Daily news
Никола Ристановски го освои Загреб со „Иванов“
По разочарувањето со поставката на „Иванов“ на Еимунтас Нокрешиус на Хрватското народно казалиште, загрепската публика со овации го испрати неодамнешното гостување на белградското Народно позориште со „Иванов“ на Татјана Мандиќ Ригонат.
По премиерата на неуспешниот „Иванов“ на ХНК, во Загреб гостуваше белградскиот „Иванов“. Чехов на Народното позориште со големиот Никола Ристановски – беше фамозно! Со овие зборови театарскиот критичар Борис Хомовец во загрепски „Телеграм“ се осврнува на претставата во која се истакнува Ристановски во насловната улога.
Опширната критика на Хомовец започнува со констатацијата дека режисерката на белградскиот „Иванов“, Татјана Мандиќ Ригонат, го нокаутирала Еимуинтас Нокрешиус, режисерот на загрепската верзија на пиесата на Чехов.
„Ригонат направила претстава каква што посакувам веќе со години и покажа дека уште постојат одлични режисери кои не се извикани ѕвезди, кои знаат да постават претстава со голем ансамбл. Според класичниот текст, со првокласни глумци кои имаат модерен пристап кон автентичниот текст, а при тоа не го масакрираат. Заради нив има смисла да се занимаваш со оваа работа и да го следиш театарот, а во ретки моменти и да уживаш во магијата на сцената. Беше тоа вечер на триумф на уметноста, театарот и убавината, која ги победи политиката, тривијалноста и празнотијата на другата страна“, воодушевено пишува загрепскиот критичар.
Инаку, „Иванов“ ја имаше премиерата на сцената на Народно позориште од Белград во октомври минатата година.
„Бев оптимист, а сега… Се уморив… не верувам… Мојата земја е пропадната“, гласи една од првите реплики што ги изговара Ристановски како Иванов, и токму таа реплика беше во фокусот на белградските медиуми по премиерата.
Ригонат е етаблирана режисерка, дипломец во класата на познатиот театарски мајстор Дејан Мијач. Во „Иванов“ таа има ангажирано врвни професионалци, како словенечкиот сценограф Бранко Хојник, кој ја дизајнирал сцената како ринг, во кој се наоѓаат тројцата главни глумци и оркестар составен од тројца музичари, кој постојано свири. Визуелноста на поставката е надополнета и со прекрасните костими на Бојана Никитовиќ, па фустаните кои ги носат протагонистките Нада Шаргин и Хана Селимовиќ истовремено се класични и современи.
Ригонат го подготвувала „Иванов“ три месеци, па затоа ова е претстава на атмосфера, чеховска меланхолија, во која уживате во секоја реченица која глумците ја изговараат правилно, смета Хомовец.
Тој истакнува дека претставата ја носат тројцата глумци: Ристановски како Иванов, Шаргин како Ана Пертовна и Селимовиќ како Саша.
„Овде нема надигрување, овде никој не бутка никого за да се пробие во прв план, овде колегите се почитуваат меѓусебно, имаат фина интеракција, реагираат во секунда и тоа се чувствува“, пишува критичарот, додавајќи го и придонесот на глумците Предраг Ејдус, Бранка Петриќ, Никола Вујовиќ, Ненад Стојменовиќ, Даниела Угреновиќ, Бранко Видаковиќ…
Сепак, целиот респект на критичарот оди на сметка на Никола Ристановски.
„Ристановски е најдобриот и најубав Иванов којшто сум го видел кога било. Толку е суптилен, нежен, ранлив, несигурен, несреќен, збунет, тивок кога треба, но духовен, искрен и фасцинантно моќен кога треба силно да го подигне гласот, што не се сеќавам кога последен пат толку уживав во нечија глума на сцена“, вели Хомовец.
Критичарот додава дека седел близу сцената, и еве ги неговите дополнителни импресии.
„Набљудував како додека глуми е со боси нозе, па глуми дури и со ножните прсти! Ристановски, притоа, е маркантен, згоден човек и многу убаво говори. Голема штета е што сите наши големи и извикани глумци не дојдоа да го видат колегата од кого би можеле многу да научат. И како се игра на сцената без патетика, непотребни гестови, бесмислено урлање и гримаси. Да видат како големите глумци се најголеми кога се тивки и скромни, а толку моќни. Никола Ристановски е токму таков, денес еден од најголемите на овие простори. И заслужува голем респект, токму како оваа врвна претстава на Татјана Ригонат…“, заклучува Хомовец. крај/мф/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.