кое Стружанчев му го испратил на претседателот на ДИК, го има премислено Чичаковски да не покажува инетерес за случајот. Во писмото, според извори од ДИК, се наведува, освен фактите за печатите, дека пописната комисија во извештајот навела дека во просториите во касарната се чуваат и гласачки ливчиња од изборите во 2013-та, избори за кои Специјалното јавно обвинителство има отворено истрага, но тоа не може да е точно затоа што тогаш имаше локални избори, а тие материјали се чуваат во единиците на локалните самоуправи, а не во магацинот во касарната. Исто така пописната комисија навела дека има 73 кутии со избирачки списоци од парламентарните и претседателските избори во 2014-та, но не допишала дека се затворени со нумерирани сигурносни ленти.

Чичаковски, пак, изјави дека овој случај е практично затворен. Потврдува дека немало кражба на печатите, а смената на Стружанчев ја објаснува со потребите на Специјалното јавно обвинителство и Јавното обвинителство. „Нам ни е подобро магацинот во касарната да го управуваат вработени во ДИК, а не лица од надвор, како претходникот од Собрание затоа што вака нашите вработени ќе имаат овластување да постапуваат по наредби и барања на СЈО, доколку се појави потреба.

Многу прашања ќе останат неодговорени за овој наводен скандал затоа што тие што ги знаат одговорите сигурно знаат зошто беше неопходна промената на „чуварот“ на гласачкиот материјал. Но, тешко дека би признале. /крај/мф

Љубиша Арсиќ



©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Истражувања

(Видео) Нафтениот тајкун и пратеник од ДУИ, Јахоски, му ја продал куќата на Таравари во Тафталиџе, комшии му се министри и бизнисмени

Објавено пред

Куќата во скопско Тафталиџе на Арбен Таравари, актуелен градоначалник на Гостивар и лидер на Алијансата за Албанците, по цена далеку пониска од пазарната му ја продал пратеникот од ДУИ, Исмаил Јахоски, кој пет мандати беше градоначалник на Пласница и чие семејство е сопственик на „Пуцко петрол“. „Макфакс“ дојде до официјалниот документ, кој покажува дека последниот сопственик на куќата во Тафталиџе пред Таравари да ја купи бил пратеникот Јахоски заедно со сопругата Љупка-Еда Јахоска.

dobivaj vesti na viber

Со купувањето на куќата, Таравари во соседството е опкружен со видни бизнисмени, но и политичари од партијата ДУИ. На неколку чекори од неговиот двор живее министерот за финансии, Фатмир Бесими. На истата улица кај Бесими куќа има и бизнисменот Фатмир Етеми, кој е поранешен пратеник од ПДПА, кој изгради деветкатница кај „Мајчин дом“ во Аеродром.

Иако му ја продаде куќата, семејството Јахоски останува прв сосед на Таравари оти Љупка-Еда Јахоска, според податоците од Катастарот, е сопственичка на соседната парцела.

Историјатот од Катастарот покажува дека Јахоска во 2013 станала сопственичка на куќата што денес ја поседува Таравари. Делела по една половина со Иса Јаоски. Во 2017 година делот од Иса Јаоски како дар го добил пратеникот Јахоски. По четири години, во 2021 година, врз основа на договор за купопродажба како сопственик е внесен Таравари.

Таравари во анкетниот лист истовремено ги пријавил куќата од 150 илјади евра и кредит од 100 илјади евра

Според анкетниот лист пријавен во Државната комисија за спречување корупција, Таравари за квадратен метар платил 576,5 евра, иако пазарната цена за квадрат надминува 1.500 евра и сега и во 2021 година кога била направена купопродажбата. Извештаите на Државниот завод за статистика (ДЗС) покажуваат дека и во 2019 година, две години пред Таравари да ја купи куќата, просечната цена на квадрат во Скопје била 1.000 евра, а од тогаш наваму цените се во постојан пораст.

