Една од најпопуларните веб-страници за љубителите на филмот, „ИМДБ“ (IMDB), објави листа на најпопуларни филмови за оваа година, врз основа на тоа колку биле пребарувани од страна на корисниците.

Судејќи според листата, филмовите со суперхерои се особено популарни годинава. Еве ги филмовите кои ги зафатија првите 10 места.

10. Us

9. Aladdin

8. Alita: Battle Angel

7. Spider-Man: Far From Home

6. The Lion King

5. It Chapter Two

4. Captain Marvel

3. Avengers: Endgame

2. Once Upon A Time In Hollywood

1. Joker

Министерот во Владата задолжен за дијаспора, Едмонд Адеми, денес во Букурешт, во името на Владата, ја откри спомен=бистата на реномираниот македонски сликар Никола Мартиноски.

Во својот говор пред бројните претставници на Владата на Романија, градот Букурешт, дипломатскиот кор и претставниците на македонската заедница во оваа држава, министерот Адеми зборуваше за ликот и делото на Мартиноски и неговиот придонес за развојот на македонската модерна ликовна уметност во 20 век.

„Откривањето на бистата се случува три дена по 8 Декември, Денот на македонскиот јазик во Романија, кој, благодарение на истрајноста на македонската дијаспора во оваа земја и одлуката на романскиот парламент, претставува значаен датум за зачувување на традициите, културата и јазикот на македонското етничко малцинство во Романија“, додаде министерот Адеми.

Овој проект, според Адеми, дополнително ги зацврстува односите и врските меѓу двете култури, македонската и романската, и показател е за одличните односи меѓу двете земји.

„Нашиот голем сликар и академик Мартиноски ни создаде дела кои ни го осветлуваат минатото, светол пример ни е во сегашноста, но и го осветлува патоказот кон иднината. Му припаѓа на првата генерација на македонски академски уметници. Школуван е во Националната школа за убави уметности во Букурешт, далечната 1927 година, а со враќањето од Букурешт и Париз, еден е од основачите и прв директор на Училиштето за применета уметност во Скопје, на Уметничката галерија во македонскиот главен град (од која подоцна ќе никне Националната галерија на Македонија) и еден од основачите на Македонската академија на науките и уметностите“, истакна меѓу другото министерот Адеми.

Toj изрази голема благодарност до почесниот конзул на Романија во земјава, Штерјо Наков, кој материјално ја помогна изработката на бистата.

Мартиноски студирал во Букурешт, а бистата е поставена во познатиот парк Михаел I, заедно со спомениците на „врвни имиња од светот на уметноста, книжевноста, филозофијата, политиката и други реномирани личности на човечкото наследство“.

На седумнаесеттото по ред културно меѓународно биенале Тактонс, најважниот настан за тон-мајсторите од регионот, македонскиот композитор, продуцент и клавијатурист Кокан Димушевски повторно е добитник на првата награда, во конкуренција од преку 120 врвни изведувачи.

Во организација на Радио-телевизизија Војводина, од 6 до 9 ноември учествуваа најзначајните РТВ-центри од Европа, најдобрите тон-мајстори со своите тонски снимки. Кокан Димушевски го покажа своето повеќедимензионално творештво како тон-мајстор, автор на дело и изведувач.

Оваа награда за него е петта по ред, односно во изминатите 10 години тој во континуитет е добитник на прва награда или гранд при на ова значајно музичко случување. Тактонс се одржува од 1983 година. На секои две години им овозможува на најуспешните тон-мајстори од Европа професионално вреднување на техничкиот квалитет на звучните записи врз основа на однапред единствено дефинираните субјективни и објективни параметри.

Како најнаградуван продуцент, Димушевски беше поканет да одржи работилница и да ги презентира своите достигнувања на полето на креативната примена на современите технологии во областа на радиото и телевизијата. Успехот на овој сестран музичар го вреднуваа и Би-би-си и Радио Франција, кои му доделија плакети за неговите заслуги на полето на радиофонското обликување.

Претходно, годинава Сојузот на композиторите на Македонија – СОКОМ на Кокан Димушевски му ја додели и наградата за животно дело „Трајко Прокопиев“. Истата претставува највисоко професионално признание кое СОКОМ го доделува на музички творци и музички писатели за долгогодишни значајни остварувања во областа на музичкото творештво и музикологијата.