Култура
Заврши првиот дел од снимањето на филмот „Од рајот“ на култниот режисер Срѓан Драгојевиќ
Првиот дел од снимањето на филмот „Од рајот“, кој се работи по сценарио и во режија на Срѓан Драгојевиќ, е успешно завршен, а екипата што девет дена работеше на локации во Скопје заминува задоволна да го продолжи снимањето во Србија.
Станува збор за филм што се снима во голема регионална копродукција во која Агенцијата за филм на Република Северна Македонија учествува со 12 проценти од вкупниот буџет на филмот. Продуцентската куќа „Сектор филм“ од Скопје, односно продуцентите Владимир Анастасов и Ангела Несторовска со режисерот Драгојевиќ, сценографката Јелена Сопиќ, главните актери Ксенија Маринковиќ и Горан Новојец, сценографката Јелена Сопиќ и српската продуцентка Биљана Првановиќ на денешната прес-конференција зборуваа за своето искуство од снимањето кај нас и открија детали за приказната на „Од рајот“.
Продуцентот Анастасов, кому ова му е втора соработка со Драгојевиќ по филмот „Парада“, кој ја освои наградата од публиката во програмата Панорама на Берлинскиот филмски фестивал, вели дека му е особено драго што овој прилично комплексен филм, и во продукциска и во креативна смисла, почна со снимање во нашата земја.
„Идејата и претпродукциската фаза од проектот ‘Од рајот’ ја развувавме речиси три години и посебно ни е драго што филмот доживеа почетокот на снимањето да се одвива во Македонија. Со Драгојевиќ и Првановиќ добивме поддршка од Агенцијата за филм, по што се вклучија и Хрватска, Словенија, Црна Гора, Германија, а филмот го помогна и европската фондација ‘Еуроимаж’. Се надеваме на успешен филм“, рече Анастасов.
Според српската продуцентка Првановиќ, регионалните копродукции се неопходни за да се реализираат успешни фимови.
„Се радувам што по филмот ‘Парада’, кој имаше извонреден успех, сега втор пат соработуваме со ‘Сектор филм’ и Драгојевиќ. Благодарни сме што македонската Агенција за филм го препозна проектот и ако снимањето продолжи со истиот квалитет како што почна, се надевам дека филмот ќе доживее голем успех. Во суштина, за земјите од регинот, копродукциите се многу важни доколку сакаме да реализираме успешни филмови. Се заблагодарувам на сите што се вклучија во проектот“, рече Првановиќ.
Драгојевиќ вели дека е многу среќен што повторно снимал во Македонија.
„Задоволство ми е да сум во Скопје, дури размислувам да се преселам во моето омилено Дебар Маало. За филмот ‘Од рајот’, мојата сестра, која е монахиња, вели дека филмот е христијанка комедија. Сепак, повеќе би го нарекол алегорија на христијанството. Иако се темели на мотиви од прозата на мојот омилен француски писател Марсел Еме, во која има многу фантастика, во филмот доминира реализмот и околностите на приказните се сосема поинакви. Ако земеме предвид дека по комунизмот и по полвековиот атеизам сите се вративме кон христијаството, сепак, имам впечаток дека уште учиме од грешките. Приказната не е лоцирана на точно место и таа би можела да се случува во која било транзициска земја во Југоисточна Европа. Три приказни се преплетуваат во период од 35 години, поточно во 1993, 2011 и во футуристичка 2026 година“, рече Драгојевиќ.
Главната женска улога, која ја игра Ксенија Маринковиќ, таа ја објаснува како жена на чиј сопруг (Стојан, кого го игра Горан Навојец) ќе му порасне ореол и таа тешко се справува со овој факт.
„Играм улога на жена на чиј сопруг ќе му порасне ореол. Таа тешко се навикнува на ова и смета дека е непријатно да се живее со него. Моментите на реалност и фантастика се измешани и голем предизвик е за мене да ја играм оваа улога“, рече Маринковиќ.
За Навојец, улогата на Стојан е најдобро напишана машка улога на просторите на поранешна Југославија и вели дека е неверојатен предизвик за него.
„Мислам дека ова е најдобро напишана машка улога на просторите на бивша Југославија. Играм еден добар човек кого околината не го прифаќа бидејќи никој повеќе не може да се справи со добрината, во време кога модерниот човек стана малициозен и комплетно материјален. Стојан е нешто меѓу светец и суперхерој. Поставува голем број прашања за губење на духовноста. Соработката со Драгојевиќ е фантастична и за мене е огромен предизвик до крајот максимално да ја износам улогата“, рече Навојец.
„Од рајот“ е филм кој има сложена сценографија и бара голем кретивен потенцијал.
„Се обидовме да најдеме визуелно интересни простори, и локациите во Скопје беа извонредни. Во филмот се мешаат три временски периоди и тоа бараше многу истражување за сценографска реализација. Ова е визуелно богат филм и неверојатен предизвик да се работи на него“, рече сценографката Јелена Сопиќ.