Таравари смета дека цената од 150 илјади евра за 261 квадрат во Тафталиџе е реална и нагласува дека цените сега и пред две години се разликуваат

Таравари за „Макфакс“, сепак, тврди дека платил реална цена за куќата и не даде никаков коментар на обвинувањата за партиски пазар и сомнеж за корупција.

„Куќата е купена во јуни 2021 година со комплетно уредна документација. Пријавена е во анкетниот лист уште 2021 година, а според состојбата во која беше купена куќата во 2021 година, таа ѝ е реалната цена за тоа време. Инаку, цените на становите и куќите сега и пред две години се разликуваат“, рече Таравари.

Пратеникот Јахоски вели дека има обичен мобилен и не ги гледа пораките со прашања за купопродажбата

Пратеникот од ДУИ, Јахоски, не одговори на прашањата од „Макфакс“ зошто му направил попуст на Таравари и со тоа оставил простор за сомнеж за корупција и политички пазар, како што обвинува опозицијата.

„На седница сум“, рече пратеникот, кој самиот се јави во „Макфакс“ оти, како што рече, му стигнала празна порака, но спушти слушалка кога ги слушна прашањата што му беа испратени во пораката. Рече дека има обичен телефон и не гледа прашања, а не одговори ниту на прашањата испратени по имејл.

Таравари, истовремено, со купувањето на куќата за која навел дека вреди 150 илјади евра, во анкетниот лист пријавил и кредит од 100 илјади евра.

Државната комисија за спречување корупција ги истражува сите наводи во анкетниот лист на Таравари, вклучително и цената на куќата.

„Имаме предмет за Таравари, но сè уште се работи и во овој момент немаме исход што би можел да се соопшти“, вели Билјана Ивановска, претседателка на ДКСК, за „Макфакс“.

Управата за финансиска полиција, пак, како најповикана институција за следење на патот на парите и откривање криминал во функционерските кругови, една недела не одговара на прашањата од „Макфакс“ за цената што Таравари ја платил за куќата по јавно искажаните сомнежи за корупција ниту, пак, извести дали на кој било начин оформиле предмет за овој случај. Новиот директор на Управата, Горан Иванов, не контактира со медиумите, освен во случаи кога Управата преку соопштение, еднострано, ѝ се обраќа на јавноста. За случајот на Таравари, досега од оваа институција немаше соопштение.

Прикажи повеќе...

Истражувања

Разрешена директорка зела плата и го возела службениот автомобил

Објавено пред

Ексдиректорката на Државниот комунален инспекторат, Елизабета Јованчева, и разрешена зела плата, го возела службениот автомобил и потпишувала документи, а нејзините колеги сведочат и дека заминала на обука во Италија за која си зела и дневници. Инспекторатот сега судски бара ексдиректорката да врати 26.832 денари, што ѝ биле префрлени како плата по разрешувањето, а откако ќе ја добие пресудата за платата, ќе поведе постапка и за сите останати трошоци што ги направила во периодот по одлуката на Владата.

dobivaj vesti na viber

„Владата ја разреши Јованчева на 15 мај 2018 година, без образложение, со назнака дека одлуката стапува на сила веднаш, но таа си остана на функцијата до јуни. Место само за 15 дена од мај, таа си потпиша плата за цел месец. Одвреме-навреме доаѓаше и на работа. Кога ја прашавме зошто доаѓа и по одлуката на Владата, таа кажуваше дека чека официјално известување“, велат вработени во Инспекторатот кои сакаа да останат анонимни.

Инспекторатот бил без директор до август 2018 година кога Владата го назначила Зоран Маџовски за в.д. директор, но по само две недели го разрешила и него и за в.д. директор е назначен Сали Ајдини, кој сè уште е на функцијата. Со негов потпис, Државниот комунален инспекторат во октомври лани побарал од Јованчева да ги врати парите што ги добила како вишок средства со платата. Со истиот допис ја известиле ексдиректорката дека ако не ги врати парите, ќе почнат судска постапка.

