Вчера, во зградата на Европскиот парламент во Брисел беше отворена изложбата „Заедно II“, која се организира во соработка помеѓу Министерството за култура на Република Бугарија и Министерството за култура на Република Северна Македонија.

Организатор на изложбата е Бугарскиот културно-информативен центар во Скопје, со поддршка на европратеникот од групата „Обнови ја Европа“ и известувач во Европскиот парламент за Република Северна Македонија, Илхан Ќучук.

Специјален гостин на отворањето на изложбата беше претседателката на Европскиот парламент, Роберта Мецола.

„Европската Унија и овој парламент се посветени на унапредување на долгорочните односи меѓу Бугарија и Северна Македонија. И ќе продолжиме да ги охрабруваме двете страни на дијалог и работа за заедничка европска иднина. Оваа изложба има цел да го прослави заедништвото меѓу Бугарија, Северна Македонија и Европскиот парламент“, рече Мецола.

Европратеникот Илхан Ќучук се заблагодари на директорката на БГКИЦ – Скопје, Антонија Велева, која ја поведе иницијативата за изложбата и додаде:

„Овој пат треба да биде патот напред и за Бугарија и за Северна Македонија. Двете земји треба да ги продлабочат своите добрососедски односи и да се залагаат за интеграција на регионот во Европската Унија. Ова е пример дека културата е мост што обединува и не познава граници, дека културата има моќ да се издигне над сите разлики“.

Меѓу присутните беа и постојаниот претставник на Бугарија во ЕУ, амбасадорот Румен Александров, како и амбасадорот на Северна Македонија во Европската Унија, Зулфи Исмаили. Двајцата истакнаа дека изложбата ја покажува заемната волја за одржување на позитивната агенда меѓу двете земји.

„Важноста на меѓукултурниот дијалог и соработка меѓу Бугарија и Северна Македонија стана повидлива во последните години. Денешниот настан е уште еден доказ во оваа насока. Заедничките вредности и наследството се составен дел од нашата иднина“, рече амбасадорот Александров.

„Им благодарам и на министерствата за култура на двете земји. Уметноста е универзален јазик и треба повеќе да ја промовираме. Гледајќи ја оваа изложба непосредно пред ова отворање, го видов неограничениот потенцијал на уметноста да инспирира, предизвикува и да ги трансформира нашите перспективи“, додаде амбасадорот Исмаили.

Кураторите Ана Франговска од Северна Македонија и Атанас Андасаров од Бугарија ја претставија првата заедничка изложба на двете земји пред присутните гости на свеченото отворање во зградата на Европскиот парламент.

„Заедно II“ првпат беше претставена во Скопје на 25 ноември 2022 година кога свечено беа отворени новите простории на Бугарскиот културно-информативен центар во Скопје и беше дел од годишната програма на институцијата.

Од бугарска страна на изложбата учествуваат скулпторката Снежана Симеонова со делото „Форма“ и сликарите Свилен Блажев со „Рабош“, Вихрони Попнеделев со „Триптих“, Греди Аса со „Историја“ и „Внатрешен простор“; Надежда Кутева со „Манастирот 1“ и „Градски пејзаж“ и Атанас Андасаров со „Св. Наум“ и „Персимон“ и други.

Од уметниците од Република Северна Македонија на изложбата се претставија сликарите Жанета Гелевска-Велјаноска со делото „Пејзаж“, Симонида Филипова-Китановска со „Композиција“, Илија Кочовски со „Пејзаж 2“, Александар Станкоски со „90.000 овци“, Жаклина Глигориевска-Кочовска со „Возбуда или за потеклото“, Марина Цветановска-Мартиновска со „Ни на небо ни на земја“, Дијана Томиќ-Радевска со „Цветовите на Галичник 1“, Марина Лешкова со „Галичник“ и други.

Сакам да заборавам на инцидентот оти се’ друго поврзано со изложбата беше убаво чувство, вели сликарот Сергеј Андреевски откако минатата седмица членови на грчката забранета организација „Златна зора“ со маски и качулки на лицата упаднаа на неговата изложба во Каламариа, Солун.

Андреевски вели дека да се биде творец денес, во сопствен свет, со личен ракопис, или да се живее сопствениот сон со потези широко насочени кон светот не е едноставно.

