Култура
„Свадба“ и петдневен бакнеж на АКТО фестивал
Со започнувањето на петдневниот бакнеж на уметниците Ива Ковач и Елвис Крстуловиќ е најавено отварањето на петтото по ред издание на „Акто“ – Фестивалот за современа уметност кој ќе се одржи од 11 до 15. август во Битола.
Со започнувањето на петдневниот бакнеж на уметниците Ива Ковач и Елвис Крстуловиќ е најавено отварањето на петтото по ред издание на „Акто“ – Фестивалот за современа уметност кој ќе се одржи од 11 до 15. август во Битола. Оваа година на АКТО ќе има 50-тина учесници од Македонија, Словенија, Хрватска, Бугарија и Србија. За тема на фестивалот е избрана темата „Свадби“ која во суштина е “неуметничка” тема, и идејата е да се испровоцира односот кон социјалниот контекст преку уметничко делување на тема која што е знакова и популарна. „Конкретно го испитуваме контекстот на свадбите и ритуалот на кич кој го претставуваат со себе,“ соопштуваат од АКТО тимот. Како и досега и оваа година уметничкиот и продукциски тим на АКТО не го испушта моментот на изненадувањето што ќе се презентира преку двете константи форми со кои се занимава, а тоа се темата и просторот и најавуваат особен акцент во програмата на Фестивалот да биде ставен на визуелните уметности и музиката. Дел од уметниците кои публиката ќе има шанса да ги види на АКТО се словенечкиот визуелен уметник Игор Штормаер кој ќе понуди мултимедијално уживање со делото “Свадба на роботи”(Ballettikka Intternettikka). Тука е и македонскиот визуелен уметник Никола Узуновски со своето дело “Моето сонце” со кое се претстави и на венециското биенале во 2009 година, потоа домашните уметници Игор Тошевски, Формацијата Ф.Р.И.К. и Велимир Жерновски, ОПА, Филип Јовановски, групата словенечки визуелни уметници кои ќе имаат своја изложба на фестивалот насловена “YES”, хрватската група гости предводени од визуелните уметници Ана Хорват, Ана Хусман Ива Ковач, Ива Мештроф и Елвис Крстуловиќ, како и десетмината гости од Бугарија. Разновидна и квалитетна музичка програма ќе ја сочинуваат Штутгарт онлајн (Studgart online) од Србија, Стринг Форсес (String Forces) од Македонија, домашните ди џеи Мaчки, Базел, ди-џеј сет од Мирко Попов и Синиша Ефтимов, Васо & Гејм овер, Андреја Анчевски, Плагијат, Урбаниум и други. Гостите на АКТО 5 ќе имаат шанса да го видат и Истражувачко студио за храна, наука и уметност која ова издание ќе се занимава со Свадбено готвење во живо. Во соработка со Македонски Железници, во петок, 13 – ти август организаторите ќе приспособат еден вагон од возот кој се движи на релација Скопје – Битола – Скопје за гостите кои сакаат да дојдат на фестивалот. Во вагонот ќе има добра забава со ди џејот K.Petrovsky, додека превозот е бесплатен. Фестивалот АКТО е дел од Битолското културно лето Битфест 2010 година, во организација на општината Битола. Општината го подржува Фестивалот технички, финансиски и логистички./крај/со/ко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Госпоѓиците од Авињон“ на сцената на Националната опера и Балет
На сцената на Националната опера и балет на 11 април со почеток во 20.00 часот ќе се изведе атрактивната балетска претстава во 9 слики „Госпоѓиците од Авињон“. Со оваа претстава започнува jубилејното 20. издание на интернационалниот фестивал Танц Фест Скопје 2024, кое ќе има нов концепт и повеќе различни програми, меѓу кои и програмата насловена „Паралели“ во која ќе се прикажат три претстави од репертоарот на Националната опера и балет, со цел да се прикажат современите текови на Националниот балет и да се претстават повеќе домашни кореографи.
Балетската претстава „Госпоѓиците од Авињон“ е инспирирана од истоимената слика на уметникот Пабло Пикасо, зборува за пет жени и нивниот живот, нивната потрага по љубовта, смртта и слободата.