Јованчева им одговорила дека барањето им е неосновано, па Инспекторатот побарал милење од Државното правобранителство. Правобранителството го прифатило барањето и го известило Инспекторатот дека случајот е испратен за постапување до Државното правобранителство во Штип, надлежно да постапува доколку е потребно да биде поведена судска постапка.

„Правобранителството нè извести дека подготвително рочиште за предметот е закажано за во март годинава. Нашиот став е дека поранешната директорка треба да ги врати парите за половина месец оти одлуката на Влада за нејзино разрешување стапи на сила веднаш и таа беше одјавена од социјално осигурување“, изјави директорот Ајдини за „Макфакс“.

Државниот комунален инспекторат во октомври лани побарал од Јованчева да ги врати парите што ги добила како вишок средства со платата

„Макфакс“ ја контактираше ексдиректорката Јованчева, но таа не сакаше да зборува за случајот.

Владата, која ја назначи и ја разреши Јованчева, не одговори на прашањата кое е образложението за нејзиното разрешување и зошто постојано дозволуваат Инспекторатот да е без директор.

„Во однос на кадровските прашања во Владата на Република Македонија, има комисија за кадровски прашања, која за секое лице поединечно ги проверува содржините на поднесената документација за да се провери дали ги исполнуваат условите за именување и соодветно на фактите, со потврдата за исполнување на условите за именување, Владата ги именува истите“, е коментарот на Владата како одговор на прашањата за смената на Јованчева.

Владата ја назначи за директорка Јованчева на 26 јануари 2018 година откако Инспекторатот беше три месеци без директор, оти дотогашниот стана градоначалник, а вработените беа без плата. Една од првите обврски на Јованчева беше потпишувањето на платата.

 

Прикажи повеќе...

Истражувања

(Видео) „Лимак“ и Градот ги изиграа скопјани, се гради хотел место прво да се изгради подземната сообраќајница

Објавено пред

Место прво да ја изгради подземната сообраќајница па потоа да ги гради содржините над земја, турската компанија „Лимак“ кај Стара железничка прво гради хотел. Зад „Рамстор“ веќе се гледа објект од приземје и четири ката, а во исто време на трасата на подземната сообраќајница видливи се само подготовки за градење. Овој проект е уште еден во низата проекти што имаат поддршка и од ВМРО-ДПМНЕ и од СДСМ. Во време на ВМРО-ДПМНЕ во 2012 година беше продадено државното земјиште, но се молчеше иако со години не се градеше, а властите од СДСМ, пак, лани наплатија комуналии за сите предвидени објекти и издадоа одобренија за градење и покрај мораториумот за градење во Центар.

dobivaj vesti na viber

Сега властите молчат за редоследот на градење. Обврската прво да ја изградат подземната сообраќајница на Турците им ја наметна поранешниот градоначалник на Скопје Коце Трајановски, веднаш по продажбата на земјиштето во 2012 година. Трајановски ги уверуваше скопјани дека Град Скопје склучил договор со Турците кој нема да дозволи тие да си ги изградат комерцијалните содржини над земја и да ја баталат подземната сообраќајница бидејќи се обврзале прво да ја изградат сообраќајницата, а дури потоа да почнат да ги градат другите содржини. Изградбата се одолговлекуваше со години, а кога веќе почнаа да градат минатата година, Турците покажаа дека приоритетен им е хотелот, спротивно на уверувањата на поранешниот градоначалник.

Иако објектот зад „Рамстор“ секојдневно расте, и од Град Скопје и од „Лимак“ велат дека не е прекршен договорот за изградба на подземната сообраќајница.

Од Градот тврдат дека е на сила договорот што го потпишал поранешниот градоначалник, но го сокрија кога „Макфакс“ со барање за пристап до информации од јавен карактер побара копија. Не одговорија на барањето и по истекот на законскиот рок од еден месец.

„Градот Скопје го нема променето договорот склучен помеѓу Град Скопје и ‘Лимак’ од 12.03.2012 година“, кусо одговорија од Градот на прашањето кога го смениле договорот што го обврзува „Лимак“ прво да ја изгради подземната сообраќајница, а потоа да ги гради останатите содржини со оглед на сегашната состојба на градилиштето зад „Рамстор“.

