Култура
(Видео) Кои се десетте филмови номинирани за Оскар во категоријата најдобар филм

Академијата за филмски уметности и науки ги објави номинациите за овогодинешните Оскари.
Филмот Емилија Перез доминираше со 13 номинации, а Злобница и Бруталистот со по десет. Како и секоја година, најголемо внимание привлекоа категориите за најдобар филм и актерска игра.
Десет се номинирани во категоријата за најдобар филм. Кој филм мислите дека е најдобар и заслужува Оскар?
Anora
The Brutalist
A Complete Unknown
Conclave
Dune: Part Two
Emilia Pérez
I’m Still Here
Nickel Boys
The Substance
Wicked
Објавувањето на номинациите за Оскар беше одложено поради разорните пожари во Лос Анџелес. Номинациите требаше да бидат објавени на 17 јануари, но потоа двапати беа одложувани. Бил Крамер, извршен директор на Академијата за филмски уметности и науки, испрати писмо до сите членови на Академијата. „Почитувани членови на Академијата, сакаме да го изразиме нашето најдлабоко сочувство до погодените од разорните пожари низ Јужна Калифорнија. Многу од нашите членови и колеги од индустријата живеат и работат во областа Лос Анџелес, а ние мислиме на вас“, напиша Крамер. Гласањето за номинации траеше до 14 јануари.
97. церемонија на доделување на Оскарите ќе се одржи на 2 март во Лос Анџелес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Распишан конкурс за директор на фестивалот „Браќа Манаки“

Друштвото на филсмките работници објави конкурс за избор на директор на Интернационалниот фестивал на филмска камера „Браќа Манаки“.
Кандидат за директор може да биде секој редовен член на Друштвото на филмските работници на Македонија или докажан и афирмиран професионалец од областа на уметноста, културата или друга јавна сфера.
Кандидатот треба да ги исполнува следните критериуми: да има високо образование; да има менаџерски и лидерски способности и искуство; да има комуникациски и организациски способности за тимска работа и професионално однесување; да има познавање и искуство во следење на светската филмска продукција и филмските фестивали од висока категорија и да има одлично познавање на англискиот јазик.
Директорот на Интернационалниот фестивал на филмската камера „Браќа Манаки“ има мандат од две години со право на повторен избор.
Пријавите задолжително треба да содржат биографија на кандидатот, докази за исполнување на предвидените критериуми и детална програма за работата на Интернационалниот фестивал на филмска камера „Браќа Манаки“.
Материјалите треба да се достават најдоцна до 6 март оваа година на електронската адреса [email protected] или во седиштето на Друштвото на ул. 8ми Март бр.4 1000 Скопје, Република Северна Македонија.
Директорот ќе биде избран на следното изборно Собрание на Друштвото на филмските работници.
Култура
„Есмералда“ од Чезаре Пуњи на сцената на Националната опера и балет на 19 февруари

Еден од бисерите на класичната балетска уметност „Есмералда“ од италијанскиот композитор Чезаре Пуњи, ќе се изведе на сцената на Националната опера и балет на 19 февруари со почеток во 20.00 часот.
Приказната за убавата Есмералда, инспирирана од романот „Ѕвонарот на Богородичната црква” од Виктор Иго, ќе се изведе под диригентската палка на гостинот од Ерменија, Едуард Амбарцумјан, во кореографија на реномираниот кореограф од Русија, Михаил Крапивин, раскошната сценографија и костимографија се на Живојин Трајановиќ и Љупка Ристовска, концерт-мајстор е Јане Бакевски.
Во насловната улога ќе настапи примабалерината, Марија Кичевска Шокаровска, во улогата на Феб ќе настапи Франциско Хименес Руиз (Шпанија), во улогата на Флер де Лис, Симона Колиштркоска, во улогата на Гудула ќе настапи Саша Евтимова, која оваа година одбележува 25 години уметничка дејност како истакнат балетски играч, педагог и кореограф.
Настапуваат: првенците, солистите, балетскиот ансамбл и оркестарот на Националната опера и балет.
Балетот „Есмералда“, познат по својата техничка сложеност ги истражува длабочините на човечките емоции, додека истовремено нуди спектакуларни танцови изведби кои го задржуваат вниманието на публиката. Оваa изведба ќе создаде незаборавно балетско искуство и ќе ги поттикне гледачите да размислуваат за судбината, љубовта и жртвите што ги носи животот.
Култура
По успехот на „Санденс“ македонскиот филм „Диџеј Ахмет“ продаден во голем број земји

Огромен успех доживеа македонскиот филм „Диџеј Ахмет“ на Георги Унковски кој ја имаше светската премиера на престижниот филмски фестивал Санденс, каде што ги освои Специјалната награда на жирито за креативна визија и наградата од публиката.
Филмот веќе е продаден во Канада, Австралија, Нов Зеланд, Белгија, Луксембург, Холандија, Португалија, Шпанија, Израел и цела поранешна Југославија, објави „Варајати“, дополнувајќи дека во тек се преговори и за други територии.
Џулиен Разафиндранали, одговорен за продажба во „Films Boutique“, рече: „Особено сме му благодарни на ‘Санденс’ што одично го лансира филмот“.
„Диџеј Ахмет“ е драма во која станува збор за 15-годишно момче од јуручко село во источна Македонија, кое наоѓа прибежиште во музиката и сонува да стане диџеј додека се справува со очекувањата на татко му, конзервативната заедница и неговото прво искуство со љубовта – девојка која веќе му е ветена на некој друг.
Филмот е копродукција помеѓу „Синема футура“ и „Сектор филм“ од Македонија, „Алтер вижн“ и „Аналог вижн“ од Чешка, „Бекрум продукција“ и „Баш Челик“ од Србија. Продуценти на филмот се Иван Унковски и Ивана Шекуткоска.
Филмот беше поддржан од Агенцијата за филм.