Од утре, 17 декември, во 12 часот, до 28 февруари 2021 година, во Музејот на современата уметност Скопје ќе биде отворена ретроспективна изложба на Јован Шумковски насловена „Вода/Ѕид“.

Куратор на поставката е Зоран Петровски, а проектот е поддржан од Министерството за култура.

Музејот е отворен од 10 до 20 часот за посетители секој ден, освен понеделник, а в недела музејот работи до 13 часот.

Поставката ќе се одвива според протоколите пропишани за организација на јавни настани во услови на пандемија.

Од МСУ велат дека ретроспективната изложба го прикажува делото на еден од најзначајните и највлијателни македонски уметници, чијашто речиси четири децениска уметничка практика ја дефинира постојан истражувачки интерес и смела инвентивност во формирањето и изразувањето на неговата ликовна мисла и поглед на светот и времето што го живееме.

Сликар по вокација, Шумковски досега зад себе има над дваесет самостојни изложби во земјава и во светот (Белград, Сараево, Софија, Љубљана, Стокхолм, Париз, Њујорк, Александрија и други). Во 1995 година беше претставник на Македонија на познатото биенале во Сао Паоло во Бразил, а во 2001 на Биеналето во Венеција. Учествува на многубројни групни изложби и значајни интернационални проекти. Редовен професор е на ФЛУ од 2002 година.

Во Националниот музеј за уметност во Херсон – Украина, поставена е изложба на цртежи и колажи на Јана Манева-Чупоска.

Изложбата се состои од четириесет дела, цртежи и колажи изработени во комбинирана техника: молив, јаглен, акрил и темпера.

Авторката Манева-Чупоска е инспирирана од актуелната состојба со корона-кризата која во негативен правец целосно го промени начинот на животот кај луѓето.

Насловот на изложбата „Љубовници во пандемија“ (Pandemic Lowers) има алегорична конотација кој алудира на надеж и потреба за враќање на животот во нормален правец.

Преку фигуративните композициски ликовни претстави, ликовната уметница Јана Манева-Чупоска ја пренесува нејзината психолошка и емотивна состојба во корона-кризата.

Таа љубовта ја нагласува како ликовен симбол кој во овие дела дава надеж дека сепак љубовта ќе го спаси човештвото.

Изложбата е под кураторство на професорката Елена Чепелук професорка на Факултетот за уметност и дизајн во Херсон.

Изложбата освен во Националниот музеј беше претставена и во галеријата на Факултетот за уметност и дизајн во овој украински град.

Изложбата „Љубовници во Пандемија“ е финансирана од Министерството за Култура на Р. Македонија како Национален проект од ликовната област за 2020 година.

Македонскиот уметник Зоран Попоски е финалист на наградата за уметност „Арт рајтс прајс“ 2020 во Италија, во категоријата „видеоарт“.

Жирито на наградата за уметност „Арт рајтс прајс“ вклучува реномирани европски галеристи, колекционери, критичари и директори на уметнички фестивали од Италија, Франција и Шпанија.

Делата на финалистите во пет уметнички категории ќе бидат презентирани на виртуелна 3Д-изложба во периодот 16 декември 2020 до 30 јануари 2021 година.

Зоран Попоски магистрирал уметност во нови медиуми во Линц и Њујорк, а докторирал студии на културата во Скопје. Има реализирано над 80 меѓународни изложби и е добитник на повеќе меѓународни награди за уметност.