Книги
Вера Калин со „Бездомникот со златен часовник“ прогласена за најчитан автор во 2016
Младата писателка Вера Калин односно, Верче Карафилоска е најчитан автор во 2016, година, а признанието и беше врачено во Националната и универзитетска библиотека „Св. Климент Охридски“ која во понеделник ја организираше манифестацијата „Ден на читателот“.
Нејзиниот прв роман „Бездомникот со златен часовник“ е најбараната книга во јавните библиотеки низ Македонија минатата година.
Вера Калин истакна дека ова не е нејзина прва награда, но дека ќе и биде една од најзначајните затоа што доаѓа од читателите, односно од оние за кои таа ја посветува својата литература. Рече дека пробивот во македонската книжевност и бил лесен затоа што верува во тоа што го прави.
„Кога влегов на книжевната сцена пред четири години со два мои расказа, се зборуваше за негативни искуства во издаваштвото во Македонија. Се зборуваше дека нема читатели, а дури и да ги има тоа не се читатели на македонски автори, а посебно ако авторот е млад тогаш нема да биде сериозно сфатен. Решив да не ги следам сите тие туѓи приказни и, некако, многу лесно го поминав патот. Мојата издавачка куќа целосно ме поддржа и ми овозможи маркетинг и промоција досега невидени и е делумно заслужна што им помогна на сите тие читатели да станат свесни за моето дело. Понатаму се беше работа на читателите“, рече Калин, која наградата ја прими од Коста Петров, кој беше награден за најчитан автор во 2015 година.
Наградата се доделува седми пат и, покрај нив, нејзини досегашни добитници беа и: Венко Андоновски, Блаже Миневски, Игор Џамбазов, Винка Саздова и Марија Јаневска.
Директорот на НУБ Иван К. Заров истакна дека нивната библиотека вторпат ја организира манифестацијата „Ден на читателот“ на која, рече, на пиедестал се става читателот.
На Денот на читателот НУБ ги прогласи и наградените автори од првиот Конкурс за необјавена песна на тема „Книга, библиотека, читател, читање“. Од пристигнатите шеесетина песни, комисијата одлучи првата награда да ја добие Маја Мојсова за песната „Прелистување на душите“, второнаградена е Ана Јовчевска за „Млади поети“, а третата награда ја доби Билјана Димко за песната „Читател“.
На настанот беше претставен и првиот број на списанието „Издаваштво“ кое НУБ почна да го издава оваа година. Тоа ги опфаќа најрепрезентативните публикации, едиции, издавачки проекти и манифестации поврзани со книгата. Во план е да се појавува еднаш годишно./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Книги
„Единствен матичен број“ на Лидија Димковска прогласен за роман на годината
Новиот роман на Лидија Димковска, „Единствен матичен број“, е добитник на годинешната награда „Роман на годината“.
Романот е во издание на „Три“ и уште по своето објавување, ја освои читателската публика. Жири-комисијата, составена од Влада Урошевиќ, Бранко Цветкоски, Марија Ѓорѓиева, Сашо Огненовски и Катерина Богоева, одлучи токму романот на Димковска да се закити со една од најпрестижните и несомнено најпосакувани признанија во домашната книжевност.
„Единствен матичен број“ е четврти роман на авторката, од кои „Резервен живот“ исто така беше во најтесниот круг за оваа награда во 2012 година.
Наградата „Роман на годината“ првпат е доделена во 1999 година од „Утрински весник“, а од 2017 до денес се доделува од Фондацијата „Славко Јаневски“.
За издавачкиот центар „Три“ ова е петта награда „Роман на годината“. Лидија Димковска се придружи на низата квалитетни автори, кои во издание на „Три“ претходно го добиле ова признание – Венко Андоновски со „Папокот на светот“ (2000), Кица Колбе со „Снегот во Казабланка“ (2006), Јагода Михајловска-Георгиева со „Индиго Бомбај“ (2008) и Митко Маџунков со „Птиците од ланските гнезда“ (2012).
Критиката веќе се огласи за многузначноста и значајноста на ова прозно остварување на Димковска. Читателите исто така ја препознаа неговата вредност, а во меѓувреме сите го очекуваме второто издание на романот.
Лидија Димковска веќе има освоено повеќе награди за нејзината проза, од кои ги издвојуваме – двапати наградата „Стале Попов“ на Друштвото на писателите на Македонија и награда на Европската Унија за литература за романот „Резервен живот“. Токму затоа таа сосем заслужено е една од најпреведуваните домашни авторки.
Книги
Пет романи во најтесен избор за наградата „Роман на годината“
„Единствен матичен број“ од Лидија Димковска („Три“), „Ако се родат некакви чувства: зборник за љубовта на Гоце и Јанка“ од Блаже Миневски („Матица македонска“), „Заборав“ од Томислав Османли („ВиГ Зеница“), „Сѐ уште можам нешто да сторам“ од Фросина Пармаковска („Или – или“) и „Зелениот дворец“ од Сибо („Арс Либрис“) се петте романи што се најдоа во најтесен избор за наградата „Роман на годината“ за 2023 година, што ја доделува Фондацијата за унапредување и промоција на културните вредности „Славко Јаневски“.
Оваа одлука ја донесе жири-комисијата во состав Влада Урошевиќ (претседател и минатогодишен лауреат), Бранко Цветковски, Марија Ѓорѓиева, Сашо Огненовски и Катерина Богоева (претставник на Фондацијата).
Наградата, чиј генерален покровител е „Комерцијална банка“ АД Скопје и која е поддржана од Министерството за култура на Република Северна Македонија, годинава се доделува по јубилеен 25-ти пат. Таа се состои од плакета, оригинална статуетка и паричен износ од 150.000 денари.
Жири-комисијата ќе го соопшти името на лауреатот на оваа престижна награда на прес-конференција што ќе се одржи во петок, 15 март, во кафе-книжарницата „Буква“ во Скопје, со почеток во 12 часот.
Книги
Десет романи во трката за „Роман на годината“
Жири-комисијата за наградата „Роман на годината“ за 2023 година што ја соселува Фондацијата за унапредување и промоција на културните вредности „Славко Јаневски“, во состав: Влада Урошевиќ (минатогодишен лауреат и претседател на Комисијата), Бранко Цветкоски, Марија Ѓорѓиева, Сашо Огненовски и Катерина Богоева (претставник на Фондацијата), селектираше десет романи што останаа во трката за наградата „Роман на годината“.
На годинашниот конкурс пристигнаа 36 романи. Жири-комисијата во првата селекција одбра 19 наслови, а сега списокот го стесни на десет романи.
Наградата „Роман на годината“ е поддржана од Министерството за култура на Република Северна Македонија, а нејзин генерален покровител е Комерцијална банка АД, Скопје. Наградата се состои од паричен износ од 150.000 денари, плакета и оригинална статуетка.
Според пропозициите, насловот на наградениот роман и името на авторот ќе бидат соопштени на прес-конференција на 15 март.