Музиката во претставата е на Калиопи Букле, за кореографијата и режијата задолжена е Олга Панго. Либретото и драматургијата се на Сашо Димоски, костимограф е Раде Василев, а на мултимедија и дизајн работеше Емил Петров, дизајн на светло – Милчо Александров, а дизајн на шминкa – Златица Поповска. Асистенти на кореографот се Горан Божинов и Саша Евтимова Користени се сценографски елементи од операта „Змејовата невеста“ – сценограф Валентин Светозарев.
Настапуваат: Александра Мијалкова, Мими Поп-Алексова Атанасовска, Ивана Коцевска, Саша Евтимова, Христина Наќевска, Мирослав Митрашиновиќ, Балаж Лочеи, Агим Бафтии, Ендру Кук.
Култура
Бесплатен влез за две претстави во МНТ за Светскиот ден на театарот
Македонскиот народен театар, по повод 27 Март, Светскиот ден на театарот, за љубителите на театарската сцена организира две бесплатни претстави.
Станува збор за детско-младинската претстава „Силјан Штркот шанца“ во режија на Срѓан Јаниќијевиќ, која ќе се одигра на малата сцена на 30 март во 12 часот, и изведбата на претставата „Бесачи“, во режија на Јавор Грдев, која ќе биде со вечерна изведба на 6 април со почеток во 20 часот.
Гратис билетите ќе се подигнуваат пред почетокот на изведбите.
ПР-текст
Култура
Промоција на стихозбирката „Песнило“ од Ива Петреска
Дебитантската стихозбирка „Песнило“ од младата поетеса Ива Петреска ќе биде промовирана в среда, 27 март, со почеток од 20 часот во „Кафе лаб“ („Лабораториум“) во Скопје. Збирката низ разговор со авторката ќе ја претстави Јулијана Величковска, а настанот ќе биде збогатен и со изложба на фотографии од Колевски.
„’Песнило’ пее за сите нешта што се чувствуваат на кожата, што ежат, што горат, што оставаат лузни, а потем сече, слој по слој, со прецизен и остар јазик како скалпел соголувајќи го гнилото во нас и во општеството за накрај в раце да го држи нашето срце и од нас зависи дали ќе ни заврши во тегла“, вели Јулијана Величковска.
„’Песнило’ ќе ви ги отвори очите, ќе ве разбесни, ќе ве насмее, ќе ве налути, ќе ве праша дали сте здрави и ќе ве прекори. Ова е стихозбирка што беснее меѓу двете корици, а ако има беснило, Ива Петреска ќе ја излечи со своето песнило“, рече Андреј Медиќ-Лазаревски.
„Ете така, само понекогаш, ќе се појави млад женски глас што патува низ времето, и постои отсекогаш до којзнае кога, ако не и засекогаш. Ива Петреска со својот младешки импулс и глас им ја дава живоста и бојата на нештата од кои е составен товарот на животот. ‘Песнило’ е анатомија на суштественото; песните се хируршки прецизни резови преку кои се прави пристап до телесното и духовното, од каде излегуваат звучно и тактилно, со сета своја силина, љубовта, презирот, молкот на едниот и крикот на другиот, болката на местото на љубење, сето тоа длабоко од внатрешноста на срцето, директно од местото на допирот, однатре истекува сета зачуденост од неправди и лаги, сета растргнатост помеѓу грижата за другиот и гневот кон него, сета храброст одново и повторно да љуби. „Песнило“ е сите прашања, сите повици да се разбуди другиот, да се биде буден, да се гледа, да се држи погледот вперен во убавината, во апсурдот, во животот, да се биде една од жените што трчаат со волците, да се биде дива, а не сива“, вели Д. А. Лори.
Ива Петреска (2001, Скопје) студира на Медицинскиот факултет во Скопје. Учествувала на повеќе поетски читања, како што се: „Поетска епизода“ и „Клинци“, во организација на „Култура бета“,„Отскочна штица“, настан за млади во рамките на Скопскиот поетски фестивал, „Добри гости“, и др., а неколку нејзини песни се објавени во „Репер“. Застапена е во „Ново раѓање на зборот: антологија на младата македонска поезија“ (2023, ПНВ Публикации). „Песнило“ е нејзина прва стихозбирка.