„Живееме во време на пандемии, војни, економски турбуленции и воопшто, преструктурирање на планетата земја. Сите сме, помалку или повеќе вклучени во промените. Сето ова, особено не засега нас, уметниците. Нам ни треба свет без граници, луѓе без вардели. Со мојата уметност отсекогаш трагав по нови, неоткриени предели за да прозвучат нивните убавини преку моите слики“, рече Андреевски.

За упадот на „Златна Зора“ вели дека политиката, како и многу пати до сега, се обиде да ја победи уметноста, а тој не сака да ја употребува како средство за лична афирмација.

„Сакам веднаш да го заборавам инцидентот, бидејќи сето останато поврзано со изложбата беше убаво чувство: гостопримството од страна на организаторите – општината Каламариа, секојдневните средби со посетителите, колегите-уметници, вклучувајќи ја и средбата со претставниците на грчките органи за јавна безбедност. Искрено сакам да ја истакнам професионалната реакција на нашето МНР, а особено заложбите на македонскиот Генерален конзул во Солун, Г-динот Дејан Ѓучиќ, кој направи сѐ јас и мојата сопруга да се чувствуваме безбедни“, рече Андреевски.

Се заблагодари на поддршката што ја добил и се уште ја добива од голем број уметници, интелектуалци, граѓани и воопшто на македонската, грчката и светската јавност кои застанале на страна на уметноста.

Целта на членовите на групата маскирани кои упаднаа во галеријата била да ја прекинат изложбата. Тие се однесувале непристојно и вулгарно, по што си заминале. Немало физичко насилство или материјална штета, наведе МНР по инцидентот, а била повикана полиција. Златна зора тогаш објави видео од инцидентот, во кое се вели дека ја запечатиле „скопската изложба во Каламариа“ и дека не прифаќаат никаков компромис за „грчкиот карактер на Македонија“.

Преку 1000 љубопитни посетители беа на големото отворање на изложбата „Ниедно чувство не е конечно. Колекција на солидарноста, МСУ Скопје”/„No Feeling is Final. The Skopje Solidarity Collection“ со дела од уникатната колекција на Музејот на современата уметност – Скопје, која ќе биде отворена се до 28 јануари 2024 година.

Посетителите можеа да ја погледнат изложбата за солидарно Скопје и делата, кои светски познатите уметници ги подарија на нашиот Музеј на современата уметност во знак на солидарност по катастрофалниот земјотрес во 1963 година.

На 1000 метри квадратни беа изложени импозантните 94 избрани дела од солидарната колекција на МСУ во симбиоза со 50-те дела од шестмината современи уметници.

Во изложбениот проект, вклучена е и документарна секција за Скопје, трансформацијата на градот и приказната за МСУ и неговата колекција, документи и макетата на Кензо Танге, позајмени од архивите на Музејот на град Скопје и текстови и макети од позначајни градби од постземјотресната обнова на градот, од архивата на Ана Ивановска, Јован Ивановски и Владимир Десков, кои наедно одржаа и предавање вчера пред виенската публика.

На официјалното отворање на изложбата, до присутните се обратија двете директорки на партнерските институции Кунстхале и МСУ, Сабина Саболовиќ и Мира Гаќина и беа поздравени од посетителите со громогласни аплаузи и извици за поддршка.

Во Виена пристигна и министерката за култура Бисера Костадиновска Стојчевска, Дејвид Гир, амбасадорот на Европската унија во Македонија, голем дел од дипломатскиот кор во Виена и претставници од македонската амбасада во Австрија.

„Скопје и Музејот на современата уметност – Скопје, испишаа историја во Виена“, се дел од коментарите на социјалните мрежи, веднаш по отворањето.

„Монументална изложба, чиста емоција, извонреден колорит, моќни дела и сликовит приказ за солидарноста“, возбудено коментираа оние кои беа таму синоќа.

Современите уметници вклучени во изложбениот проект: Брук Ендру (Мелбурн), Синиша Илиќ (Белград), Иман Иса (Берлин) и Ѓулсун Карамустафа (Истанбул) и македонското уметничко дуо Јане Чаловски и Христина Иваноска (Скопје), беа во центарот на вниманието синоќа.

Изложбата која ќе биде отворена до следната година, а според искуствените статистики кои ги има Кунстхале Виена се предвидува да ја погледнат повеќе од 75.000 илјади посетители од целиот свет.