Култура
Вип оператор – партнер на филмскиот фестивал „Браќа Манаки“
Во насока на продолжување на традицијата и вистинските културни вредности, ВИП оператор и Интернационалниот филмски фестивал на филмска камера Браќа Манаки денеска го објави официјалното партнерство за 31-то издание на фестивалот кој ќе се одржи од 16 до 22 октомври во Битола.
Во насока на продолжување на традицијата и вистинските културни вредности, ВИП оператор и Интернационалниот филмски фестивал на филмска камера Браќа Манаки денеска го објави официјалното партнерство за 31-то издание на фестивалот кој ќе се одржи од 16 до 22 октомври во Битола.
Како новина за годинашното издание на фестивалот беше најавено по првпат воведувањето на програмата „ВИП јуниор “ со која младите секој ден за време на траење на фестивалот ќе гледаат по еден бесплатен филм во центарот на Битола.
„Сакаме да воспоставиме нови стандарди, а не младите да седат дома и да гледаат шпански и турски серии. Заедно со ВИП ќе се потрудиме на фестивалското издание да има повеќе семинари и тркалезни маси бидејќи само така може да ги поттикнеме новите генерации на филмски творци и вљубеници во филмот“, рече директорката на „Браќа Манаки“ Лабина Митевска на денешната прес-конференција.
Како што истакна Митевска, целта на воведувањето на програмата „ВИП јуниор“ е да се отргнат младите од гледањето на шпански и турски серии.
„Наша цел како фестивал е да ја внесеме Македонија во светската културна мапа и за тие два-три дена за времетраење на фестивалот да го донесеме светот кај нас. Како и сите познати фестивали за остварување на нашата работа и за зачувување на лани стекнатиот епитет најдобар од малите фестивали ни беше неопходна поддршка од спонзор. Морам да изразам огромно лично задоволство од воспоставеното партнерство со ВИП“, додаде Митевска.
Никола Љушев, Главен извршен директор на ВИП истакна дека честа да се биде партнер на еден настан којшто ги обединува традицијата и вистинските вредности е навистина голема.
„ Заедничка цел е да се даде нова вредност, визија и содржина на фестивалот, кој е успешна филмска приказна веќе 31 година, период кој зборува за сериозноста и кредибилитетот што ја постигнал фестивалот што претставува авангарда во Македонија. Просечната старост на вработените во ВИП е 30 години и ние себе си се сметаме како авангарда во телекомуникациски бизнис. Затоа не ни беше тешко да се одлучиме на партнерство“, истакна Љушев.
Главен покровител на фестивалот ќе биде претседателот на Република Македонија Ѓорге Иванов, а ќе биде финансиран и поддржан од Министерството за култура, Општина Битола Филмскиот фонд и амбасадите на Холандија и САД во Македонија./крај/ир
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Националниот џез оркестар со програмата Џез лектира гостува во Велес
По концертот во Скопје, Националниот џез оркестар со програмата под наслов „Џез лектира“ гостува во Велес. Концертот ќе се одржи на 23 април, 2024 година, со почеток од 20 часот во театарот „Јордан Хаџи Константинов – Џинот“.
„На концертот „Џез Лектира“ се осврнуваме на дел од творештвото на Каунт Бејси биг бендот. Вилијам Џејмс, познат како Каунт Бејси е американски џез пијанист, органист, водач на бенд и композитор, познат и како „Кралот на свингот“. Во 1935 година, тој го формира оркестарот „Каунт Бејси“ и ја води оваа група скоро 50 години. Неговата работа резултира со низа иновации во музичкиот израз како употреба на два „поделени“ тенор саксофони, нагласување на ритам секцијата, рифови во биг бенд композиции, аранжери за дополнително проширување на биг бенд звукот и слично“, се наведува во соопштението на Националниот џез оркестар.
Култура
Костадиновска-Стојчевска: Саемот на книгата, во време на емотикони, е во одбрана на раскажувачите и писменоста
Министерката за култура, Бисера Костадиновска-Стојчевска, во арената „Борис Трајковски“ на отворањето на 36. издание на Саемот на книгата порача дека Министерството за култура, како покровител на овој, како што рече, „празник на книгата“, останува голем пријател и силен поддржувач на ова наше богатство.
„На годишните конкурси, од година во година, импресивен е бројот на сè повеќе пријавени квалитетни дела и од млади македонски автори. И тоа искрено нè радува. Како што нè радува и зголемениот интерес за создавање многубројни наслови и публикации за деца. Без двоумење ја добиваат нашата поддршка зашто во овие модерни времиња во кои има сè помалку зборови, а сè повеќе кратенки и емотикони, раскажувачите на приказни се чувари на писменоста“, рече министерката за култура.
Во присуство на голем број љубители на пишаниот збор, Костадиновска-Стојчевска порача дека во виртуелниот свет го нема овој опоен мирис на книгата. Само во реалниот свет, ова богатство од книги на македонски јазик од домашни и од странски автори го испишува овој простор во уште една „Приказна која се чита“.
Саемите за книги во последните години, според некои автори, кажа министерката дека прераснаа во едукативни и културни настани кои даваат можност за вмрежување преку негување на врските меѓу авторите, издавачите и читателите. Истовремено радува и сè поголемиот број посетители, што само по себе зборува многу за односот кон книгата.
Триесет и шестото издание на Саемот на книгата, што ќе трае до 24 април, во седумте саемски денови ќе понуди книги од домашни и од странски автори од над 60 издавачки куќи од земјава и од регионот.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.