Во Кинотеката на Македонија со прогласување на победниците во конкуренција на долгометражни и краткометражни играни филмови вечерва од 19 часот завршува осмото издание на Филозофскиот филмски фестивал.

За наградата „Златен був“ (од жири и публика, во двете конкуренции) се натпреваруваа 6 долгометражни и 22 краткометражни филмови.

За крај, по свеченото доделување на наградите, во рамките на Ревијалната програма Филм-филозофија и во соработка со Амбасадата на Италија во Скопје, публиката ќе има можност да погледне еден безвремен филм – „Смрт во Венеција“ (Death in Venice / Morte a Venezia, 1971) на Лукино Висконти базиран на истоименото дело на Томас Ман.

За релацијата филозофија-литература-филм и нивната поврзаност во ова класично дело од филмската историја ќе зборува Александар Прокопиев.

Министерот за култура, Роберт Алаѓозовски, денеска оствари средба со делегација на Генералниот директорат на државните театри на Република Турција, по што заедно со генералниот директор, Мустафа Курт, и министерот без ресор во Владата на Република Македонија, Аднан Ќахил, го посетија објектот на Турскиот театар, којшто влегува во втора фаза на внатрешно уредување и техничко опремување.

Како што информираат од владината прес-служба, при посетата на објектот на Турскиот театар, министерот Алаѓозовски ги информирал новинарите за преземените чекори за надминување на застојот во изградбата на објектот.

„Продолжуваме со нашата политика на одглавување на капиталните проекти. Како што ги одглавивме Тетовскиот театар, зградата на Албанскиот театар и Македонската филхармонија, ова е уште еден објект кој треба да го ставиме во функција. Интерес на Министерството за култура е да се работи брзо и во добра динамика за да може Турскиот театар да ги добие своите квалитетни услови за работа, но истовремено сите работи врз објектот да бидат изведени врз база на прецизни договори и квалитетно вградување на сите потребни материјали за што ќе разговараме со нашите пријатели од Турција. Сè уште расплеткуваме неколку ситуации околу плаќањата, дали правилно се исплатени одредени фактури, дали одредени барања дадени на суд се исправни, објективни. Се надеваме дека во многу скоро време и тоа ќе го расчистиме за да можеме за втората фаза да стартуваме со чиста ситуација“, истакна Алаѓозовски.

Министерот задолжен за странски инвестиции во Владата на РМ, Аднан Ќахил, посочи повеќе проблеми кои влијаеле на застојот на изградбата на театарот за време на претходната власт, која, според него, намерно ја оставила турската заедница на маргините на капиталните инвестиции во културата и културниот живот воопшто.

„Тоа можеше и требаше да се направи порано. Во минатата Влада, Турците беа ставени на маргините на настаните. Тие три години т.е. од 2008 година можеа не вакви театри, туку цел град да изградат, но не изградија. Дваесет илјади метри квадратни со една подземна катна гаража кажува дека дилетантски е работено. Секој кој испитувал геолошки знаел дека тука има подземни води“, рече Ќахил и праша зошто баш тука каде има подземни води почнала изградбата.

Тој најави дека со одлука на Владата и разговор со турската страна ќе има соодветна динамика за изградба и соодветна опременост на Турскиот театар. Според него, тоа го заслужува турскиот народ во Македонија, кој е оставен на забот на времето. Инаку, втората фаза на внатрешно уредување и техничко опремување на Турскиот театар ќе се реализира во соработка со Генералниот директорат на државните театри на Република Турција.

Денес, точно напладне, почна претпродажбата на билетите за петдневниот музички фестивал „Ентер-фест“, што ќе се одржи во Скопје од 29 мај до 2 јуни. Како што беше објавено, цената за комплетот билети за сите фестивалски денови во претпродажба чини 990 денари на http://mktickets.mk/.

На две големи сцени, поставени во и пред спортскиот центар „Борис Трајковски“, ќе настапат шеесетина музичари, популарни бендови и диџеи. Организаторите засега открија дека ќе настапи и пејачката Ера Иштрефи, најпозната со хитот „Бон-бон“.

Фестивалот има цел на едно место да ги спои сите љубители на добрата музика од Македонија и од соседните земји. Освен што велат дека ќе има музика за сечиј вкус, организаторите додаваат и дека на посетителите ќе им понудат најевтино квалитетно пиво – 80 денари.