Од „Лимак“ избегнаа да одговорат директно на прашањето зошто не ја изградија подземната сообраќајница пред да почнат да ги градат другите содржини. Велат дека и покрај одолговлекувањето, ќе ги исполнат обврските од договорот потпишан во 2012 година.

„Според распоредот за изградба на ‘Лимак’, подземната сообраќајница ќе биде прва точка од проектот на ‘Лимак’, кој ќе се гради на парцелата 1.1. ‘Лимак’ прво ќе ја гради подземната сообраќајница на секвенци на парцелата 1.1 и ќе работи нагоре за да ги комплетира паркинзите, а дури потоа ќе почне со активности за изградба на станбените објекти и трговскиот центар кои е предвидено да се наоѓаат на ова место. Според инженерите, ова е сосема изводлив проект. Планирано и буџетирано е дека ‘Лимак’ ќе инвестира до 250 милиони евра за да го заврши овој проект“, изјавија од „Лимак“ за „Макфакс“.

Од компанијата се правдаат дека почнале да го градат хотелот зад „Рамстор“ оти заедно со локацијата го презеле и одобрението за градење што претходниот инвеститор го добил во 2008 година. Морале да почнат да градат оти биле обврзани во рок од десет години од издавањето на одобрението градбата да заврши. Поради истечениот рок за завршување на градбата „Лимак“ плаќа казна од два милиона денари месечно.

Официјално изградбата на комплексот кај Јужен булевар Турците ја почнаа лани во септември и најавија дека подземната сообраќајница ќе биде готова за 20 месеци, односно до средната на 2020 година. Ќе се гради прво потпорен ѕид од 17.000 квадратни метри околу сите парцели опфатени со проектот.

„Лимак“ на просторот кај Стара железничка станица покрај подземната сообраќајница најави изградба на мултифункционален комплекс со четири дваесеткатници, трговски центар, простор за рекреација, угостителски објекти и паркинг. Земјиштето со вкупна површина од 41.824 квадратни метри во 2012 година го купи за 3,7 милиони евра. Лани за комуналии на Град Скопје се обврза да му исплати 6,5 милиони евра на рати, а за 20 отсто помала сума треба да исплати на име комуналии и во Општина Центар.

Прикажи повеќе...

Најново

Македонија1 час

Ванковска: Преспанскиот и Бугарскиот договор се колонизаторски договори

Професорката Билјана Ванковска и претседателски кандидат на Левица во Фејсбук статус истакнува дека има разочарани млади луѓе кои мислат дека...

Свет2 часа

Масовен руски напад врз Харков: Бомби паѓаа цела ноќ, две лица загинаа

Во текот на ноќта руските војници гранатираа 17 населени места во областа Херсон, при што загинаа две лица, а четворица...

Свет2 часа

Две тела пронајдени во автомобил под урнатиот мост во Балтимор, паднале од височина од 50 метри во водата

Полицијата во американската сојузна држава Мериленд објави дека две тела биле пронајдени во автомобил во реката Патапско каде мостот Френсис...

Македонија2 часа

Целосен молк од страна на Пендаровски, Ковачевски и СДС за улогата и начинот на ангажирање на спорниот странски консултат, Асаф Еисин, велат од ВМРО-ДПМНЕ

Целосен молк од страна на Пендаровски, Ковачевски и СДС за улогата и начинот на ангажирање на спорниот странски консултат, Асаф...

Регион2 часа

Потрагата по Данка Илиќ продолжува трет ден, се проверуваат телефоните на родителите

И покрај прекинатата теренска потрага по Данка во Бањско Поле и околината, полицијата продолжува со интензивна оперативна работа за утврдување...

Свет2 часа

Путин: Обвинувањата дека Русија ќе ја нападне Европа по Украина се целосна глупост

Рускиот претседател Владимир Путин ги осуди обвинувањата на Западот дека Русија планира да се бори против Европа. Ги нарече „целосна...