Снимањето почна на 16 септември и се одвиваше девет дена во нашата земја. „Од рајот“ продолжува уште пет недели да се снима во Србија, па во Германија. Филмот е духовита алегорија на христијанството, раскажува три приказни што се преплетуваат во период од 35 години.
Драгојевиќ, кој ги потпиша познатите филмови „Ние не сме ангели“, „Парада“, „Рани“, „Убавите села убаво горат“, од 16 до 25 септември на локации во Скопје го почна снимањето на неговиот нов филм „Од рајот“. Филмот е српско-германско-македонско-хрватско-словенечко-црногорска копродукција зад која застанаа продуцентите DELIRIUM од Србија, во копродукција со „Сектор филм“ од Македонија, МА.JA.DE. FICTION Gmbh од Германија, „Форум Љубљана“ од Словенија, „Студио дим“ од Хрватска, „Макс филм“ од Црна Гора.
Проектот е поддржан и финансиран од Агенција за филм на Република Северна Македонија и фондовите за филм на земјите на копродуцентите. Снимањето на филмот го потпомогна и „Еуримаж“.
Актерска екипа на „Од рајот“: Горан Навојец, Ксенија Маринковиќ, Бојан Навојец, Милош Самолов, Срѓан Тодоровиќ, Ана Мандиќ, Анџелка Прпиќ, Милош Тимотијевиќ, Рале Миленковиќ, Нела Михаиловиќ, Небојша Дракула, Никола Пејаковиќ, Мира Џурџевиќ, Маја Лукиќ, Оливера Викторовиќ, Владимир Тица, Марко Гверо, како и македонските актери Ратка Радмановиќ и Дениз Абдула.
Продуценти – Билјана Првановиќ, Србија, Хајно Декерт, Германија, Владимир Анастасов, Ангела Несторовска, Македонија, Ева Рорман, Словенија и Дариа Куленовиќ Гудан, Хрватска.
Директор на фотографија е Душан Јоксимовиќ, сценограф Јелена Сопиќ, костимограф Татјана Стругар и шминкер Сандра Иватовиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Костадиновска-Стојчевска: Ги исполнуваме препораките на УНЕСКО и заеднички овозможуваме трајна заштита на Охридскиот Регион
Министерката за култура и претседателка на Националната комисија за УНЕСКО, Бисера Костадиновска-Стојчевска, денеска во Охрид оствари работна средба со претставниците на реактивната мониторинг-мисија на УНЕСКО, која е составена од членови на Центарот за светско наследство, Меѓународниот совет за споменици и локалитети и Меѓународната унија за заштита на природата. Средбатата се одржа во Завод и Музеј – Охрид, а учество зедоа и членовите на Националниот координативен тим од нашата држава и директорката Ирена Шајн.
„Министерството за култура и Националниот координативен тим посветено работат на спроведување на препораките од УНЕСКО во делот на заштита на културното наследство. Не отстапуваме од грижата за Охридскиот Регион и зачувување на статусот на престижната листа на УНЕСКО. Уверена сум дека обединети, сите заедно, централната, локалната власт и невладиниот сектор во заедничка координација со забрзана динамика ќе продолжиме да ги исполнуваме насоките на УНЕСКО во подобрување на состојбите со реткото природно и културно наследство на нашиот регион“, потенцира Костадиновска- Стојчевска.
На средбата стана збор за актуелните состојби поврзани со заштитата на културното наследство во Охридскиот Регион, начините за надминување на предизвиците и напредокот што го има остварено државата во однос на последните препораки на УНЕСКО.
Министерката со македонските експерти ги информира членовите на реактивната мисија за сите реализирани, како и за тековните активности поврзани со препораките, како што е донесувањето на стратегискиот план за рехабилитација на природното и културното наследство на Охридскиот Регион, изработката на правни документи, меѓу кои предлог-закон за управување со светското природно и културно наследство и предлог-закон за изменување и дополнување на Законот за прогласување на старото градско јадро на Охрид за културно наследство од особено значење.
Беше дискутирано и за завршените активности за заштита на дрвената платформа во Заливот на коските, пристапот до заштитените културни добра, изработката на „упатство за иматели на недвижни културни добра во Охридскиот Регион – светско наследство на УНЕСКО“, со цел да им се помогне на имателите на недвижни културни добра во Охридскиот Регион да ги исполнат своите права и обврски.
Средбата беше дел од агендата на тридневната заедничка реактивна мониторинг-мисија на членовите од Центарот за светско наследство на УНЕСКО, Меѓународниот совет за споменици и локалитети (ИКОМОС) и Меѓународната унија за заштита на природата во прекуграничното светско наследство „Природно и културно наследство на Охридскиот регион“ во Република Албанија и во Северна Македонија.
