Македонскиот филм „Исцелител“ не влезе во трката за престижната филмска награда „Оскар“.

„Драги пријатели, со скршено срце ви објавуваме дека ‘Исцелител’ не влезе понатаму во трката за ‘Оскарите’. Од 87 кандидати, доцна синоќа беше објавена потесната селекција од 9 филма, меѓу кои, за жал, не бевме ние. Им честитаме на колегите што влегоа во селекцијата и им стискаме палци да се најдат на конечната листа од 5 номинирани филма“, соопшти екипата од филмот.

Филмот „Исцелител“ во режија на Ѓорче Ставрески беше национален кандидат на Македонија за наградата „Оскар за најдобар филм од неанглиско говорно подрачје“ за 2019 година. Во конкуренција за кандидатурата беа и филмовите: „Враќање“ во режија на Кастриот Абдили, „Година на мајмунот“ во режија на Владимир Блажевски, „Незаборавна пролет во заборавено село“ во режија на Куштрим Бектеши, и „Здивот на ангелот“ во режија на Јани Бојаџи.

Македонскиот пијано-виртуоз, Симон Трпчески, заедно со музичарите на Македонската филхармонија, на синоќешниот концерт ја воодушеви публиката, која го испрати со френетични аплаузи. Уште еднаш овој музички маг со светско реноме со крајна спонтаност и внимателно избран репертоар докажа дека неговите настапи се неповторливо искуство и единствена музичка сензација.

Неполни два часа Трпчески од најавените композиции на Шостаковиќ и Гершвин, Концерт за пијано и оркестар бр. 2 и „Рапсодија во сино“, дополнително во два наврата на публиката ѝ приреди и изведба на композиции од домашни композитори, а празничната нота на концертот ја дополни и со изведба на популарни теми.

Финалето на концертот беше изведбата на познатата џез-тема на Пол Дезмонд, „Тејк фајф“, која за миг ја телепортира публиката во центарот на Њујорк.

Под вештите прсти на Трпчески секој тон звучеше оригинално и возбудливо, а музичарите од Македонската филхармонија, освен со професионалната подготвеност, го следеа со извонреден флуид, што дополнително го обои концертот со визулена и музичка хармоничност.

Се чини како на настапите дома Трпчески носи дел од секоја своја турнеја, па така сцената на Македонската филхармонија за миг заличе на њујоршкиот „Карнеги хол“, каде што тој настапи како солист на Балтиморскиот симфониски оркестар под диригентската палка на Марин Олсоп во 2010 година.

Иако речиси нема точка на планетава каде што пребирливата публика како во Лондон, Пекинг, Шангај со воодушевување го испраќа македонскиот пијанист, неговите настапи дома тој секогаш ги доживува со посебно задоволство.

Во претпразничниот дух Трпчевски посака ум, трпение и здравје, ѝ се поклони на публиката и им се заблагодари на музичарите, диригентот Борјан Цанев и првата виолина Ана Контраденко.

Концертот го организира „Македонски телеком“, кој на овој начин го одбележа крајот на годината зааедно со своите блиски соработници, партнери и пријатели и истовремено ја акцентира поддршката на македонската култура.

Во камерната сала на Македонската филхармонија, овој петок, во 20 часот, ќе се одржи концерт за четирирачно пијано со едни од најистакнатите македонски пијанистки – Марија Ѓошевска и Елена Атанасовска-Ивановска.

На програмата се: свитата „Оревокршачка“ од Чајковски/Лангер, „Карневал на животните“ од К. Сен-Санс/Л. Гарбан и Македонска парафраза бр. 2 од македонската композиторка Бете Илин.

Елена Атанасовска-Ивановска и Марија Ѓошевска успешно ја претставуваат и ја афирмираат нашата земја и надвор од нејзините граници. Нивната соработка почнува сосема наивно и ненаметливо уште во нижото музичко училиште преку изведба на Концертот за две пијана на Ј. С. Бах BWV 1060 за да се круниса со настап со Македонската филхармонија, каде што ставовите од концертот на Бах во f-moll ги делат меѓусебно. Многубројни се и полурециталите што ги даваат во нижото музичко училиште и во средното музичко училиште во Скопје и низ Македонија. На Факултетот за музичка уметност, пак, во класата на професор Борис Романов, почнува нивното заедничко дружење преку музиката, каде што постојано се придружуваат на сите клавирски концерти што бараат пијано-придружба.

Дуото официјално почнува да концертира на фестивалот „Златна лира“ во 2009 година. На нивниот репертоар за кус период се најдоа речиси сите капитални дела од светската литература за две пијана.