Драмскиот театар – Скопје гостува во Велес

Со претставата „Чудна случка со кучето во ноќта“, Драмскиот театар гостува во Велес. Претставата ќе се игра в петок на 22 март во 20 часот на сцената на театарот „Јордан Хаџи Константинов-Џинот“.

Претставата „Чудна случка со кучето во ноќта“ е авторска адаптација на Сајмон Стивенс, направена според мотивите од романот на Марк Хадон. Режисер е Зоја Бузалковска, aсистент на режија е Димче Николовски, a драматург на претставата е Александра Бошковска. Костимите се креирани од костимографката Елена Вангеловска и Раде Василев, а сценографијата е на Константин Трпеноски. Авторската музика е на Давид Ангеловски, а кореографијата и фри ранинг-техниката е на Симон Симоновски.

Улогите во претставата ги толкуваат актерите: Дамјан Цветановски, Трајанка Илиева-Вељиќ, Александар Степанулески, Емилија Мицевска, Соња Стамболџиоска, Јасмина Василева, Филип Трајковиќ, Стефан Вујисиќ, Златко Митрески и Нела Павловска.

Режисерката Зоја Бузалковска истакнува дека она што „Чудна случка со кучето во ноќта“ ја прави возбудлив материјал за работа е темата што ја отвора овој текст. Тоа е светот на Кристофер, светот на посебниот, различниот, отфрлениот, исмеаниот, потценетиот. Во време во кое многу општества, па така и нашето, се борат за инклузија на луѓето со посебни потреби, да се работи еден ваков актуелен материјал се чини исклучително важно. Во таа смисла претставата има и едукативно-воспитна функција и може да ја одреди за една од своите целни групи и младата тинејџерска публика.

Од Драмскиот театар информираат дека премиерата на „Чудна случка со кучето во ноќта“ беше во декември 2021. Интересот на публиката и во третата сезона е голем и претставата привлекува публика од сите возрасни групи. Надвор од матичната сцена гостувала на Охридско лето во 2022 додина и на театарскиот фестивал „Рута“ во Скопје во октомври 2022 и „Рута Љубљана“ во 2023 година.

Со претставата „Чудна случка со кучето во ноќта“ aнсамблот на Драмскиот театар Скопје настапи на минатогодишниот театарски фестивал „Војдан Чернодрински“ и доби пет високи признанија: награда за главна машка улога на актерот Дамјан Цветановски за улогата на Кристофер Бун, награда за женска епизодна улога ѝ се додели на актерката Емилија Мицевска за улогата на Џуди. Наградата за сценографија ја доби Константин Трпеноски, а наградата за костимографија им се додели на Елена Вангеловска и Раде Василев за костимите во претставата и наградата за кореографија и сценски движења му се додели на Симон Симоновски.

Претставата на гостувањето во Велес ќе ја има својата триесетта изведба.