Култура
Почнува 19. издание на фестивалот за современи уметности АКТО
Месецов почнува 19-тото издание на фестивалот за современи уметности АКТО и ќе се одвива во текот на целата година. Новото 19-то издание на АКТО продолжува на линија на минатогодишното издание АКТО 18 „Јавни простори во движење (кон) II“ и се отвора со низа мурали, на кои работат тројца млади уметници/чки, а е предвидено да се изработат во разни градови во државата опфаќајќи тематики во духот на солидарноста на заедницата. Првиот мурал, кој е веќе завршен, се наоѓа во Скопје на зградата број 33 на булеварот Митрополит Теодосиј Гологанов наспроти студентскиот дом „Кузман Јосифовски-Питу“ и ќе биде отворен в четврток на 28 март. На него работеа уметниците Ивана Самандова, Ана Трајковска и Доротеј Нешовски.
Во центарот на Скопје, на зградата број 33 на булеварот Митрополит Теодосиј Гологанов, наспроти студентскиот дом „Кузман Јосифовски-Питу“ пред 30-ина години беше ставен голем рекламен материјал, кој заедно со фасадата веќе одамна беше во разрушена состојба. Затоа, поткрепени со оптимистичката поддршка и ентузијазам на станарите во зградата, организацијата „Факултет за работи што не се учат“ – ФРУ заедно со уметниците Ивана Самандова, Ана Трајковска и Доротеј Нешовски иницираа акција за обновување на заборавениот ѕид, со цел да остане визуелна игра, но и значаен потсетник во строгиот центар на градот.
Идејата зад овој мурал не беше само да се обнови фасадата на зградата ниту, пак, во фокусот беше да се претстави само визуелно решение, туку да се создаде потсетник за важноста на солидарноста во општеството. Играта со архитектурата е замислена да оствари директна комуникација со самите случајни минувачи во секојдневието – оние што се упатени кон (или заминуваат од) работа, училиште, факултет, пазарување, прошетки. Mинувачи пронајдени во самиот визуелен изглед на муралот што ја носи главната порака, која гласи: „Големината на заедницата најпрецизно се мери преку солидарните постапки на нејзините членови“.
Оваа порака од Корета Скот Кинг (авторка, активистка и лидерка на граѓански права) се упатува кон многуте заедници што го оформуваат разновидниот карактер на општеството, а за да опстанат, тие зависат во голема мера од солидарните и добронамерни постапки токму од нејзините членови. Затоа, неслучајно оваа мисла е носечката порака на првиот мурал, таа служи како потсетник дека токму членовите се одговорни за градењето на меѓусебно разбирање, толеранција и заеднички борби за создавање подобри и поздрави услови на живеење овозможувајќи поддршка и слободно заедничко творештво – не само во културата и уметноста туку и пошироко во рамките на општеството во кое живееме.
АКТО 19 претставува продолжение на тематиката – „Јавните простори во движење (кон)“, преку која минатата година фестивалот презентира неколку практики, кои замислуваа ослободен простор, дури и привремено, за гласот на игнорираните, запоставените, замолчените, испуштените и маргинализираните во рамките на постојната хегемонија. АКТО смета дека овие уметнички практики може повторно да создадат јавен простор преку борбите за правата и во блиска врска со општествените движења или дури и да ги стимулира во моменти кога се чини дека се слаби.
Фестивалот АКТО е во организација на здружението „Факултет за работи што не се учат“ – ФРУ и во текот на годината во своите рамки ќе продуцира повеќе настани во земјава и странство.
Култура
„Госпоѓиците од Авињон“ на сцената на Националната опера и Балет
На сцената на Националната опера и Балет, на 11 април, со почеток во 20 часот, ќе се изведе атрактивната балетска претстава во 9 слики, „Госпоѓиците од Авињон“. Со оваа претстава почнува jубилејното 20. издание на интернационалниот фестивал „Танц фест Скопје 2024“, кое ќе има нов концепт и повеќе разни програми, меѓу кои и програмата со наслов „Паралели“, во која ќе се прикажат три претстави од репертоарот на Националната опера и Балет, со цел да се прикажат современите текови на Националниот балет и да се претстават повеќе домашни кореографи.
Балетската претстава „Госпоѓиците од Авињон“ е инспирирана од истоимената слика на уметникот Пабло Пикасо, зборува за пет жени и нивниот живот, нивната потрага по љубовта, смртта и слободата.
Музиката во претставата е на Калиопи Букле, за кореографијата и режијата задолжена е Олга Панго. Либретото и драматургијата се на Сашо Димоски, костимограф е Раде Василев, а на мултимедија и дизајн работеше Емил Петров, дизајн на светло – Милчо Александров, а дизајн на шминкa – Златица Поповска. Асистенти на кореографот се Горан Божинов и Саша Евтимова. Користени се сценографски елементи од операта „Змејовата невеста“ – сценограф Валентин Светозарев.
Настапуваат: Александра Мијалкова, Мими Поп-Алексова Атанасовска, Ивана Коцевска, Саша Евтимова, Христина Наќевска, Мирослав Митрашиновиќ, Балаж Лочеи, Агим Бафтии, Ендру Кук.