Женскиот младински хор го освои првото место во категоријата на еднородни хорови, на меѓународниот акапела натпревар „Varsovia Cantat“ на кој настапија голем број квалитетни хорови од Европа и Азија.

Освен во натпреварувачкиот дел, хорот одржа и два концерти во катедрали во Варшава и Згиерж и настапи на гала концертот на сцената на големата концертна сала на музичкиот универзитет „Фредерик Шопен“.

Оваа награда е последна во низата од 6 први награди, 6 специјални награди и ,,Grand Prix” титула освоени од маестро Татарчевски и Женскиот младински хор при МКЦ во последните три години на натпревари во Романија, Полска и Словачка.

Годишната изложба на основните училишта е традиционална изложба организирана од страна на Националната галерија на Македонија. Од досегашните искуства таа преставува одлична можност учениците да ги усовршат своите творечки способности, да го развијат визуелното помнење, да ја ослободат својата фантазија на најдобар можен начин.

„Изложбата ќе биде отворена на 21 ноември во 13 часот во Даутпашиниот амам, а ќе биде презентирана до 24 ноември“, информира Маја Димитрова, едукатор.

Годишната изложба на основните училишта секоја година третира како тема еден од нашите најголеми македонски ликовни автори. На таквиот начин учениците имаат можностда ги прошират знаењата за нашето уметничко богатсво, да ги запознаат уметниците и нивните уметнички дела на најдобар можен начин. Преку делата на еминентните уметници тие учат и за разните ликовни правци, материјали и ликовни техники. По организираните посети на изложбите, кратките предавања за уметникот, како и прикажување документарен филм, учениците се подготвени да учествуваат во креативните работилници создавајќи креации што личат на оние на уметниците. Понекогаш тие се со сосема нов израз, детски, наивен, давајќи секогаш позитивна слика за животот. Така, оваа година учениците од различна возраст својата инспирација ја црпеа од творештвото на Драган Попоски – Дада. Преку забава и игра тие со глината моделираа и создаваа креации многу слични на оние од големиот уметник. Освен со глина, тие свои креации изработија и со стиропор, направија и голем број цртежи, а од сите изработени творби произлезе изложбата со наслов „Дада и јас“.

Ваквите проекти се корисни бидејќи учениците на едноставен начин учат за сите оние вредности што ние како држава ги поседуваме и тие треба да ги негуваме и почитуваме. Отворајќи им ги портите на уметноста, придонесуваме за развој на децата за подобри наши идни генерации.

На 24 ноември, сабота, во ОНБ „Браќа Миладиновци“ во Радовиш, ќе се одржи промоција на книгата „Новогодишни детски песни“ од Марина Мијаковска, а промотор на книгата е д-р Христо Петрески.

„’Новогодишни детски песни’ е прватa книга на Мијаковска наменета за најмладата популација. Во неа има четириесет песни за деца од разни возрасти кои ги воспеваат: новогодишниот амбиент во Македонија; празнувањата и обичаите за Нова година; Дедо Мраз; Снешко; новогодишната елка, снежниот зимски амбиент. Книгата е повеќенаменска, интерактивна и ја развива креативноста кај децата“, се наведува во соопштението на организаторите.

Мијаковска, додаваат оттаму, им нуди можност на децата да ги читаат песните, да ги обојат новогодишните илустрации и низ игра самите да напишат песна од најголемите новогодишни желби. Христо Петрески за „Новогодишни детски песни“ заклучува: „Книгата е едукативно-дидактичка (поучна и практична) и претставува еден мал водич, прирачник, поетска боенка, забавник“.