Свет2 часа

Маж во Илиноис уби четири лица и избоде петмина, нападот траел 20 минути

Четири лица загинаа, а пет се повредени во напад во Рокфорд, Илиноис, додека 22-годишен осомничен е уапсен. Полицијата, исто така,...

Македонија17 часа

Турската демократска партија се приклучува на Европскиот фронт, Ахмети: Овој сојуз е историски

По потпишувањето на коалицијата за Европскиот фронт со ДПА на Мендух Тачи, Народното движење на Скендер Реџепи Зејд, ПДЕ на...

Македонија18 часа

Тошковски: Ќе сторам сè МВР да гарантира организирање на безбедни избори

Денеска министерот за внатрешни работи Панче Тошковски присуствуваше на панел дискусија „Зајакнување на соработката помеѓу институциите за проценка на изборните...

Македонија20 часа

Дисциплински постапки за петмина полицајци за пукањето пред тетовската болница

Поднесени се две две кривични пријави од СВР Тетово против М. Т., полициски службеник во Полициската станица за граничен надзор...

Македонија21 час

ГРОМ, Интегра и ПЦЕР се здружија: коалицијата „Храбро за Македонија“ нема да поддржи уставни промени ниту пред ниту по изборите

Политичките партии Граѓанската опција за Македонија (ГРОМ), Интегра и Партијата за целосна еманципација на Ромите (ПЦЕР) денес се здружија во...

Македонија21 час

„Вреди“: Албанците нема да му простат на Бујар Османи за случајот Монструм

Претходно кога објаснувавме кој е Бујар Османи, дојде време да се откриваат неговите корупциски скандали, но и политичките ставови што...

Македонија23 часа

Мицкоски: Имаме принципиелен договор за настап на парламентарните избори врз кој ќе функционираме како идна влада

Ние имаме принципиелни разговори и преговори и принципиелен заеднички договор за настап на следните парламентарни избори и очекуваме понатаму, врз...

Свет1 ден

Бајден: Да ja ​​заштитиме Украина од месарот Путин

Американскиот претседател Џозеф Бајден уште еднаш го навреди рускиот претседател Владимир Путин говорејќи пред гласачите во американската сојузна држава Северна...

Регион1 ден

Вучиќ: Следуваат тешки денови за Србија, не ми е лесно да кажам какви вести добивме

Српскиот претседател Александар Вучиќ синоќа изјави дека пред Србија претстојат тешки денови, пренесува „Нова.рс“. Вучиќ најави дека во наредните денови...

Македонија1 ден

СДСМ: Скопје е запустен град, граѓаните се изневерени, ДПМНЕ нема план за иднината

Платформа од минатиот век се новите лажни ветувања на ДПМНЕ по примерот на Скопје. Откако ги изневерија граѓаните на Скопје,...

Регион1 ден

Трае потрагата по исчезнатото двегодишно девојче во Србија

Трае потрагата по двегодишното девојче, кое исчезна вчера околу 13.45 часот во приградската населба Бањско Поле, недалеку од Бор во...

Свет1 ден

Израел во текот на ноќта жестоко го бомбардира јужниот дел на Газа: „Луѓето умираат само за да добијат конзерва туна“

Израел во текот на ноќта интензивно го бомбардираше јужниот дел на Појасот Газа, и покрај меѓународниот притисок за итен прекин...

Свет1 ден

„Не веруваме дека ќе ги пронајдеме живи“: Запрена потрагата по исчезнатите лица по уривањето на мостот во Балтимор

Спасувачките екипи ја прекинаа потрагата по шест лица исчезнати по уривањето на мостот во Балтимор, бидејќи се претпоставува дека се...

Македонија1 ден

Османи со дипломатскиот кор за четвртата годишнина од членството на Македонија во НАТО

Со цел одбележување на 4-та годишнина од членството на Северна Македонија во НАТО, министерот за надворешни работи, Бујар Османи, денеска...